HOME LANGKAN KATO

  • Sabtu, 8 Mei 2021
Mardeka Baraja, Nan Buto Paambuih Lasuang
Merdeka Belajar (ilustrasi.internet)

Mardeka Baraja, Nan Buto Paambuih Lasuang

Oleh TE Radjo Boedjang

Idak salah mande manganduang, takadie Tuhan nan manjadikan. Dak ado induak nan nyio baranak ongok. Satiok ayah nyio baranak santiang.

Tapi, kecek guru-guru di dalam kelas, dak tiok murik santiang baretong. Ado murik nan piawai badendang, tapi di suruah mangarang nyo dak bisa.

Ado murik campin malukih. Tiok lakuak manjadi gambar. Ado pulo murik nan kancang balari. Diagiehan bolakaki, sampai mugarik nyo dak nak kalua dari lapangan.

Namun, antah dimaa malang talatak. Nan dietong hanyo murik pandai mangali jo mambagi. Nan dipanggak an hanyo murik nan ebat fisika jo biologi. 

Nan juara kelas, itulah murik kasayangan. Ciek diaja, tigo dapek. Samantaro murik nan piawai badendang, jarang-jarang dapek pujian. Kok lai kalai, wakatu paringatan tujuah baleh agustus, jadi anggota paduan suaro lagu-lagu perjuangan.

Itu daolu. Tapi daolu sakali tak baitu doh. Di zaman Engku Syafei di INS Kayutanam, tiok murik dapek tampek sasuai jo potensinyo. Nan ka malagu, bulieh dan diagieh bana mik ka murik tu. Nak bapuisi jo mangarang, pupuah bara talok. 

Di INS Kayutanam, satiok murik mardeka mangambangkan potensi nan nyo punyo. Idak samato baraja tulih-baco, baretong dan palajaran-palajaran nan text book itu sajo. Murik-murik di INS Kayutanam diajaan untuak mancari dan manggali potensi diri!

Di Taman Siswa (Tamsis), Ki Hajar Dewantoro lah biaso maagieh "ruang bebas" untuak murik manggali dan mangambangkan potensi diri. Makonyo di Tamsis tu dak tiok wakatu guru di muko (ing ngarso sung tulodo). Tapi bisa jadi kawan diskusi untuak murik (ing madyo mangun karso). Bahkan acok jadi motivator alias pandorong sajo di balakang (tut wuri handayani).

Kok ditiliek caro Engku Syafei di INS dan Tamsis, murik lah nan jadi pusek proses belajar mengajar (PBM). Student centris istilah luanyo. Bukan teacher centris!

Dalam konteks student centris, tiok murik mambaok ebat sorang-sorang! Tak ado nan ebat, dan tak ado pulo nan santiang. Inyo ebat manuruik ukuran masiang-masiang. 

Tiok murik ebat manuruik ukuran jo potensi nyo surang-surang. Tak bisa dibandiang-bandiangkan antaronyo. 

Ebat nan sangat personal. Itulah potensi diri. Potensi personal. Tiok murik punyo potensi surang-surang. Tiok potensi baragam-ragam.

Karano baragam-ragam itu lah, mako Engku Syafei dan Ki Hajar Dewantoro mambukak ruang laweh-laweh supayo potensi tu tagali maksimal. Itulah hakikat pendidikan; mengoptimalkan potensi murik sasuai jo "kapasitas terpasang" nyo surang-surang.

Prinsip pendidikan nan sarupo itu, sasuai pulo jo pituah kito di Minangkabau. Nan buto paambuih lasuang. Nan pakak palatuih badie. Nan lumpuah pauni rumah. 

Aratie bana, satiok kito punyo potensi surang-surang. Dak bisa dibandiang-bandiangkan!

Dak bisa dibandiangkan "nan buto" jo "nan lumpuah" atau jo "nan pakak". Bahkan antaro samo-samo "nan lumpuah" sajo pun dak bisa dibandiangkan!

Surang murik hanyo bisa dibandiangkan jo "kapasitas terpasang" surang-surang. Umpamo oto paangkuik barang, lai kok bisa dibandiangkan oto pick up jo oto engkel? Atau oto puso jaan dibandiangkan muatannyo oto tronton!

Oto pick up, kok lah bisa maangkuik barang 3 ton, itulah sapuluah pontennyo nah. Tapi, kok oto engkel hanyo bisa maangkuik 3 ton, lah pasti ado nan salah di oto tu nah. 

Mako, jaan dicaliek pendidikan sacaro politik! Banyak kapalo daerah nan berang kutiko rengking para murik di daerah tu, kalah dari daerah lain? Padohal, jaan ka antar daerah, antar murik sajo bukan untuak dibandiang-bandiangkan lantaran "potensi personal" nyo jo "kapasitas terpasang" nyo baragam-ragam.

Kok kadirengking juo sakola-sakola dan daerah-daerah, musti diawali jo "pemetaan potensi dan kapasitas terpasang" para murik. Lakukan pemetaan, baru diukue.

Silakan lah mulai dari tingkek nagari (desa), kecamatan, kabupaten/kota dan propinsi dilakukan pemetaan tu. Rato-rato potensi di tiok sakola per desa (nagari), dst itu lah nan jadi acuan untuak diukue. Itu lah padannyo!

Nah, apokah sakola gagal, atau berhasil itu tagantuang jo jarak (gap) antaro rato-rato input jo output. Samakin ketek gap, makin ebat sakola. Dst.

Dalam karangko itulah kito praktikkan mardeka baraja! Salamek mamparingati Hardiknas.


Wartawan : TE Radjo Boedjang
Editor : sc.astra

Tag :#Minangkabau #BahasaMinangkabau #EsayMinangkabau #MardekaBaraja