HOME LANGKAN KATO

  • Sabtu, 19 Juni 2021
Pancasila, Pati Ambalau Kebhinnekaan (3)
Pancasila (ilustrasi grid.id)

Pancasila, Pati Ambalau Kebhinnekaan (3)

Pancasila tu jalan mandata. Nan banamo WNI, rato kanai sadoe. Dak paduli apo bulue! Dak pandang mayoritas atau minoritas. 

Mako dak salah Kepala BPIP Yudian Wahyudi mangecek bahwa Pancasila tu 'mukjizat' untuak Indonesia. Bukan laknat.

Buktinyo, lah tauji babarapo kali Pancasila kadikacau, sampai kini lai masih aman. Walau memang paralu upayo-upayo sacaro zaman kini untuak mambumikannyo. Sahinggo kito sadar bahwa sacaro banegara pakai hukum negara. Bukan hukum agamo atau hukum adat!

Alhamdulillah, hinggo kini kasaktian Pancasila masih ado. Sungguahpun ado nan maugah-ugah, dan rakyat pun mulai ragu-ragu bahkan bareaksi di medsos, tapi lai masih sabateh maago-ago. Sabagian nan lain lai barani manenju di dalam kain saruang se nyoh. 

Namun iko bisa jadi bola salju. Bisa jadi bom waktu. Apolai bahayo laten tu hinggo kini masih sarupo api dalam sakam. Tak lakang dek paneh. Bahkan makin subur dek ujan.

Isu agamo jo demokrasi dan hak azasi manusia dijadian sanjato untuak manyasak-an negara supayo bajalan di barih paek nan nyo garih. Sadar atau tido, lah banyak garih urang tu nan kito paek. 

Antar agamo diparantuak-antuak-an. Urang saagamo dibalah-balah. Medsos pun jadi rami jo caci maki dan caruik bungkang. 

Ranah agamo sacaro batauhid dijadian ruang publik. Bahkan acok pulo jadi pamenan politik, dan ujuang-ujuangnyo negara tabaok rendong. 

Padohal tauhid adolah paham jo kayakinan surang-surang. Puncak tauhid, sacaro hakekat adolah aniang. Bana tagak sandirinyo. Allah, bana!

Mako, tatkalo urusan tauhid dipakatoan di lua ruang ati, iko baujuang manjadi saliang klaim. Saliang maraso bana surang. Nan lain kapie. 

Padohal, jauah-jauah ari para pendiri negara (the founding father) lah malantai sabalun luluih. Mako sila partamo Pancasila tu babunyi Ketuhanan Yang Maha Esa. Kulhuwallahu ahad! Titik di situ. Tak ado embel-embel. Supayo sadoe agamo nan diakui negara idak managak-an tauhid surang-surang. 

Nah, sia nan mangecek-an Pancasila dak ebat? Sila partamo tu lah jadi jalan tangah. Bukan jalan untuak mamacah-macah. Islam, Kristen, Katolik, Hindu, Budha dan Kong Hu Cu bisa pakai Ketuhanan Yang Maha Esa.

Nan manjadi panyakik kini, justru rumusan itu nan dicubo untuak dipatantangkan baliek. Islam nan mayoritas didorong untuak bangkik. Baa kok ka kalah pulo jo nan saketek du? Baitu ramuan siarak baka diserak-an. 

Bukankah kondisi itu bulieh dicaliek di sakarang kini nangko? Ado urang maraso bajihad, managak-an tauhid nan nyo yakini. Sagalo caro dipakai. Negara mulai ratak-ratak mantimun. Lah ado tando gabak di ulu!

Sarupo virus, ratak-ratak tu kian banyak. Mirip fenomena gunuang es. Dicaliek di ateh, ketek sajo. Ruponyo di bawah lah baurek baaka. Dak tangguang-tangguang gadangnyo. 

Itulah nan ditiliek dek Kepala BPIP Yudian Wahyudi. Agamo (bisa) jadi musuah gadang negara. Yakni kutiko tauhid dipakatokan. Tatkalo tauhid dibandiang-bandiang kan. 

Manokalo keyakinan nan hakiki--saharusnyo jadi puncak batauhid dan itu tagantuang ka raso surang-surang--dipakatoan, batal iman. Tiok kito punyo raso ba Tuhan. Skalanyo tagantuang paham surang-surang. Samantaro ilemu agamo hanyolah makanan utak. Kok lah tibo di ati, baru manjadi kayakinan. Di puncak kayakinan itu lah kito bisa marasoan ati tanang--husnul khotimah--sahinggo di ateh dunia pun kito marasoan sarugo; lapeh dari panyakik-panyakik dunia, kandak Allah samato nan ado.

Batauhid adolah pakaro batin. Dalam lawik dapek diduga, dalam ati sia nan tau? Karano itu, jan pernah maukue-ukue tauhid urang lain. Apolai maraso labieh ba Tuhan dari kawan.

Dalam kaitan itulah, mako jo kato-kato (frasa) Ketuhanan Yang Maha Esa sajo, lah langkok ganok untuak manyatuan paham baagamo di negara kito ko. Tak paralu ditambah-dikurangi.

Samantaro baagamo sacaro syariat, tantu tiok-tiok agamo punyo caro-caro peribadatan surang-surang. Bahkan, Islam nan mayoritas pun--untuak hal-hal tertentu, kilafiyah--dak pulo saragam praktek syariatnyo doh. Ado mahzab nan kito tarimo warihnyo.

Pangaruah budaya pun mawarnai karenek-penek peribadatan. Manigo ari, manujuah ari, dst, tamasuak mandoa pakai kumayan, itu pangaruah budaya se tu nyoh--Islam Nusantara; peribadatan yang dipangaruahi dek budaya, dan mungkin daolu manjadi caro dek kiyai jo ustaz untuak mangambangkan Islam di nusantara ko. Tak paralu pulo dicap kapie. Karano beda muslimin, musyrikin jo munafiqin tu di batin; roh dan jiwa yang marasoan adonyo Allah.

Karano itu, lah cukuik frasa Ketuhanan Yang Maha Esa untuak marakek kebhinnekaan baagamo. Marakek kebhinnekaan nusantara.


Wartawan : TE Radjo Boedjang
Editor : sc.astra

Tag :#Minangkabau #BahasaMinangkabau #EsayMinangkabau #Pancasila