HOME LANGKAN GARAH

  • Selasa, 9 April 2019

ALNIDEGADA

Garah
Garah

ALNIDEGADA

Oleh: Bahren*

Indak taraso alah sa pakan sajo Si Man Iriak tibo di tanah jawa, tapeknyo di Jakata. Inyo sampai di situ di japuik dek Gindo Apuak, jo oto sedangnyo nan baru sajo di balie bulan nan lapeh. Sapanjang jalan Si Man, bacurito lah ka Gindo Apuak tantang kajadian, taih bik e dilarian dek urang nan indak nyo tau. Sambia galak sengeang jo manahan kapacak ayia mato, Gindo Apuak bapasan ka Si Man. Ko nan Jakata Man, alun manga-manga lai, lah di uji e Angku dek kahilangan taih bik. Iyo Puak, lah dapek gambaran ambo Puak, tapi nan Apuak harus tau, bak pameo rang gaek-gaek kito dulu, urang Minang ko pandia nyo sahari nyo puak, labiah sahari, nan bisa di jua di jua dek e Puak. Iyo Man, tapi nan sahari tu langsuang dapek dek angku Man. Sambia galak-galak, nan oto ko lanjuik juo ka rumah Gindo Apuak.

Sasampai di rumah Gindo Apuak, Si Man di agiah baju nan baru untuak basalin, Sasudah basalin jo makan minum. Mako dibukak lah curito ko dek Si Man Iriak, asa mulo niat pai marantau ka Jakata. Salain dek niat nak marubah nasib, Si Man mangiro dek ari ka puaso tu langsuang pulo bajawek jo rayo, Kok lai amuah razaki di Jakata, mangko nyo dicubo pulo lah ma aliah langkah jo parantauan ka Jakata. Sasudah mandanga jo manyimak a bana niat jo mukasuik si Man, Mako timbua lah usul jo arah dari Gindo Apuak untuak si Man Manggaleh ketek-ketek tapi langkok. Istilah di kampuang nyo galeh kumango kato rang kampuang Si Man jo Gindo Apuak.

Galeh nan ado di kadai Gindo Apuak, di ambiak dek si Man sagalo saketek. Mulai dari panitik jo pinjaik, cukuik jo Kapicuik sarato kapua baruih. Banang jaik indak lah lupo. Galeh nan lain baitu pulo, diambiak di tampek kawan Si Gindo Apuak, tapeknyo di kadai Si Am. Sikek gigi jo odolnyo, sikek abuak jo sikek kutu. Kabek rambuik sagalo saketek. Langkok juo lah galeh Si Man.

Dek lamo lambek di rantau, lah pandai pulo si Man babaso batawi, lah pasiah pulo kato lu jo gue kini dek Si Man Iriak itu kini. Tapi Samantang pun baitu, nan lu jo gue ko kadang-kadang bacampua juo jo baso kampuangnyo. Sakali wakatu si Man digaduah dek pareman di terminal Rawamangun, basicapek se Si Man mangecek, jan cubo-cubo lu manggaduah-gaduah gua lai. Beko gua, gua lu beko ta tilantang lu dek gua. Gua jan lu cobo-cubo. Mandanga kato Si Man tadi, tacengang-cengang malah pareman tu. Antah mangarati antah tidak, nan Si Man taruih sajo mangecek.

Salain, itu ado pulo lah di antaro kisah Si Man ko nan lainnyo. Kutiko inyo sampai di sabuah kadai, kadai tu banamo ALMAGADA, heran lah Si Man kutiko itu, a kolah mukasuik lapau tu. Bia indak lamo panasaran Si Man dalam hati. Mako batanyo lah Si Man langsuang batanyo ka nan punyo, a kolah mukasuik kadai tu mako banamo ALMAGADA, jo santai sajo nan punyo kadai manjawek ALMAGADA ko aratie Apa Lu Mau Gua Ada. OOO pampam, kato Si Man dalam hati, itu malah kiro nyo arati e kato-kato di kadai nantun.

Mako dek sabab karano itu, tapikia juo lah dek Si Man kini, walaupun inyo manggaleh pakai nyiru bulek, nan sagalo saketek ado dek inyo. Kok di buek pulo lak dari karateh karton manila di lakek kan pulo di nyiru ambo ko, namo kadai nan ambo baok  kian ka mari. Kok di buek pulo ALMADAGA, si Man Takuik di tuduah plagiat, walapun inyo indak pernah kuliah. Kok di buek jo baso Minang, indak tau urang nan banyak. Mako di pikia jo dicari-cari lah dek Si Man kato nan rancak untuak ka jadi merek kadai bajalannyo.

Sasudah, sumbayang luhua, lah salasai pulo minum jo makan sarato istirahat agak sabanta, antah ilham ko lah nan datang, antah petunjuk dari Allah. Allah ta’a la kayo sungguah. Tibo-tibo sajo Si Man tapikia dapek namo, nan cukuik rancak. Adopun namo nan ka diagiah untuk kadai bajalan Si Man ko banamo kadai ALNIDEGADA. Mako dibuek lah dek si Man Iriak pakai karateh karton manila, tulisan nan sangaik rancak bana, Batulih ALNIDEGADA.

Bisuak pagi nyo sabalun pai manggaleh, di pasang malah dek Si Man,merek kadai bajalannyo. Sambia manggaleh nyo basorak juo ALNIDEGADA…. ALNIDEGADA…. ALNIDEGADA. Dek acok bana Si Man basorak, batanyo malah Gindo Apuak ka Si Man. A nan basabuik tu Man? ALNIDEGADA… ALNIDEGADA… nan tadanga dek ambo. O itu…puak itu merek kadai bajalan ambo kini ko. ALNIDEGADA… aratie bana Apo Lu Nia Dek Gua Ada.

*Dosen Sastra Minangkabau FIB Unand


Wartawan : Bahren
Editor : Bahren

Tag :# Langkan # Garah # Minang

Baca Juga Informasi Terbaru MinangSatu di Google News

Ingin Mendapatkan Update Berita Terkini, Ayu Bergabung di Channel Minangsatu.com