PITUAH KUCIANG I

Pituah Kuciang I

Oleh: Bahren*

         Tigo ikua kuciang sadang duduak santai di ateh atok rumah pak dusun. Sambia mancaliak rancak nyo bulan panuah di malam nantun. Sikua anak kuciang baciloteh ka induak e. Iyo ancak pulo manjadi bulan panuah ko agak e mah Mak, kato e ka induak kuciang. Ba’a dek baitu kato kau? Tanyo amak e. Ba’a ka indak ancak dek Amak, kok awak mancaliak bulan panuah ko bara basanang hati kito ko, talabiah lai urang-urang nan duduak di tapi lawik tu Mak a. caliak lag lagak jo kucindan e wakatu bulan panuah ko. Raso ka habih samalam ko dek e untuak baduo-duo sajo inggo pagi tibo.

         Ondeh naaaak, usah lah kau bacito-cito pulo manjadi bulan panuah, nak oi. Indak koh Kau tau, kok datang awan nan itam, ditutuik e bulan nan panuah tu, urang-urang nan tadi duduak di tapi lawik tu, abih tabang lari bahambuan. Takuik nan balabiah dek inyo wakatu itu, kok datang sajo ujan labek dek ulah awan itam nan manutuik bulan panuah ko. Lai kolah baguno juo kau lai, kalau lah tatutik dek awan? Indak kan?

         Kok baitu Mak, manciloteh pulo anak kuciang nan lain, bialah den manjadi awan nan itam sajo, bia nak den tutuik sagalo sisi langik nangko, tamasuak bulan nan panuah tu. Bia den patakuik urang-urang nan duduak di tapi lawik tu, nak sugiro inyo pulang ka rumah. Urang-urang nan lah lupo jo wakatu itu.  Ops.. jan baniak pulo Ang manjadi awan itam lai yuang. Ang sangko lamak manjadi awan itam tu. Indak lah tabayang dek Wa’ang kalau awan itam tadi jikok datang angin limbubu? Bacarai barai badan ang yuang, dek ulah limbubu mahantam badan diri Ang. Alah koh talok dek Ang manantang limbubu nantun. Iyo indak talok dek Den doh mah. Usah angin limbubu lai Mak, angin nan barambuih malam ko sajo lah mambuek paruik den sakik sarato saraso nak muntah.

         Hahaha, kok baitu kato Amak, mancaracau pulo anak kuciang nan nio manjadi bulan panuah cako. Awak nak manjadi angin limbubu, Bia awan-awan nan itam tu awak lando kasadonyo, urang-urang nan tadi takuik dek galok awan itam tadi kumbali sanang atinyo dapek mancaliak bulan panuah. Ma nyo awan itam cako… bia den ondoh kalian kasadonyo, kato anak kuciang nan bacito-cito jadi bulan panuah tu. Kini ko awak indak lai manjadi bulan panuah, awak lah manjadi angin limbubu. Hahahahaha.

         Hus… alah tu… usah kalian manciracau juo, kini ko kalian nikmati sajo lah sia kalian kini, Danga dek kalian carito Amak. Kok kalian bacito-cito manjadi limbubu, indk koh kalian bapikia, kalau limbubu tu indak ado aratinyo kalau di hadang dek gunuang tinggi nan  ado di muko tu? Limbubu tu ka manjadi ancua barantakan dek bukik nan gadang tu.

         Pasti, kalian nio pulo manjadi bukik nan gadang tu, bia kalian bisa pulo mahadang kueknyo limbubu nan lah mancabiak-cabiak awan nan itam tadi. Iyo kan? Sabalun bacito-cito nan mak kian, kalian pikia kan juo lah nasib bukik di ujuang tanduak kabau. Kok tanduak kabau lah gata, mako indak ado bukik nan kareh dek tanduak kabau tu, sakali antam kanai tanduak mako balubang-lubang lah bukik tu dek tanduak kabau tu.

         Sasudah mandanga nan bak nangko, mako kalian pun Amak pikia akan manjadi kabau nan punyo tanduak, bia kalian bisa sasuko ati mananduak bukik nan gadang sarato tinggi nantun. Sakali lai, usah lah nak. Pasan amak, bapikia dan taruih lah bapikia, Kalau kabau lah cukuik umua dan indak bisa lai dibaok untuak ka mangarajokan sawak sarato ladang, mako ujuang pisau jadi tantangannyo nak, kalian kan dibantai dan dibuek manjadi randang.

         Jadi randang? Kan ancak tu mak, banyak urang nan suko jo randang ko, sampai-sampai randang ko dinobatkan manjadi makanan nan paliang lamak sadunia. Indak koh sero dek Amak tu, banyak urang nan basuko ati dek gara-gara mamakan randang. Awak kabau se lah mak, bia kalau un lah mati dagiang wak masih bisa mnjadi randang. Lamaaaaak,

         Nak… kok ang manjadi randang, indak talatakkan di tampek nan batua, mako kalian harus siap-siap badan diri kalian di cilok dek mancik, kalian ka manjadi santapan sarato makanan nan sangai di suko pulo dek Mancik. Kalian indak jadi bisa mambuek urang sanang hati. Tapi samantang pun baitu, kalau kalian baraliah pulo bacito-cito manjadi mancik! Lupokoh kalian baso mancik tu nan awak buru satiok malam. Sainggo urang rumah ko indak bapikia-pikia panjang maagiah kito makan satiok pagi, karano awak lah mahalau mancik nan ado di ate rumah ko? Jadi kok lah jadi kuciang yo jadi se lah kuciang nan elok nak oi. Jan bacito-cito pulo manjadi nan lain. Mak…Mak.. kok awak manjadi…        Alah mah.. lalok lah lai, ijan manjadi-manjadi nan lian juo pangana kalian lai.    

*Dosen Sastra Minangkabau Universitas Andalas