HOME LANGKAN KATO

  • Sabtu, 12 Juni 2021
Pancasila, Pati Ambalau Kebhinnekaan (2)
Pancasila (ilustrasi grid.id)

Pancasila, Pati Ambalau Kebhinnekaan (2)

Oleh TE Radjo Boedjang

Walau kudian-kudian ko lah muncul baliek upayo untuak mampancasilakan masyarakat dan mamasyarakatkan Pacasila, antaro lain dengan adonyo BPIP, tapi nan maogah-ogah ideologi ko bukan makin ilang. Malah batambah.

Nan paliang baru, pakaro proses mem PNS kan pagawai KPK lah jadi lahan baru untuak maiduik an sumangek anti Pancasila.

Ujuang-ujuang tali yang sabanae saliang tapisah, dikaik kaik an. Apo hubuangan pagawai KPK nan idak luluih Tes Wawasan Kebangsaan (TWK) jo dikotomi Islam versus Pancasila?

Tapi, nan tajadi tu diterjemahkan dek babarapo urang sabagai bagian dari pengkerdilan KPK. Pembonsaian KPK. 

Padohal, sacaro banegara, lah ado perubahan UU KPK--UU 19/2019--nan maatur. Kok kini mararau, lah samo jo maratok-i sarok anyuik. Harusnyo, kutiko revisi tu sadang dibahas--kok nak iyo juo mampakyek KPK--pasal-pasal pengkerdilan tu dikritisi. Dibantah. Kalau paralu pakai demo atau mogok makan!

Kok kini, sacaro banegara, kutiko regulasi lah diundangkan, mako wajib hukumnyo dijalankan. Dan, siapo sajo yang maambek, samo jo malawan negara!

Tapi, nan tajadi, justru kini mararau. Ka Sijunjuang pun ratok, tak ka maubah regulasi. Kecuali disasak an wakil rakyat untuak marevisi.

Rarau itu, jadi makanan media. Breaking news baari-ari. Talk show di Youtube. Urang-urang pun mangaja click bait jo viewers dan watchtime. Nan rakyat pun binguang. 

Raso keadilan rakyat dieksplorasi. Soal-soal TWK bocor ka publik. Televisi jo media dapek mainan baru. Bantuak balita dapek adiek. Riang gembira nyo ma eksplorasi kajadian. Di pelosok-pelosok, rakyat badarai pun tapicu berangnyo. Pemerintah disalah-salahkan. 

Apolai nan dak luluih tu salamoko anak sayang media. Media darling. Bantuak ka kiamek ari karano urang-urang tu dak luluih. 

Bahkan jurnalis-jurnalis ebat pun mangunyah isu ko lumek-lumek. Sabagian mungkin karano mangaja click bait jo viewers dan watch time, bukan tak mungkin ado pulo nan punyo hidden agenda!

Gegara dikunyah-kunyah taruih, sarupo gulo-gulo kajai, manihnyo lah abih dimuncuang. Inyo-inyo tu pun mambuek balon jo bibie. Lambuang-lambuang gulo-gulo kajai. Kelok lilin pun dialieh, mangaa kok Pancasila dibandiangkan jo Al Quran?

Lupo kawan tu jo kaji konteks. Konteks ujian TWK adolah wawasan kebangsaan. Bukan pakaro tauhid. Sadangkan keimanan itu sendiri, hal nan paliang pribadi (very-very persona). Hanyo kito sorang jo Tuhan nan tau, sajauah mano kadar tauhid kito. 

Sungguahpun paralu dirunuik baa proses soal dibuek. Sia nan mambuek? Ado kok mekanismenyo? Ado kok kisi-kisinyo? Dan karenek-penek nan takaik, sampai soal tu jadi, paralu ditiliek elok-elok. 

Kok lah basuo, baru di situ bisa didalami; ado kok indikasi penyimpangan nan by design? Baitu sataruihnyo, sampai tarang bak ari, taduah bak ujan.

Salain itu, pakaro luluih tak luluih. Paralu ado tim independen untuak mamaresonyo. Iyo kok dak luluih? Atau basingajo dak maluluihkan? Dan sataruihnyo, sahinggo jaleh atah jo bareh.

Tapi, nan tajadi dan nan ditiliek didalami kok pakaro Pancasila jo Al Quran? Apo iko dak rekayasa komunikasi untuak maiduik an api antaro rakyat Indonesia nan mayoritas Islam jo negara ko?

Bayangkan kok nan mayoritas ko tapicu puncak berangnyo. Lah kabakuhampeh kito sasamo anak bangsa nah. 

Di titiek iko lah sabananyo, Kepala BPIP Yudian Wahyudi manyabuik agamo (bisa) jadi lawan Pancasila. Dan iko lah nan tajadi tatkalo ado kawan-kawan kito di KPK dak lolos TWK, ujuang-ujuangnyo muncul dikotomi Pancasila-Al Quran itu. 

Maju pikiran pak Yudian ko sabanae. Alum takilek, lah takalam dek liau. Takilek ikan dalam ayie, lah tantu jantan batinonyo.

Dan paten pulo respon Ketua KPK Firli Bahuri. Liau lantik labieh saribu pagawai KPK nan lolos seleksi jadi PNS pado tanggal paringatan hari layie Pancasila. 

Ntu baa lai? Baa pulo tanggapan kito takaik babarapo urang nan dak luluih jadi PNS di KPK tu nan maajuan uji materi ka MK?

Urang-urang nan bamakasuik mancabiek-cabiek bangsako, pasti akan mamanfaatkan isu iko untuak malanjuik an upayo maugah-ugah Pancasila tu. Kok gagal uji materi, MK pun dianggap dak adie. 

Akhienyo saroman jo bajakak jo anak ketek. Manang salah. Kalah apolai.

Padohal, sacaro banegara sasuai ideologi Pancasila, satiok warga negara samo derajat di mato hukum. Kok ado salah negara gegara aturan nan dibuek, lah pas jalannyo mangadu ka MK. Kok di sidang-sidang tu isuek bisa dibuktikan UU 19/2019 tentang KPK tu memang manyalahi konstitusi paliang tinggi (UUD 45) berarti juo menyalahi Pancasila, kito tarimo pulo putusan MK tu. Atau sabaliekyo.

Baitu Pancasila maatur perikehidupan kito jo ideologi nan bisa ditarimo sacaro saragam dek bangsa kito nan baragam-ragam ko! Karano Pancasila adolah konsensus dari keberagaman nusantara, mako ideologi ko idak balawan dan atau idak bapihak ka suku apopun. Pancasila idak balawan dan atau idak bapihak ka salah satu dari anam agamo nan diakui negara. 

Pancasila tu balaku untuak sadoe WNI. Balaku sa nusantara. Kebhinnekaan diakui negara. Tapi sacaro banegara, tunggal ika!


Wartawan : TE Radjo Boedjang
Editor : sc.astra

Tag :#Minangkabau #BahasaMinangkabau #EsayMinangkabau #Pancasila