Nagari Bukik Suruangan

Nagari Bukik Suruangan

di Luhak Tanah Data

Oleh   Bahren*

Alai Alai tabang ka alai, tabanglah pipik duo tigo. Kaba lah lamo tabangkalai, kini diulang-ulang pulo. Apokoh kaba nan ka diulang, diulang kaba jo curito. Curito tantang asa jo usua ba'a nagari banamo Bukik Suruangan. Ado lah pado satu hari datang lah mahadok ka datuak Rajo Sulaiman, Surang padusi banamo Zuriati nan karajo di Unand Padang. Adopun Datuak Rajo Sulaiman manjadi Katua Karapatan Adat Nagari wakatu itu. Batamu lah Zuriati wakatu itu pado tanggal tigo baleh di bulan Mei duo ribu tujuah di balairuang adat Bukik Suruangan patamuan ko tajadi nyo.

Bacarito malah Mak Datuak Rajo Sulaiman, Baa kok nagari banamo Bukik Suruangan. Baco malah elok-elok simak kan malah baiak-baik, biko malah curitonyo. Kutiko niniak jo moyang kami, urang Bukik Suruangan mulai mambukak sawah jo paladangan langkok jo tanah tampek tingga. Niniak kami mandapek-i sabuah bukik nan kaciak, bukik kaciak tampak tagak surang nan indak ado bakawan. Dek karano bukik tu tatagak surang mako dibarilah namo daerah tu jo Bukik Suruangan. Ado pulo curito nan lain, baa kok nagari ko banamo bukik suruangan. Karano bukik nan tampak tadi lataknyo tampak tasuruang agak ka lua indak doh sajajar jo bukik nan lain yang ado di nagari ko. Mako banamo lah nagari ko jo bukik Suruangan.

Dek karano nagari lah tambah rami, mako di buek lah balai-balai untuak ka tampek patamuan adaik. Tampek nan dibuek balai-balai nantun dibari namo jo Balai-Balai. Limbak nan dari pado itu, di nagari Bukik Suruangan ko ado lah surang tuo. Orang nan banamo Laiang. Mako daerah tampek nyo tingga tu kini dibari namo Silaiang. Inggo sakarang kini nangko tampek tingga Si Laiang di arah ka bawah dibari namo Si Laiang Bawah. Daerah sakitaran tampek tingga Si Laiang di bagian Ateh dibari namo Si Laiang Ateh.

 Ado pulo sabuah kampuang di sakitaran Bukik Suruangan nan banyak tumbuah batang manggih. Alam takambang jadi guru, apo nan tampak manjadi sabab mako dibari lah namo kampuang nan banyak batang manggih tadi, manjadi Kampuang Manggih. Sabuah lai kampuang di siko nan ado pasa nyo. Dibari malah namo kampuang ko Pasa Usang sabab banamo pasa usang karano pasa ko malah pasa nan lamo. Baa bana dek baitu ado pulo pasa nan lamo, pasti basabab jo karano. Adopun sabab pasa ko lamo karano urang batambah rami, indak doh cukuik pasa ko ciek mako di buek lah pasa nan baru. Tampek pasa nan baru babuek nantun, dibari namo jo Pasa Baru.

Itulah curito nan di dapek dari Mak Datuak Rajo Sulaiman. Curito ko indak doh dikarang-karang baitu sajo. Tapi sungguah curito ko lah baliau dapek dari daulu dari niniak moyang liau. Itu nan taruih disampaikan ka anak cucu kami. Tiko ditanyo tantang curito nan duo tadi ma curito nan paliang dipicayo, mako manjawek lah Mak datuak curito nan partamo manjadi curito nan diyakini bana dek kami kini ko. Kalau pun curito ko ado bana nyo bana nan datang dari Allah. Allah ta;ala kayo sungguah, tampek baimpun sagalo ilimu. Jikok nyo ado curito nan salah, Salah nan datang dari ambo, ambo nan hanyo manusia tampek nyo salah jo gawa bakumpua. Ka pado Tuhan kito mintak ampun, ka pambaco ambo mintak maaf, maaf di mintak banyak-banyak bia nyo abih sakalian doso.

               *Dosen Jurusan Sastra Minangkabau FIB Unand