Makna Di Balik Tradisi Mangaruak Nasi Kuniang Dalam Pernikahan Minangkabau

Makna di Balik Tradisi Mangaruak Nasi Kuniang dalam Pernikahan Minangkabau

Oleh: Andika Putra Wardana

Di tangah kameriahan pesta parnikahan adaik Minangkabau, ado ciek prosesi nan unik jo panuah makna, yoitu Mangaruak Nasi Kuniang. Tradisi ko bukan hanyo sakadar upacaro, malainkan sabuah simbol nan maajaan tantang paran jo tangguang jawab dalam kahidupan barumah tanggo. Pado prosesi ko, kaduo mampelai akan mancari potoangan ayam panggang nan disabuik singgang ayam nan taandok di dalam nasi kuniang. Bagian ayam nan ditamukan punyo arti tasendiri dalam parjalanan rumah tanggo kaduonyo.

Katiko prosesi ko dimulai, marampulai jo anak daro duduak bahadokan samo sapiriang gadang nasi kuniang di mungko kaduonyo. Dangan tangan kosong, kaduonyo haruih mengaruak nasi sampai  manamukan potoangan ayam nan taandok di dalamnyo. Bukan indak ado alasan, nasi kuniang malambangkan kasajahteraan jo kabahagiaan, sadangkan proses "mancari" diartian sabagai parjuangan dalam mambangun rumah tanggo. Satiok pasangan diingekan kalau kabahagiaan indak tibo bagitu sajo, malainkan haruih dipajuangan basamo.

Bagian ayam nan ditamuan dek mampelai pun punyo filosofi mandalam. Misalnyo Kapalo ayam, nan malambangan kapemimpinan. Jikok pangantin laki-laki manamukannyo, itu patando kalau inyo akan manjadi kapalo rumah tanggo nan bijak jo batanggung jawab. Sadangkan sayok ayam malambangan pangayoman jo parlindungan. Jikok anak daro yang mandapekannyo, itu manandoan kalau inyo akan manjadi bini  nan panuah kasiah jo siap mangayomi kaluargonyo. Ado pulo dado ayam, nan malambangan katulusan jo kasiah sayang di dalam rumah tanggo, baitu pulo paho ayam, nan malambangkan kakuatan dalam mahadokan tantangan hiduik basamo.

Manuruik Mardhiyah, saurang budayawan Minangkabau, tradisi Iko indak hanyo manjadi hiburan dalam prosesi parnikahan, tapi juo marupoan bantuak pelajaran untuak pasangan baru. "Mangaruak Nasi Kuniang adolah caro urang Minangkabau maajaan calon laki jo bini tantang kahidupan barumah tanggo. Ado usaho, ado parjuangan, tatapi pado akhianyo akan ado kabahagiaan jikok kaduanyo bakarajo samo," keceknyo.

Sairiang pakambangan zaman, tradisi Iko masih acok dilakuan, tarutamo di daerah nan masih kuek mamegang kuek adaik Minangkabau. Tapi, di babarapo tampek palaksanaannyo mulai jarang taliek. Padahal, tradisi Iko banyak manyimpan pasan moral nan sangaik baguno di kahidupan, bahkan dalam kahidupan modern sakalipu. Dalam sabuah parnikahan, indak cukuik hanyo dangan cinto sajo, paralu pamahaman, karajo samo, jo kasadioan untuak babagi paran supayo rumah tanggo bisa bajalan harmonis.

Malestarian Mangaruak Nasi Kuniang bararti manjago warisan laluhua nan punyo banyak makna. Tradisi iko bukan hanyo sakada prosesi adaik, malainkan carminan filosofi hiduik masyarakaik Minangkabau nan manampekan kasaimbangan antaro laki-laki jo padusi dalam rumah tanggo. Dangan manjago jo manaruihan tradisi iko, ganerasi mudo Minangkabau indak hanyo marayokan budayonyo, tatapi juo baraja bagaimano mambangun kahidupan rumah tanggo nan kokoah, panuah pangertian, jo harmonis.