Upacara Adat Kematian Dalam Tradisi Minangkabau

Upacara Adat Kematian dalam Tradisi Minangkabau

Oleh: Andika Putra Wardana

Upacaro adaik kamatian dalam tradisi Minangkabau adolah wujuik nyato dari parpaduan antaro adaik istiadaik jo ajaran Islam. Satiok tahapannyo punyo makna mandalam, indak hanyo sabagai panghormatan tarakhir untuak almarhum, tatapi juo untuak sabagai paingek akan nilai kebersamaan Jo solidaritas dalam masyarakaik Minangkabau. Tradisi Iko diwarihan turun-tamurun jo tatap dijago maskipun zaman taruih bakambang.

Salah satu prosesi awal dalam upacaro kamatian Minangkabau adolah "Maanta Kapan", yaitu tradisi nani di mano bako tibo maantaan kain kafan sabagai bantuak panghormatan tarakhir. Kahadiran bako dalam proses ko manunjukkan kalau dalam sistem kakerabatan matrilineal Minangkabau bako tatap punyo tangguang jawab tahadok sanak saudaranyo. Prosesi Iko juo manunjukan kalau kamatian bukan hanyo urusan kaluargo inti, tatapi juo tangguang jawab basamo dalam bamasyarakaik.

Satalah kain kafan disiapan, salanjuiknyo iolah Mancabiak Kapan jo Mandi Minyak, nan di mano janazah dimandikan Jo dikafani sasuai samo syariaik Islam. Dalam masyarakaik Minangkabau, proses iko umumnyo dipimpin dek tokoh agamo kayak imam atau labai. Ritual Iko bukan sakada formalitas sajo, tatapi juo sabagai simbol panyucian tarakhir sabalum almarhum dikambalikan ka tanah.

Sebalum pamakaman, ado prosesi palepasan janazah nan di mano kaluargo maminta maaf ataih kasalahan almarhum jo manyasalain hutang-piutang nan mungkin masih ado. Hal Iko manunjukkan kalau dalam budayo Minangkabau, urangtu indak hanyo hiduik untuak dirinyo surang, tatapi juo taikek dalam hubuangan sosial nan harus disalasaian dangan elok bahkan satalah Inyo maningga. Ssudah doa basamo, janazah dibaok ka tampek  paristirahatan tarakhir jo diiringi dek kaluargo samo masyarakaik.

Tapi, upacaro kamatian indak baranti sampai sinan jedoh. Ado sarangkaian ritual nan disabuik sabagai manigo hari,manujuah hari, maampek puluah hari, sampai maratuih hari sasudah kamatian. Tradisi ko batujuan untuak mandoakan almarhum sarato mampaarek silaturahmi antaro kaluargo jo masyarakaik. Pado hari katigo jo katujuah, kaluargo bakumpua untuak manganang almarhum Jo mangiriman doa.

Pado hari kaampek puluah jo kasaratuih, doa kambali dilakuan dangan harapan almarhum mandapek tampek terbaik di sisi-Nyo. Dalam babarapo  daerah di Minangkabau, tradisi Iko juo diiriangi dangan manyadioan makanan untuak tamu nan tibo. Tapi, esensinyo tatap samo yaitu sabagai wujuik panghormatan tarakhir jo ajang mampakuek ikatan sosial.

Upacaro kamatian dalam adaik Minangkabau manganduang filosofi nan mandalam. Tradisi ko maajaan kito tantang kebersamaan, kapedulian sosial, jo pantiangnyo manjago hubuangan antar sasamo, baiak dalam kahidupan maupun sasudah kamatian. Maskipun era modern banyak mambaok parubahan dalam kahidupan masyarakaik, tradisi ko tetap dipatahankan karano punyo nilai spiritual Jo sosial nan kuek.

Lewat upacaro adaik kamatianko, masyarakaik Minangkabau manunjukkan kalau kamatian bukan hanyo akhia dari sabuah kahidupan urang sajo, tatapi juo momen untuak mampaarek hubuangan dangan sanak saudaranyo. Dangan tetap manjago jo manjalankan tradisi ko, inyo indak hanyo manghormati laluhua, tatapi juo untuak mamastian kalau nilai-nilai budayo tetap hiduik dalam kahidupan sahari-hari.