HOME LANGKAN GARAH

  • Rabu, 3 April 2019

Amba Layak

Garah
Garah

Amba Layak

Oleh: Bahren*

Sasudah malapeh rangah jo panek di Kelok duo puluah satu. Ado sakitaran satangah sampai sa jam lamonyo Si Man Iriak jo Piak Onjai di situ. Lah salasai pulo makan jo minum, langkok mangulek nan ketek-ketek, mako di iduikkan lah onda mio dek Si Man. Sabalun bajalan, Si Man kumbali batanyo ka Supiak Onjai.

Iyo alah indak baa paruik upiak?

Lai indak maloyo lai piak?.

Indak da.. indak ado maloyo li da.

Pek lah wak bajalan li

Mako di gaih lah dek Si Man Iriak onda mio ko

Dari kelok duo puluah satu inyo taruih ka Matua, sampai di Matua nyo kelok an onda nyo ka kida taruih ka arah puncak Lawang, Di antarao parak tabu jo kilang tabu inyo palambek jalan onda nyo, sambia sakali-kali ma engong suok jo kida mancaliak ijau jo rapek nyo parak tabu. Ampia sampai di puncak lawang, inyo baranti sabanta. Sambia manunjuak ka arah ateh si Man bakato ka Supiak

Itu…itu… caliak dek upiak dan di ateh tu… tu nan puncak lawang tu piak, kato si Man

Oooo. Jadi itu puncak nan banamo puncak lawang tu da

Iyo…iyo itu nan puncak lawang…

Dari puncak tu kito bisa mancaliak rancaknyo Danau Maninjau

Di puncak itu pulo urang acok bamain paralayang

Tajun payuang, nan payuang e indak bulek.

Takah pak tentara nan acok wak caliak tiok tujuah baleh agus wakatu wak ketek-ketek dulu. Atau kutiko ulang tahun kota, acok bana wak caliak atraksi tajun payuang tu. Tapi kini alah jarang, bahkan indak ado wak mancaliak nan sarupo itu li piak.

Nah da…

Wak lanjuik jalan ka Kik Tinggi li da, beko malam bana ari da, indak jadi wak mancaliak aia mancua di jam gadang, panorama Ngarai si Anok jo Lubang Japang. Tapi ka taruih pulo bamain sabanta di Ngarai Sianok kato uda.

Jadih… naiak lah upiak, uda iduiak an onda li. Lah di iduik kan onda mio tadi dek Si Man, di gaih ma arah ka Kik Tinggi. Indak bara antaro nyo sakitaran satangah jam lah sampai si Man di Simpang Padang Lua, dari simpang tu, nyo belok ka kida taruih ka arah jambu aia, Dari Jambu Aia lanjuik ka ateh arah ka Jam Gadang, sampai dakek biosko sovia di balakang Hotel De Hill, belok ka suok, bantiang ka kida senek, langsuang masuak ka pakir bawah Ramayana, di pakir onda nyo di sinan, bajalan lah Supiak jo Siman ka jam Gadang.

Iyo subana rancak jam gadang ko kini yo da..

Lah bantuak-bantuak di lua nagari nampak dek upiak

Iyo piak… sabana rancak kini

Bantuak aia mancua di dakek menara kamba di Malaysia nampak dek uda

Tapi nan di siko agak ketek

Alah tu da. Nah wak caliak nan lain li. Dih nah, mo lah kito ka tampaik lain, tapi, sabalun ka tampaik lain, nah kito sumbayang ashar dulu di Musajik Raya dakek kabun binatang. Sasudah sumbayang si Man jo Supiak pun baliak ka arah jam gadang taruih ka ramayana pai mambiah onda nyo nan di pakir di situ. Dari tampek pakir Si Man jo Supiak taruih ka panorama ngarai Sianok, jo lubang japang. Sabalun ka panorama dikaja an juo dek Si Man jo Supiak tadi mambali tahu jo bakwan ka dikulek-kulek tiko di panorama.

