TATA CARA TINGGA DI RUMAH GADANG KHUSUSNYO DI KAMPUANG SARIBU GONJONG

TATA CARA TINGGA DI RUMAH GADANG 

KHUSUSNYO DI KAMPUANG SARIBU GONJONG

OLEH: Dr. SATYA GAYATRI, M.Hum. dan EKA MEIGALIA, S.Hum., M.Hum.

          Rumah Gadang punyo banyak fungsi untuak sabuah kaum di Minangkabau. Salain jadi tampek tingga, rumah gadang jadi bagian pantiang dalam iduik masyarakaik. Biapun banyak fungsinyo, tapi rumah gadang kini banyak nan indak dihuni sarato banyak pulo nan alah rubuah sairiang wakatu. Rumah gadang kini alah banyak digantian dek rumah batu nan bantuaknyo labiah moderen. Tapi balain kondisinyo jo rumah gadang nan ado di Kampuang Dadok, Kanagarian Koto Tinggi, Kacamatan Gunuang Omeh, Kabupaten 50 Kota. Rumah gadang di siko masih banyak, masih jadi bagian dari iduik masyaraiaknyo sarato masih dijadian untuak tampek tingga. Dek karano banyaknyo rumah gadang nan ado di situ, mako dinamoan daerah tu jo Saribo Gonjong atau disabuik juo Kampuang Sarugo, Saribu Gonjong.

          Rumah Gadang nan ado di kampuang iko punyo 5 gonjong. Agak balain jo rumah gadang di tampek lainnyo nan gonjongnyo bajumlah ganok. Ruponyo jumlah gonjong nan 5 ko ado mukasuik di baliaknyo. Limo ko manunjuak ka rukun Islam nan ado 5 pulo. Sasuai pulo jo falsafah Minang nan babunyi “adat basandi syara’, syara’ basandi kitabullah”. Salain itu, 5 juo manunjuakkan baso di dalam masyarakaiknyo ado ampek suku nan ado ditambah ciek jo Bundo Kanduang. Di siko nampak baso salain pamuko dari ampek suku tu, bundo kanduang juo harus dibaok untuak bamupakaik.

          Posisi rumah gadang di kampuang iko sadonyo dibuek balirik lataknyo, biapun babeda suku. Posisi iko malambangkan indak adonyo nan dibedaan baiak harato sarato pangkeknyo di dalam masyarakaik. Baitu juo indak ado bedanyo bantuk rumah gadang dari ciek suku jo suku nan lain sahinggo nampak samo sajo sadonyo. Arah madok rumah gadangnyo dibuek samo pulo kasadonyo. Sadonyo madok ka matoari tabik, mambalakang ka arah matoari tabanam. Manuruik Kapalo Datuak satampek, arah iko baguno untuak mamudahan urang mancari arah kiblat sumbayang, utamunyo untuak urang-urang dari lua kampuang. Jadi kalau ka sambayang di ateh rumah gadang, arahnyo mambalakangi pintu masuak.

          Pado mulonyo, rumah gadang di Kampuang Saribu Gonjong dibuek babiliak-biliak. Kudian biliak diilangan dek supayo urang nan ado di dalamnyo labiah dapek babaua, indak batangka-tangka. Salain itu, jo indak adonyo biliak-biliak jadi murah mangumpuan anak kamanakan di rumah gadang. Dalam mangumpuan anak jo kamanakan tantu ado rundiangan nan hanyo patuik didanga dek anak kamanakan nan indak sapatuiknyo didanga dek urang sumando. Makonyo jikok ado kamanakan nan padusi nan alah balaki tingga di rumah gadang, dibuekan rumah batu di sampiang rumah gadang tu. Jadi sumando jo bini sarato anaknyo tidua di kamar itu.

          Rumah Gadang ditagakkan sacaro basamo utamonyo dek anak kamanakan sakaum. Karajo dimulai dari mancari kayu ka rimbo sarato maangkek kayu ka lua dari rimbo. Kayu nan dicari utamonyo kayu nan dijadian tunggak tuo rumah gadang. Dalam bakarajo anak kamanakan dibagi barampek balimo untuak dibagi karajo nan akan dikarajoannyo. Sasudah tu wakatu manaiakan tunggak tuo diadoanlah alek.

          Rumah gadang dapek dihuni dek ciek keluarga. Jikok anak kamanakan alah batambah banyak pado ciek rumah gadang, mangko disambuang di sabalah rumah tuo tu rumah batu. Managakkan rumah batu iko dikarajoan dek urang tuo sakaluarga nan tingga di ateh rumah gadang. Tapi jikok urang sumando nan ka  tingga di rumah batu tu punyo pitih sarato talok mambuek rumah mako caro itu biaso pulo dikarajoan.

          Jikok ado anak kamanakan nan baralek sarupo baralek anak daro harus diadoan di rumah gadang. Baralek anak daro di daerah iko ado babeda caro aleknyo jo daerah lain. Si siko ado namonyo baralek jantan atau baralek niniak mamak. Alek tu diadoan malam hari sahari sabalum alek anak daro diadoan. Alek jantan manunjukan baso salah surang anak kamanakan alah sah manikah sacaro agamo jo adaik.

          Sabalum baralek sanak sudaro sarato urang sakaliliang dipanggia sasuai jo mamangan adaik nan babunyi “kaba baiak baimbauan, kaba buruak baambauan”. Adaik mamangia untuak baralek di siko dilakuan dek Bundo Kanduang nan ado di rumah gadang sabanyak duo urang. Dalam maimbaiu, bundo kanduang iko mambaok kombuik sarato uncang. Dalam uncang diisi kapua siriah jo pinang. Salain baralek anak daro, rumah gadang juo dipakai untuak alek batagak panghulu. Panghulu biasonyo diarak dek anggota kaum dari rumah gadang ka balai adat

          Tapi kok baralek turun mandi anak, babeda caro sarato tampeknyo. Untuak baralek turun mandi buliah diadoan di rumah batu nan ditagakkan di sampiang rumah gadang. Sasudah acara alek di ateh rumah, anak dijapuik dek bakonyo, kudian dimandian di rumah bako. Dari rumah bako iko anak diantaan baliak ka rumah mandehnyo. Baitu pulo acara baralek anak daro, anak daro turun dari rumah bakonyo, kudian baliak ka rumah gadang. Maarak dari rumah bako dilakuan supayo anak tahu asa bakonyo.