PANGAJARAN BAHASA MINANGKABAU

PANGAJARAN BAHASA MINANGKABAU

Oleh: Lindawati*

Urang dikatoan pandai suatu bahaso apobilo inyo bisa bakomunikasi dalam bahaso tu untuak babagai kaparaluan iduiknyo saari-ari, baiak itu untuak komunikasi dalam rumah, ditempat bakarajo atau ditampek nan lainnyo. Sorang ibu nan bakarajo misalnyo, dikatoan bisa babahaso Minangkabau apobilo inyo bisa bakomunikasi jo bahaso Minangkabau jo anggota keluarganyo; jo anak, laki, atau jo urang-urang sakaliliannyo. Jo anak misalnyo, mulai dari manjagoan anak, manyuruah anak mandi, manyuruah pai sakola, sampai anaknyo nan lalok tu jago lo baliak, nyo mangecek jo anaknyo tu jo bahaso Minangkabau. Jikok anaknyo sakik, nyo bisa ka pasa atau ka apotik untuak mambali ubek atau mabaok ka dotor dan mangecek jo bahaso Minangkabau jo urang apotik atau dotor.  Kok di kantua atau tampek   karajo, nyo bisa bakomunikasi jo pegawai lain jo bahaso Minangkabau. Baitulah saindaknyo sacaro praktis urang dapek dikatokan mampu atau bisa babahaso Minangkabau.

Untuak dapek manggunoan bahaso sacaro wajar, urang arus bakompeten dalam duo hal yaitu punyo kompetensi linguistik jo kompetensi komunikasi. Nan dimakasuik kompetensi linguistik adolah pengetahuan nan bakaitan jo masalah bahaso apokoh itu nan takaik jo: sistem pelafalan (fenem), leksikon, dan gramatika (morfologi dan sintaksis) dan nan dimakasuik jo kompetensi komunikasi adolah pengetahuan nan bakaitan jo masalah pamakaian bahaso sacaro tapek (wajar, sasuai jo situasi). 

Pangajaran bahaso Minangkabau untuak anak-anak Minang dimakasuikan  untuak manolong anak-anak mudo masuak lebih dalam ka kebudayaan Minangkabau. Untuak itu, bahan pengajarannyo paralu dirancang sacaro khusus. Salain maajaan tuturan arian, paralu pulo diajaan tuturan dalam bantuak kiasan, apokoh itu pameo, pituah atau mamangan. Tuturan bakieh tu tantu nan berisi ajaran nilai-nilai moral, tata krama, dan aturan adat paralu diajaan ka anak-anak Minang. Pengajaran bahaso jo bahan aja nan bantuak itu mungkin dapek mambantu urang Minang mampu dan sakaligus sadar jo kebudayaannyo.

Ciek lai, kecakapan bahaso nan diparaluan adolah kecakapan badialoh. Komunikasi sehari-hari balangsuang dalam bentuk dialoh. Untuak dialoh saari-ari, urang Minang mungkin indak paralu diajaan, tapi untuk dialoh formal bantuak dialoh pasambahan mungkin paralu diajaan di sakola-sakola. Keterampilan lisan mangecek-ngecek jo bahaso Minangkabau tu didapeknyo sacaro alami, indak malalui proses formal (belajar). Nan paralu saketek diajaan baa manggunoan bahaso Minangkabau tu sacaro elok jo batua, sainggo indak malangga sumbang kato (sumbang tanyo atau sumbang jawek).

Peribahasa dalam bantuak mamangan sarupo ‘duduak surang basampik-sampik, duduak basamo balapang-lapang’ punyo makna kieh (konotatif). Peribahasa ko manganaan kito baso karajo barek akan taraso ringan kalau dikarajoan sacaro basamo-samo.  Pasan nan tasimpan dalam mamangan ko adolah supayo urang atau masyarakat manggalang karajosamo untuak  bisa manyalasaian karajo-karajo barek atau karajo gadang.

