- Sabtu, 23 Januari 2021
Datuak Marajo; Pinang Pulang Ka Tampuaknyo (1)
Datuak Marajo; Pinang Pulang ka Tampuaknyo (1)
Oleh TE Radjo Boedjang
Syahdan, tatkalo daolu, sabalun alun barabalun. Tasabuik lah pulau paco, nan didiami urang usali.
Di sinan lah badiam Datuak Marajo, sarato anak kamanakan. Iduik bakalompok bapindah-pindah. Alun barabalun lah kanamoe.
Mako tibo baliau Angku, Sri Maharajo Dirajo. Kutiko manampak Gunuang Marapi Sagadang Talue Itiek dari ateh kapa di tangah lawik, Angku jo rombongan manapi. Konon di Pariangan Padang Panjang kini, nan maso itu adolah pantai. Basuo jo urang pribumi, kaum Datuak Marajo.
Tasabuiklah padusi nan bak bungo rancak, Indo Jalito namo baliau. Gadih jolong gadang, nan ditunggu Datuek Marajo untuak ka sampiangan.
Di sinanlah sajarah bamulo. Indo Jalito tapikek dek buruang nan baru tibo. Datuak Marajo tak kuaso mamaso. Raso kasieh mambunuah berang. Mauruik dado sajo maliek bungo disuntiang urang.
Sarupo nan lah kito danga. Katurunan Angku Sri Maharajo Dirajo iko lah nan manjadi rajo. Tamasuak katurunan Cati Bilang Pandai nan manyuntiang Indo Julito sasudah Angku Sri Maharajo Dirajo mangkat.
Tasabuiklah Angku Nan Batigo--Datuak Katumangguangan, Datuak Prapatieh Nan Sabatang jo Datuak Sri Maharajo Bamego-Mego--nan manyusun adaik caro basuku bakaum, bakorong bakampuang, badusun banagari.
Ditambah Karajaan Pariangan nan lah ado, adaiknyo dibuek dek Angku Sri Maharajo Dirajo--kudian tatanan adaiknyo disabuik Lareh Nan Panjang--ado ampek kalarasan nan dipakai di wilayah Minangkabau. Tapi tak ado adaik nan dibuek Datuak Marajo!
Tak hanyo itu. Datuak Marajo pun ilang kaba. Lanyek. Kudian dicaritoan jadi legenda, baliau jadi rajo di nagari Bunian!
Kok diasumsikan curito tambo, warih nan bajawek pusako nan ditarimo adolah hal yang batue-batue tajadi, mako nan kito jalani kini adolah warih dari Angku Sri Maharajo Dirajo dan Nyinyiek Indo Julito malalui buah pikie dari limo anak laki-laki baliau. Nan Datuak Marajo lah katapi, ilang dari sajarah!
Padohal, Datuak Marajo adolah kapalo suku pribumi. Urang usali! Kok idak lah bulieh disabuik alah limau dek binalu, saidak-idaknyo bulieh dikecek an "lah katapi biduek" Datuak Marajo sajak kutiko itu.
Ari baganti ari, bulan baganti taun. Lah sakian generasi, hinggo sampai ka zaman nan sakarang kini nan ko.
Adolah H Mahyeldi, nan bagala Datuak Marajo dari Suku Pisang, Gaduik Tilatang Kamang, bapasangan jo anak mudo dari Solok--Audy Joinaldi nan bagala Datuak Rajo Pasisie Alam dari Suku Balaimansiang, VI Suku, Solok--sasuai kaputusan KPU Sumbar dinyatokan sabagai pamanang dalam Pilkada Gubernur Sumbar 2020.
Sungguahpun masih ditunggu hasil Perselisihan Hasil Pemilu (PHP) yang lah diregistrasi di Mahkamah Konstitusi (MK) namun tulisan iko bukan mukasuik untuak mandaolui, tapi kok diasumsikan Datuak Marajo manang, mako "pinang lah pulang ka tampuaknyo", "sirieh lah pulang ka gagangnyo".
Baa toh di nan kini, sambie manunggu putuih sidang di MK sarancaknyo baliau Datuak Marajo maniliek soko nan basandang. Dipareso ka kaum, dipareso ka nagari. Ditiliek ciek-ciek, supayo dapek tuah soko.
Kalaluannyo bana lah tu kini, kok iyo Datuak Marajo nan gadang basa batuah, ibaraik rajo lah baliau ko--maangkek rajo sakato alam--lah supakaik alam mamintak, in Sya Allah baliau nan ka mamimpin Sumbar. Jadi "rajo" di alam Sumbar. Bulieh dikecek an jadi "rajo" di alam Minangkabau.
Editor : sc.astra
Tag :#MahyeldiDtMarajo #SejarahMinangkabau
Baca Juga Informasi Terbaru MinangSatu di Google News
Ingin Mendapatkan Update Berita Terkini, Ayu Bergabung di Channel Minangsatu.com
-
BAHASO DAN IDENTITAS
-
SAPO
-
LEGITIMASI ATAS MITOS DAN FIKSI
-
IBU KU GURU PERTAMA KU
-
HABIH ADAIK BAKARILAAN
-
MEMANUSIAKAN MANUSIA: KUNCI KEBANGKITAN KABUPATEN LIMAPULUH KOTA
-
LEBARAN, LIBURAN DAN KEMACETAN
-
STRATEGI PENGATURAN PEMAJUAN KEBUDAYAAN SUMATERA BARAT (BAGIAN TERAKHIR DARI TIGA TULISAN)
-
PADANG KOTA KULINER DUNIA
-
PRESKRIPSI PEMAJUAN KEBUDAYAAN DALAM KONTEKS SUMATERA BARAT (BAGIAN KEDUA DARI TIGA TULISAN)