PAI AMPOK PULANG ABAN

Pai Ampok Pulang Aban

Oleh: Vizia Sepnita Saputri (Mahasiswa Sastra Minangkabau FIB Unand)

Katiko pulang dari pasa sasudah manggaleh, Ayah tibo-tibo berang-berang indak jaleh, ntah apo nan tajadi di Ayah, sahinggo Ibu manjadi cameh mancaliak Ayah. Sabananyo Ibu ingin batanyo ka Ayah, apo nan tajadi dek Ayah hari ko. Dek Ibu takuik untuak batanyo ka Ayah, apo nan tajadi di Ayah, sahinggo Ibu tapaso manunggu kalau Ayah alahindak berang lai, baru Ibu ka batanyo ka Ayah.

Ndak lamo Ayah berang-berang indak jaleh, Ayah pun duduak di kursi sambia muambiak angok, dan Ibu bagageh ka dapua untuak muambiak ayia untuak Ayah. Dan saat tu emosi Ayah lah agak radah, dan di situ Ibu batanyo ka Ayah jo lamah-lambuik untuak mananyo-an apo nan jadi sabananyo di Ayah.

Dek Ayah ko, lah babarapo hari ko Ibu caliak Ayah suko bana berang-berang indak jaleh, kan lai lancar jo Ayah manggaleh, kadai kan lai rami juo kan Yah? Tanyo Ibu ka Ayah jo lamah lambuik. Kutiko Ibu batanyo, Ayah mulai diam, antaro maleh jo indak manjawek tanyo Ibu. Dan sambiah maminum ayia yang dibaok-an Ibu, Ayah manjawek tanyo Ibu dengan nada yang kurang semangat, beko lah Bu, Ayah sadang latiah bana kini Bu.

Dek mode tu caro Ayah mangecek, Ibu diam dek kecek Ayah tadi. Ayah mandi dulu Bu, angek-angek badan Ayah Bu, kecek Ayah ka Ibu, dan dek Ayah ingin ka mandi, Ibu siap-siap manyadio-an ayia mandi untuak Ayah.

Indak lamo dari tu Ayah siap mandi, dan tibo-tibo Ayah duduak baliak, dan sambia mamikia-mikia. Di situ Ibu curiga, mantuaknyo ado nan tajadi sasuatu ka Ayah. Ingin rasonyo Ibu batanyo baliak, tapi takuik kalau Ayah maaliah-an tanyo Ibu baliak.

Dek hari samakin laruik malam, Ibu manyuruah Ayah makan, katiko sadang makan, Ibu mambarani-an diri untuak batanyo ka Ayah baliak. Dek aa Ayah, apo masalah nan tajadi Yah, carito lah ka Ibu agak saketek Yah, jan lah Ayah suruak-suruak-an masalah Ayah tu ka Ibu, Ayah manjawek kecek Ibu nan mode itu, ndak baa do Bu, mungkin dek Ayah kurang sehat nyo Bu. Ndak usah Ayah baduto ka Ibu, rono muko Ayah tu tau Ibu Yah, kalau Ayah kini sadang ado masalah.

Dek raso heran Ibu samakin dalam, dan Ibu tarui-tarui juo batanyo ka Ayah tiok sabanta, akhirnyo Ayah bacarito ka Ibu apo nan tajadi babarapo hari ko jo jua bali Ayah sadang badagang.

Mode ko Bu, salamo ko Ayah bukannyo ndak nio bacarito jo Ibu do, tapi Ayah ndak nio ko jadi beban do Bu, mangkonnyo Ayah maleh muagiah tau nyo ka Ibu. A bana nan tajadi sabana e yah? tanyo Ibu ka Ayah. Masalahnyo kini Bu, lah maleh rasonyo Ayah manggaleh  Bu, baa tu Yah, kecek Ibu ka Ayah.

Galeh kini ko raso-raso nyo lah acok pai ampok pulang aban Bu, baa tu Ya, indak mangarati Ibu jo kecek Ayah do, kecek Ibu ka Ayah. Giko Bu, Ayah lah babarapo hari ko manggaleh pulang modal jo nyo Bu, ndak ado hasil yang labiah do Bu untuak wak manabuang Bu, salabiahnyo habis untuak mambali keperluan wak untuak galeh Bu.

Lah payah Ayah bausaho Bu, hasilnyo ndak ado do Bu, percuma rasonyo wak badagangnyo Bu, tapi ndak ado panghasilan do Bu, pulang modal ko apo bana lah, habis barang lah untuak mambali barang jo liak Bu, dek tu lah Bu salamo babarapo hari ko Ayah berang-berang tarui Bu, ndak tahan dek Ayah do Bu, lah panek-panek badan Ayah Bu, tapi tetap jo mode ko tarui Bu. Ndak tau Ayah caronyo lai Bu, ndak talok dek Ayah mode ko tarui do Bu.

Tu baa lai Yah, namonyo badagang pasti ado untuang jo rugi ma Yah, ndak usah di sesali Yah. Razaki tu lah di atur sadonyo dek Allah Yah. Kalau niek Ayah baranti badagang, jo awak jo anak-anak ka mkan Yah, hasil badagang tu lah nan bisa wak kumpuan walaupun saketek Yah, yang penting wak bisa iduik Yah, wak bisa makan.

Jalani jo kini Yah, apopun nan tajadi pasti ado jalan kaluanyo nyo Yah, tatap samangaik untuak badagang Yah, demi kahidupan wak sakelurga Yah, yo Bu, demi Ibu jo anak-anak pasti Ayah tarui samangaiknyo Bu, nan penting Ibu jo anak-anak do'akan lancar tarui karajo Ayah, kecek Ayah ka Ibu, Iyo ya, tu lah pasti jo ma Yah, Ibu pun mambaleh kecek Ayah tadi.

Ko lah di kecek an jo nasib Bu, iduik ko payah mati pun payah lo Bu, nan kini ntah apo nan tajadi Bu, ntah sia yang mambuek ulah mode ko Bu, sahinggo ndak ado dapek untuangnyo badagang dek Ayah lai Bu, biasonyo lai ado untuak agak saketek untuak awak manabuang, nan kini payah rasonyo Bu.

Baa itu jo lah Yah, bisuak Ibu ikuik jo Ayah badagang, siapo tau Ibu bisa manolong-nolong Ayah bisuak, dan siapo tau ntah ado dapek untuangnyo bisuak Yah. Kok baa itu kecek Ibu tu baa lai, tu keinginan Ibu, kok lai tabantu lo Ayah dek Ibu.

Pai ampok pulang aban, ampok ialah asal katonyo yaitu malantiak atau maampok, sadangkan aban ialah manimpo. Maksud kato pai ampok pulang aban ko biasonyo diguno-an untuak urang-urang badagang. Yang hanyo pulang modalnyo sajo dalam badagang.

Jadi, pai ampok pulang aban ko bak cando pai malantiang pulangnyo manimpo, yaitu padagangan yang hanyo pulang modal, indak ado untuang dan indak juo rugi, yang diparolehnyo hanyo latiahnyo sajo. Dan biasonyo di ucapkan katiko berang sambari malantiang apo sajo. Lah basusah payah bausaho, hasilnyo indak ado atau bisa dikecek-an malapeh hao.