HOME LANGKAN KATO

  • Senin, 18 Oktober 2021
Iklan Layanan Masyarakat
Carito

Iklan Layanan Masyarakat

Oleh: Sonezza Ladyanna*

Kopid-19, Korona, Kopid sambilan baleh manjadi ota dima-dima sataun balakangan ko. Manjadi viral kecek urang kini. Banyak nan dak bisa dikarajoan dek ulah panyakik ko. Banyak aturan baru bahkan kebiasaan pun timbua nan baru dan dak hanyo di nagari awak tapi di seluruh penjuru dunia ko, new normal istilah dunia-nyo, kebiasaan baru kecek pemerintah negara kito.

Anak-anak baraja online, nan dak bisa bainternet, bolak baliak ka sikolah manjapuik maanta tugas, baraja di rumah sajo. Kok ka pai ka musajik, kadang saf jarang-jarang, pakai masker, kadang musajik ditutuik dek ado nan sakik. Sangkek rayo nan daulu, dak buliah pulang kampuang. Kok ka pai marantau jo kapa tabang, iduang dipareso jo panyucuak ketek, swab namonyo. Harus alah paksin, kok paksin ado pulo aturan. Kok sakik, dak bisa paksin, sulik pulo untuk bisa pai jo kapa tabang. Kok jo oto atau bus, lamo di jalan, kadang harus swab dan vaksin pulo. Dunsanak kito nan ba rumah makan, kok dak bajalanan manggaleh online, pakai ojek online, dak buliah barami-rami. Bakurang pendapatan. Banyak lai kok ka disabuik.

Dek karano itu, tantulah awak sadonyo bakandak, mamohon nak pai lah Kopid ko capek-capek. Bakiroklah Kopid ko. Baa caronyo? Tantu usaho kito basamo. Dak sudah dek pemerintah sajo. Banyak iklan layanan masyarakat dilatak-an dek pemerintah dima-dima. Isinyo tentang baa caronyo bak awak dak kanai dek Kopid ko. Awak diimbau tuak acok mancuci tangan, misal ka masuak rumah, bantuak niniak-niniak awak maaja awak dulu. Satiok pintu kadai urang, pintu kantua, bahkan pintu mall, tasadio tampek mancuci tangan lengkap jo iklan layanan masyarakat caro mancuci tangan. Iklan ko lengkap jo gambar.

Iklan layanan masyarakat ko dibuek baragam, ado nan pakai bahaso Indonesia, ado nan bahaso Inggirih, dan ado bahaso awak, bahaso Minang. Nan bahaso Minang, bantuak dibuek dek Semen Padang ko “Covid-19 #jansampaimanjala, Pareso ka Puskesmas tadakek bilo: Salemo, Batuak, Mandamam, Sasak angok, Pulang malala (dari daerah nan ado wabah), Bakontak (jo urang nan datang dari daerah ado wabah), #janlupobasuahtangan”.

Ado pulo iklan layanan masyarakat di daerah Agam nan isinyo “Nan harus dikana: Indak buliah bakumpua-kumpua, Tagak harus manjarak dari urang, Tutuik iduang jo muncuang kalau pai kalua (pakai masker), Acok-acok basuah tangan jo sabun, Jan pulang kampuang dulu, Paresoan badan kalau pulang dari rantau, Tanang-tanang sajo di rumah dulu, Mati beko kalau mada juo”.

Dek Kopid ko, lah ado pulo mukasuik baru dari aerobic. Nan kito tau sabalunnyo, aerobic ko jenis senam yang baguno untuak malancaran dan maningkekan aliran oksigen ka otot dan jantuang kito. Sajak kopid ko, istilah ko punyo kepanjangan baru yaitu “aksi gotong royong bersih Covid-19”. Iko ado dalam iklan layanan masyarakat di wilayah Pasa Nanggalo, Padang. Takah iko iklannyo “Posko aerobic-19 (aksi goro bersih covid-19),Kecamatan Nanggalo Kota Padang Provinsi Sumbar, Mari kito karajoan , Jago jarak fisik, Jan duduk di siko”.

Ado pulo iklan layanan masyarakat ko bahasonyo dicampua. Mukasuiknyo, bak mangaratih kasado urang, indak mangaratih sajo tapi paham sapaham-pahamnyo dan nio marajoan isinyo. Nan penting bana, mangarajoan apo nan dihimbau dalam iklan layanan masyarakat tu. Iko contoh nan bahasonyo bacampua, “Penerapan New Normal di Pasar rakyat, Saat ka masuak pasa, badan dalam kondisi sehat dan pakai masker, Ukua suhu badan, Cuci tangan jo sabun samo aia yang mangalir/ handsanitizer, Jan bakarumun, jan basalaman, jajo jarak min 1 meter, Pedagang wajib pakai masker jo saruang tangan katiko manggaleh, Pangujuang dilarang mambukak masker katiko di dalam pasa, Kalua pasa cuci tangan baliak, (Pasa Pakan kamih Tilatang Kamang)”.

Dima-dima banyak iklan layanan masyarakat tentang Kopid ko. Tiok malangkah, tasarobok jo iklan layanan masyarakat ko. Iklan layanan masyarakat ko dibuek batujuan untuak maingekan awak supayo awak maikuikan patunjuak nan ado sahinggi awak talinduangi dari sagalo macam panyakik dan marabahaya. Samantang baitu, jan dilupoan ancaman panyakik nan lain, misalnya TBC nan babahayo juo dan mudah manular. Iyolah agak kurang iklan layanan masyarakat tentang TBC ko. Padahal, Indonesia ko tamasuak negara yang kasus TBC tertinggi di dunia, kiro-kiro jumlah orang nan jatuah sakik dek TBC mancapai 845.000 dengan angka kematian sebanyak 98.000 atau samo jo 11 kematian/jam (WHO Global TB Report, 2020).  Subana babayo.

Samantang dima-dima banyak iklan Kopid, jan dilupoan himbauan lain aturan dalam berkendara. Jan lupo pakai helm kok ka baonda-onda sabaa kecek iklan “aspal tu dak lunak bagai do” dan himbauan-himbauan lai. Baco elok-elok himbauan nan ado, ikuti peraturan yang ado. Rambu-rambu lalu lintas. Sado alah nyo dibuek untuak awak, untuak keselamatan iduik awak.

*Dosen Sastra Indonesia Unand

 


Wartawan : Sonezza Ladyanna
Editor : bahren

Tag :# Langkan # curito #minang