Sampai di panorama, dicari lah tampek dan agak sajuak jo pamanandangan nan ancak, sampai lah inyo di sabuah tampek nan rancak untuak duduak santai sambia mancaliak-caliak ka arah Ngarai Sianok. Sambia duduak dibukak lah balanjo tadi, bakwan jo tahu goreng. Di ansua mamakan bakwan jo tahu ko dek Supiak  jo Siman. Sadang asik-asik makan datang lah sagarombolan baruak ka arah inyo. Supiak mulai takuik, duduak e di ansua ka dakek si Man. Takuik upiak da, banyak na baruak e. Indak bagai juo doh piak, nyo kan mancari makan se tunyo, beko manjalang pai wak agiah lah inyo bakwan jo tahu ko.

Indak doh da… ijan tunggu beko.. kini se lah uda agiah. Upiak takuik da, talabiah mancaliak nan gadang tu da a, tajam caliak e ka wak da. Agiah lah da, tu pai wak lai, pai ka Ngarai Sianok. Takuik iak da…

Adih nah, ma asoi tadi… di ambiak e dek si Man Iriak bakwan jo tahu ko sakawik di loncek an nyo ka arah baruak nan banyak tadi, barabuik lah baruak ko mamparabuik an bakwan jo tahu tadi. Bitu baruak barabuik Siman jo Supiak lansung bagageh nio pai.

Tibo-tibo sikua baruak nan paliang gadang mancaliak tajam ka arah nyo. Siman bagageh ma iduik kan onda dan ma gaih onda e ka arah Ngarai. Dakek simpang pical Sikai tampak juo baruak nan gadang tadi, Makin takuik supiak dibuek nyo. Onda di gaih makin kancang, tibo di simpang ampek dakek panurunan ka arah Ngarai si Man pun maluncua ka arah ngarai onda di gaih makin kancang di panurunan. Tapek dakek pintu kalua lubang Japang dakek ngarai nan baruak gadang tadi lah mancogok pulo, sambia mamacik bakwan jo tahu nan di agiah dek Si Man jo Supiak tadi.

Supiak samakin takuik, Si Man Pun samakin cameh indak picayo, manga juo baruak ko mangaja den lai ko kato Si Man dalam hati, onda taruih di gaih arah ka Koto Gadang, tibo di simpang arah ka koto gadang Si Man lanjuik sajo ka arah simpang panta bia dakek ka arah matua tu langsuang ka maninjau, simpang manggopoh dan lanjuik ka simpang basoka. Itu bana agak ati Si Man jalan nan ka di tampuahnyo.

Samakin kancang onda di gaih, samakin capek pulo lompek jo lari baruak tadi, inggo di pandakian manjalang simpang panta, baru lapeh dari simpang Koto gadang nan ditakuik an dek Si Man tajadi, onda nyo indak talok mandaki karano pandakiannyo talalu tinggi jo panjang. Angok-angok I onda mio si Man katiko mandaki.

Baa lai ko da, baruak tadi di bulakang wak da, kini ndak sikua nyo lai da, lah anam ikua nyo di bulakang wak da, mamacik bakwan jo tahu tadi ka anam ikua e da. A nan salah dek awak ko da mako di kaja nyo awak dek baruak tu. Tanang piak, tanang bia uda bapikia sabanta. Alun sempat si Man bapikia, datang sikua baruak nan paliang gadang mamacik bahu si Man sambia mancaliak garang ka arah si Man, kaki si Man manggaretek, si Man Mulai saban-saban, pipis e mulai kalua satitiak-satitiak dek katakutan.

Pacik baruak tadi makin kancang mangguncang bahu Si Man, si Man Makin cameh supiak lah bitu pulo, sambia babisiak baruak tadi ka talingo Si Man. Da…., ma lado jo saus tahu jo bakwan ko da Amba Layak raso e da, indak lamak doh…. Amba… amba ….amba … lai jaleh kato si baruak tadi.

 

 

*(Dosen Sastra Minangkabau FIB Unand )


Wartawan : Bahren
Editor : Bahren

Tag :# Langkan # Garah # Minang

Baca Juga Informasi Terbaru MinangSatu di Google News

Ingin Mendapatkan Update Berita Terkini, Ayu Bergabung di Channel Minangsatu.com