HOME LANGKAN KATO

  • Sabtu, 3 Juli 2021

Pancasila, Pati Ambalau Kebhinnekaan (5, Abih)

Pancasila (ilustrasi grid.id)
Pancasila (ilustrasi grid.id)

Pabcasila, Pati Ambalau Kebhinnekaan (5, abih)

Oleh TE Radjo Boedjang

Alhamdulillah, Pancasila pun marakek kebhinnekaan sampai kini. Sajarah mancatat, sungguahpun bakali-kali tarancam dituka, namun Pancasila masih sakti. Batuah. 

Padohal variabel nan mambuek Pancasila ko bisa dituka urang, sangeklah banyak. Mudah bana untuak urang lalu maalieh jalan. Dak sulik dek urang manggaleh manuka cupak.

Kebhinnekaan adolah titiek lamah, tapi karano tuah Pancasila warna-warni tu manjadi pamanih. Walau dek gegara warna-warni itu pulo, banyak lo kumbang cinto bungo, sahinggo tiok sabanta diugah-ugah. Tiok cacah diintai-intai. Kok sempat talengah, di sinan biso bajalan!

Kamungkinan itu, kian ari kian banyak. Daolu urang mandanga radio lutuik di ladai-kadai. Kini radio lutuik rami di medsos. Tiok datiek radio lutuik tu babunyi, lansuang masuak saku.

Medsos lah kanamoe, apopun masuak di situ. Ibarak muaro, medsos adolah limpahan sagalo ayie dari ulu dan sapanjang alirannyo. Sarok-sarok pun bagaduru, tibo di lawik dunia maya.

Mako dari itu, tugeh BPIP untuak mambumikan Pancasila ibaraik mambarasiahan batang ayie dari ulu. Baa supayo ayie janieh di ulu. Upayokan sapanjang alirang batang ayie tak ado sarok dilantiangan ka sungai. Barasiehan tapi ayie. Kok lah banyak luluak, karuak sacaro berkala.

Kalaluannyo bana lah tu kini, kok daolu ado panataran P4, mako jo caro kini butir-butir Pancasila tu sangaik paralu diajaan ka nan mudo-mudo. Jo caro kini.

Kok daolu ado BP7, kini ado BPIP. Kok daolu ado panataran P4 nan dilakukan sacaro masal dan wajib hukumnyo harus diikuik i dek warga negara, mako kini baa langkahnyo?

Lah jaleh kini dunia daring, online, mako tantu paralu dibuek panataran sacaro daring pulo. Medsos bisa dipakai untuak iko. Youtube bisa dioyak untuak manyebarkan video-video kreatif nan mamuek nilai-nilai Pancasila. Mungkin dalam bantuak film pendek, kuis, podcast, temu daring, dll.

Labieh khusus, takaik jo pambumian Pancasila tu, ado babarapo saran. Partamo, sacaro kelembagaan, BPIP paralu mambosek ka bumi. Jaan hanyo ado di Jakarta sajo, tapi di tiok propinsi paralu ado Perwakilan BPIP Provinsi.

Tugeh Perwakilan BPIP Provinsi tu adolah mangkoordinasian pambumian nilai-nilai Pancasila di daerah takaik. Adopun lingkuik koordinasinyo manyangkuik "materi ajar", pelatihan tukang aja (dulu namoe manggala), dan koordinasi pelaksanaan. 

Pitih koordinasi ado di Perwakilan BPIP Provinsi, tapi pitih pelaksanaannyo (produksi video, kegiatan offline, dll) ado di provinsi dan kabupaten/kota. 

Gunonyo ado Perwakilan BPIP Provinsi, supayo pambumian nilai-nilai Pancasila tu sasuai jo budaya daerah takaik. Sahinggo pambumian tu mambosek dari bumi. Jaan titiek dari langik sarupo nan dikarajoan dek BP7 daolu.

Salain itu, eseloneringnyo minimal setara jo Sekdaprov, supaya masin garam bakoordinasi. Tapi strukturnyo harus rampiang bana. Hanyo untuak bakoordinasi, cukuik limobaleh urang pejabat dan staf lah nah.

Kaduo, pambumian iko harus basifat otonomi. Otonomi dalam pelaksanaan (strategi, metodologi, dll). Sajalan pulo jo sumangaik otda.

Nan katigo, paralu partisipatif dalam manggali caro-caro nan sasui jo local content. Budaya daerah basangkutan lah nan ka mampakayo partisipasi. Tamasuak maikuik an tokoh-tokoh agamo dan adat dalam proses iko.

Nan kaampek, paralu disepakati target-target aplikasi dan capaiannyo. Ado ukuran sacaro nasional, sahinggo bisa diranking kinerja pembumian nilai-nilai Pancasila tu sacaro transparan dan taruih manaruih.

Dan, nan kalimo pambumian nilai-nilai Pancasila tu manjadi materi wajib di sakola-sakola, perguruan tinggi, aparatur negara, TNI/Polri, ormas, OKP sarato orpol. 

Akhienyo, singkek carito; pambumian nilai-nilai Pancasila tu bisa baiek tarupo hasienyo adolah kutiko variabel-variabel krusial nan diugah-ugah tiok sabanta tu dek urang lain, tak bapangaruah pado persatuan. Karano Pancasila adolah parakek nusantara. 

Pancasila adolah pati ambalau kebhinnekaan.


Wartawan : TE Radjo Boedjang
Editor : sc.astra

Tag :#Minangkabau #BahasaMinangkabau #EsayMinangkabau #Pancasila

Baca Juga Informasi Terbaru MinangSatu di Google News

Ingin Mendapatkan Update Berita Terkini, Ayu Bergabung di Channel Minangsatu.com