HOME LANGKAN GARAH

  • Sabtu, 13 April 2019

Razia

Garah
Garah

Razia

Oleh: Bahren*

Sapakan duo pakan partamo Si Man Iriak di Jakata, Galeh nan di jojokannyo kaliliang terminal Rawamangun sarato jo pasa nan tadakek lai bajalan. Satiok galeh ko abih, langsuang diambiak nan baru ka tampek Gindo Apuak atau ka kadai Si Am. Jiko tampek Apuak jo Si Am indak pulo ado Si Man Iriak macarinyo ka Koko Osong. Di kadai Ko Osong bisa pulo barang ko diambiak dulu sore baru dibayia sado nan tajua. Itulah karajo Si Man dari pagi hinggo patang. Satiok pulang manggaleh indak pulolupo Si Man manyisiahan saketek untuak infak jo sadaqah, Saketek pulo untuak amak jo mintuo e. Saketek lai untuak ka dikirim ka Supiak Onjai di kampuang. Salabiah nyo untuak biaya iduik sahari-hari di Jakata.

Sampai lah satu kutiko , hari nan sadang paneh garang, sadang nyo bunta bayang-bayang, sadang nyo rami urang di balai, sadang nyo litak-litak anjiang. Bitu bana nan parnah di baco di kaba-kaba. Antah ko langkah nan tak elok, atau koh nasib sadang sial. Sadang asik Si Man basorak ALNIDEGADA… ALNIDEGADA… ALNIDEGADA…tampak lah sagarombolan urang bapakaian kuniang-kuniang ayia langkok jo pentungan sarato tameng, turun lah urang nan banyak tu dari oto patroli batulih SK 4 jo pamong praja.

Dek mancaliak SK 4 jo pamong praja nan turun, banyak lah urang nan balarian, manyalamaik kan galeh jo barang dagangannyo. Nan mambaok garobak lah di tundonyo garobak tu, indak do tantu roda nan tangga, taruih sajo manundo inggo banda. Basah kuyuik lah masuak manda. Nan ba terpal lah di sandang e pulo terpal di baok balari, masuak gang kalua gang. Indak do tantu arah nyo kama. Ciek sajo pangana wakatu itu. Indak tatangkok itu sajo. Nan banyiru sarupo Si Man, baitu pulo tabang abih malah kasadonyo. Indak do lupo SI Man Iriak, dek kangkawannyo lah abih lari, dibukak e pulo lari saratuih, indak mancaliak suok jo kida. Apo nan kanai itu nan talando, baserak-serak lah galeh Si Man tu kini. Razia malah kironyo.

Si Man pun lari ka kadai Apuak, di suruak an galeh jo jaga nyo nan tasiso di suduik kadai sambia bapurak-purak jadi palayan toko.  Kutiko lewat SK 4 jo pamong praja di sapo lupo malah dek Si Man, nyari apa Om.. nyari apa Bos? Silakan, mari… mana tau ada. Yo lah sabana bantuak pagawai toko bana Si Man Iriak kutiko itu, sambia malapeh cameh jo takuik nan Si Man taruih purak-purak manyapo.

Indak doh bara lamo sasudah itu, razia pun salasai, nan SK 4 jo Pamong Praja lah baliak ka kantua nyo. Sado nan dapek kanai tangkok di masuak kan jo di angkek ka ateh truk nan alah di baok dek urang nan razia tu. Nan Si Man salamaik sakali ko, walapun galeh jo jaga e baserak-serak di sapanjang jalan tampek balari tadi. Dek mancaliak sarupo itu, abih juo darah Si Man dibuek nyo. Kok sempat mode ko agak tigo kali saminggu kuruih juo den dibuek nyo kato Si Man dalam hati. Gaca cik dibuek e mah runguih si Man sambia mangulum.

Isuak ari nyo, sasudah di bayia utang, di etong galeh nan ado, iyo agak karunyuik kaniang si Man, dek ulah kanai razia kalamari iyo agak tamakan pokok senek, tapaso di ulua lah galeh ko jo dana nan tasimpan. Di ajak baiyo jo batido Gindo Apuak sataro Jo Si Am. Bia manggaleh indak doh rusuah, indak ciek jo duo nan di pikiakan, baa pandapek dari kangkawan jikok ambo cubo mambukak lapak ketek-ketek di dalam pasa tu, baitu bana tanyo Si Man, ka Gindo Apuak sarato Si Am.

Rancak…rancak bana, kato si Apuak, Si Am pun maiyokan, Dek lah dapek bulek sabulek picak salayang mako di cari molah lapak di dalam pasa dek Si Man. Etongan putuih, kaji sasuai, dapek lah sapakaik maso itu tantang harago sarato sewa lapak nan ado. Seyo lapak di bayia, Si Man mulai iduik baru, manggaleh balapak ketek, indak bajojo kuliliang terminal jo pasa lai. Tapi nan ALNIDEGADA ko tetap sajo manjadi merek lapak e inggo kini.    

 

*Dosen Sastra Minangkabau FIB Unand


Wartawan : Bahren
Editor : Bahren

Tag :# Langkan # Garah # Minang

Baca Juga Informasi Terbaru MinangSatu di Google News

Ingin Mendapatkan Update Berita Terkini, Ayu Bergabung di Channel Minangsatu.com