            Mamangan sarupo iko biasonyo ditutuaan dek urang nan arif sasudah mancaliak seseorang atau sakalompok ketek urang lah gagal manyalasaian karajo nan gadang. Mamangan ko ditutuaan untuak maaja atau manganaan urang-urang nan lah gagal tu supayo bakarajo samo jo urang lain untuak dapek manyalasaian karajo nan gadang tu. Mamangan ko ditutuaan indak jo ati berang do, tapi labiah dalam suasana mambatin (prihatin)  mancaliak ado nan tabangkalai. Mamangan ditujuan ka saluruh urang nan hadir tampa ado raso berang ka urang tatantu.

Bahan aja bahaso Minangkabau dalam bantuak peribahasa nan sarupo iko bisa diajaan di babagai janjang pendidikan, mulai dari sakola dasar sampai ke perguruan tinggi. Nan paralu dibedaan adolah kedalaman pembahasannyo. Di sakola dasar saindaknyo murik mampu manutuaan peribahasa ko sacaro batua dari segi intonasi dan saketek aratinyo. Kalau di janjang pendidikan manangah paralu pemahaman arati kato-kato nan mambantuak peribahasa tu. Karano peribahasa Minangkabau tu sampirannyo banyak dibantuak dari kato-kato nan ado di alam sekitar, pembahasan arati kato juo bafungsi untuak mandakekan anak didik ka alam sakaliliang nan dugurui masyarakaik Minangkabau.

Salain arati kato, pembahasan juo paralu manganai nilai moral nan diajarkan dek peribahasa tu. Untuak mahasiswa di perguruan tinggi, pembahasan paralu labiah dalam  sarato labiah tajam. Kajian paralu mambahas tantang filosofi nan takanduang  dalam peribahasa tu,  bilo peribahasa tu ditutuaan dan  sia nan manutuaannyo.

Pembuatan bahan aja nan baragam dan rasional untuak babagai janjang pendidikan dan babagai keperluan paralu bapadoman ka kurikulum nan disusun. Hal nan paralu ditegaskan dalam kurikulum pengajaran bahaso Minangkabau adolah kompetensi dasar minimal nan arus dicapai dek pembelajar sasudah baraja. Silabus disusun sasuai jo kondisi dan kebutuhan. Dengan adonyo otonomi (Mardeka Baraja) tu, silabus disusun dengan mampatimbangan hal-hal sebagai berikut: (1) baraja bahaso diarahan untuak maagiah porsi latihan babahaso nan nyato; (2) ketrampilan babahaso nan nyato manjadi tujuan utamo; (3) tatabahasa diajaan sabagai panduan dasar untuak mambatuaan kasalahan ujaran atau kalimat; (4) pengajaran kosa kata diutamoan kato-kato nan tapakai saari-ari.

Takaik jo pangajaran tata bahasa Minangkabau, kito paralu mamacik babarapo prisip: (1) baraja tata bahasa sabagai latihan manggunoan sarato mamahami bahaso nan bamakna sasuai jo kaparaluan komunikasi. Untuak itu paralu diagiah latihan nan taruih manaruih dalam babagai situasi kebahasaan nan bamakna. Latihan sarupo iko diagiahan untuak mandukuang tacapainyo kompetensi linguistik jo kompetensi komunikasi sacaro sakaligus; (2) pangajaran tata bahasa terintegrasi dalam pangajaran ketrampilan babahaso. Contoh-contoh kalimat nan diagiahan aruslah nan paguno bardasarkan pamakaiannyo, baiak sacaro reseptif maupun produktif. Jo caro iko, babagai ragam bantuak jo fungsi tuturan bisa diajaan; (3) baraja tata bahasa indak paralu sasuai jo tahapan sacaro linguistik, fonologi, morfologi dan sintaksis, tapi sacaro basamo-samo tapadu dalam sebuah wacana nan kontekstual, fungsional, bamakna, sarato bamanfaat. Kok baitu, dapek dipahami baso silabus pangajaran bahaso Minangkabau sabagai bahaso daerah bisa dikambangan sacaro kreatif dengan mampatimbangan kamampuan dasar anak didik jo tujuan nan andak dicapai.

*Dosen FIB Unand