HOME LANGKAN PANTUN


  • Rabu, 11 September 2019
BANCANO CINTO DATANG
Pantun

BANCANO CINTO DATANG

Karya : Yasin Habibillah Pratama

 

Adiak buliah datang!

Tapi jan sabagai pandatang

Jikok urang lain nan mandatangi hati uda

Elok adiak mandatangkan raso rasian

Jikok adiak didatangi urang lain

Urang nan didatangkan dari mimpi

Nan datang-datang manyilaui cinto kito

Jikok nan lain badatangan ka hati uda

Ndak elok kito saliang datang-mandatangi

Sungguah pandatangan urang nan lain ko

Mambuek kito kadatangan bancano cinto

Cinto nan lah lamo kito jalin

Nan lah kito tulih di ateh batu

Tahapuih dek datang tu

 

 

Bak Rasian Sikumbang Tabang

Karya : Yasin Habibillah Pratama

 

Badabuak darah di dado

Mangko di tanyo kandak rang mudo

Ndak buliah garah jo cando

Mananyo kian, bakeh siapo?

Ambo nan cameh manjawek angan

Jikok talompek mohon maafkan

 

 

BASAH TAPI HAUIH

Karya : Yasin Habibillah Pratama

 

Tangan manampuang mambasuah luko

Abu jo angin nan mambasahinyo

Apo kana lai..

 

Apo kana lai..

Pai ma adok jo muluik kariang

Tampa dimintak alah diagiah

Manitiak, maungguak ka mudiak

Tapi...

 

Apo kana lai..

Lah basah sakujua pai jo pulang

Tigo hari maimpok patang jo pagi

Nan dikandak kadang dikabua i

Ntah kok gajah lai batalingo

Samuik mangecek tak tadanga

Kok singo ma auang balarian

Apo lah kana lai....

 


Wartawan : Yasin Habibillag Pratama
Editor : bahren

Tag :# Langkan # Puisi # Minang