PACU UPIAH

Oleh: Satya Gayatri*

          Pacu upiah marupokan pamainan anak-anak tradisional di Minangkabau. Pamainan iko nan kayo makna sarato manfaatnyo. Upiah dijadikan alat untuak bamain barupo palapah daun pinang nan alah tua. Upiah nan digunoan ndak sumbarang upiah, tapi upiah nan alah kariang di pangka daunnyo sarato nan agak leba. Daun pinang nan alah tuo iko biasonyo ndak digunokan lai, tapi dapek dimanfaatkan jadi alat bamain.

          Caro bamain pacu upiah iko ado nan bafungsi manariak upiah, ado nan duduak di upiah. Nan duduak bapacik untuak bagantuang wakatu kawan maelo upiah. Biasonyo nan duduak di upiah bajumlah ciek atau duo urang. Kok nan manumpang badannyo ketek-ketek bisa juo labiah dari 2 urang. Untuak jumlah indak ado patukannyo, kok anak-anak bisa duduak ditampek nan tasadio sarato nan mairik upiah kuek maegangnyo, mako bamain bisa ditaruihan. Nan paralu diparatian adolah keamanan, kasalamatan, sarato raso kagembiraan.

          Pamainan pacu upiah kok diparatian ado manfaatnyo dek anak-anak. Permainan upiah maajak anak-anak bagaua jo kawan sarato labiah dakek jo alam tampek tingga. Mulonyo bamain upiah indak untuak dilombaan, tapi digunoan daulunyo dek kakak maajak atau mangasuh adiak sambia bamain. Supayo adiak sanang bamain dikasuah jo caro diduduakan di ateh upiah, kudian diegang daunnyo. Jadi bamain iko mancaliakan kasih sayang kakak ka adiak. Supayo indak panek manggendong digunoanlah upiah untuak mambaok adiaknyo. Katiko kakak bakumpua samo gadang sambia mangasuh adiak diadoanlah lomba nan sifatnyo sederhana tapi mambuek sanang hatinyo.

          Tambah pulo pamainan pacu upiah manambah kakompaan anak-anak. Inyo kompak mambagi posisi masiang-masiang sasuai jo kemampuan saroto kondisi fisik nan ikuik dalam painan iko. Nan maa untuak maegang upiah sarato nan maa pulo nan cocok untuak duduak di upiah. Ndak mungkin anak-anak mamiliah nan maegang upiah nan babadan ketek, tapi dipiliah nan badan gadang sarato punyo tanago nan kuek. Babeda nan untuak nan duduak, diusahoan mancari badannyo nan ketek supayo ringan untuak diirik.

          Lah sudah satu putaran biasonyo anak-anak iko bagantian posisi supayo marasoan pulo naiak di ateh upiah. Kok nan duduak di upiah badannyo gadang mako diegang sacaro basamo supayo samo-samo marasoan kesanangan. Dari caro iko, nampak toleransi sarato kakompaan sasamonyo.

          Dek ado manfaat pamainan iko rancak bana diajak baliak anak-anak bamain di lapangan. Salain fungsinyo untuak bamain jo keakraban anak-anak pamainan iko baguno pulo untuak malatiah kakuatan fisik.

          Di bawah iko adolah photo lomba pacu upiah nan diadokan di objek wisata Pantai Gandoriah Pariaman. Lomba iko diadoan basamo-samo jo Pemko Kota Pariaman dalam rangko Hari Anak Nasional Tahun 2023 jo Hari Keluarga Nasional Ka-30. Tampek Pantai iko diambiak salain tampeknyo aman untuak bamain pacu upiah dek di ateh pasia tambah pulo tampek iko lokasi bawisata dek anak-anak.  

*Dosen Sastra Minang FIB Unand