HOME LANGKAN CARITO

  • Senin, 11 November 2019
TUNGKEK MAMBAO RABAH
Carito

TUNGKEK MAMBAO RABAH

Oleh: Siti Juhaira Fitri*

 

Sajak tadi pagi urang lah banyak dapek barito kok kini banyak galemok urang ka man-demo ka kantua Dewan di daerah Labuah. Dek mandanga kaba tu, si Juf nan bakarajo jadi Satpam di kantua Dewan tantu lah dapek info labiah dulu dari Komandan nyo di kantua tu. Dek karano itu, sabalun matohari naik si Juf alah barangkek dari rumah pai ka kantua tu.

Ruponyo inyo surang nan tibo daulu di kantua, kawan satpam nan lain alun tibo ciek alah nyo. Kiro-kiro 15 minik sudah tu tibolah Komandan e, langsuang si Juf ma agaih panghormatan ka Komandan e, “ Salamaik Pagi, Komandan! Awak lah manunggu 15 minik Dan, awak surang je nyeh nan sampe duluan di siko, sabab kecek Komandan kapatang awak dolahnyo jam 05.30 WIB lah sampe di kantua. Dek ambo bawahan tantu ambo manuruik jo parintah Dan.”  Manjawek lah si Komandan ko, “ Salamaik pagi, ndehh ambo talaik dek karano ban onda bocor kanai di jalan tadi, untuang lai ado bengke nan buka 24 jam basuo tadi.” Padahal sabananyo si Komandan takalok di rumah tadi, dek mandanga urang ribuik bacakak di sabalah rumah mangko nyo jago.

Satpam-satpam nan di kantua Dewan langsuang mangamankan lokasi pas urang lah mulai demo. Urang yo sabana rami kiro-kiro labiah dari limo puluh ribu urang. Iyo kawalahan si Juf jo kawan-kawannyo. Karajo nyo hanyo mancaliak keadaan jan sampe tajadi ricuh.

Si Juf banyak mancalik kato-kato yang di sorakan urang demo tu, banyak kato nan mamburuak-buruak an anggota Dewan ko, dek karano banyak masyarakek ko nan kecewa. Bakato lah Komandan tadi ka si Juf, “ Yo subana sumangaik bana mahasiswa ko pai demo” disambuik dek si Juf. “Tantulah iyo Dan, banyak urang Dewan ko nan indak mewakili suaro masyarakek, sabalun tapilih yo subana manih janji-janji e, tibo lah tapilih indak takana jo janji nan lah disabuik, pas di demo lah mahilang antah kama.” Di jawek baliak dek si Komandan, “ Iyo mode itu parangai anggota Dewan tu, subana nyo inyo lah yang mewakili suaro masyarakek ko ka pamarintah, tapi apo nan tajadi indak mode apo nan seharusnyo. Takah ‘Tungkek Mambao Rabah’….” Pailah si Juf ka dalam ruangan dek mancaliak kondisi disitu lah mulai rusuah.

Sapulang dari karajo langsuang nyo pai  ka kadai minum kopi di tampek biasonyo. Basuo lah si Juf jo Mamak nan kanduang. Dek tangiang-ngiang di kapalo kecek si Komandan nan tarakhir tadi, “ Tungkek Mambao Rabah”. Langsuang batanyo si Juf ka Mamak nan kanduang, “Mak, Apo mukasuik arti kato Tungkek Mambao Rabah  ko? Langsuang manjawek lah Mamak, “ Ba a kok itu yang ang tanyo? Apo sabab nan jo karanonyo?”  “ Tadi ambo pas karajo di kantua mangecek-ngecek jo Komandan ambo soal urang demo ka anggota Dewan dek karano banyak masyarakek ko nan lah kecewa.” Sambuik si Juf ka Mamak.

“Kok baitu kato ang molah ambo jalehan, Tungkek Mambao Rabah. Kato tungkek samo artinyo tongkat kalau bahaso Indonesia nyo, adolah benda yang biasonyo tabuek dari kayu tapi dek zaman samakin canggih tungkek lah baragam macam bahan jo bantuaknyo. Tungkek ko baguno untuak manopang, untuak mambao awak badiri tagak supayo indak jatuah jo tapuruk.  Urang nan mamacik tungkek samo jo urang nan diagaih amanah atau samo juo jo pemimpin. Urang nan mamacik tungkek ko adolah urang pilihan, urang nan di dahului salangkah di tinggian sarantiang adolah urang nan arif bijaksana. Tingkah lakunyo sangaik dijago, karano inyolah yang manjadi panutan atau tuladan bagi urang yang nyo pimpin. “ Jawek Mamak.  Lah abih kopi sa cangkia di minum dek Si Juf mandanga kecek Mamak…

“Lalu rabah ko samo artinyo rebah jo bahasa Indonesia nan aratinyo posisi jatuah, talatak atau tumbang.  Jadi Tungkek Mambao Rabah ko mukasuiknyo adolah tungkek ko bana nan mambao rabah atau tajatuah. Tungkek yang sabananyo mambao tagak tapi indak tagak malah manjadi rabah atau tajatuah. Urang nan manjadi pamimpin tadi nan mambuek kasalahan sahinggo kepemimpinannyo rabah atau jatuah yang dak bisa mambao urang yang nyo pimpin tu manjadi yang saharusnya tacapai tujuan. Itu nan bisa ambo jalehan ka wa ang, kok alun jaleh dek ang lai. Mari bisuak kito badiskusi di balairung basamo-samo.” Mamak manjalehan ka si Juf. Pai lah mamak dari kadai dek ado urusan nan lain, si Juf langsuang pai lo dek sakik paruik handak pai ka WC.. “Tek.. utang kopi ko duluu.. sabtu ambo bayiaaa!!”

* (Mahasiswa Jurusan Sastra Minangkabau Fakultas Ilmu Budaya UNAND)

 


Wartawan : Siti Juhaira Fitri*
Editor : bahren

Tag :# Langkan # curito #minang