Titian Binaso Lapuak, Janji Binaso Mungkia

Titian Binaso Patah, Janji Binaso Mungkia

Oleh: Bahren*

            Ba’a kok ndak datang Ang patang? Den lah manunggu Ang juo, di Simpang pasa Baru sajak pagi. Lah ampia duo jam Den manunggu Ang di lapau kopi tu. Nan Waang indak juo datang doh, iyo ndak bisa dipacik-an janji Ang nampak di den doh Pen, Kato si Am ka kawannyo tu. Jo santai sajo Si Pen, manjawek biaso tu nyo miang, titain biaso patah janji biaso mungkia. Biaso kecek Ang. Kok takah waang ko urang jo kawan den sadonyo iyo lah kacau duya ko mah Pen. Iyo-iyo, ang bari maaf lah den kok yo salah. Maaf mudah nyo miang, tapi kok bisuak ang mungkia juo baliak jo janjia ang ba’a pasti ang lang juo mamangan tadi baliak kan? Dek mandangan ota mereka baduo ko lah tagarak  lo dek ambo manulih kan ide nan ciek ko.   

            Mamangan adaik nan ado di judul di ateh mungkin jarang awak mandanga nyo. Mamangan nan acok kito danga bunyinyo iyolah Titian biaso Patah, Janji biaso Mungkia. Takah ota Si Man jo Si Pen tadi. Makonyo dalam tulisan kini ko ambo ingin babagi curito manga kok judul nan ambo tulih takah nan di ateh tu. Jikok urang minang taruih sajo mamakai mamangan titian biaso patah, janji biaso mungkia ambo bapikia urang akan samakin ma-anggap urang kito ko panduto jo khianat. Karano di pakuaik jo mamangan adaik nyo.

            Makonyo, dalam mancari apo bana nan sabananyo makasuik dari mamangan tu, batanyo-tanyo pulo lah ambo ka uran cadiak tau pandai di sakaliang ambo. Jawek mereka tu, ampia samo sajo. Nan acok tadanga dek awak kini ko iyo titian biaso, janji biaso mungkia tu. Tapi ado surang urang tuo nan lain nan ambo tamui justru manyentak pikiran ambo jo mamangan nan sarupo judul ambo tulih tu.

            Batanyo lah ambo ka baliau surah tantang mamangan di judul tadi. Bagulambek liau manyurahkan ka ambo. Jikok awak salalu mamakai pituah titian biaso lapuak janji biaso mungkia mako, awak dibuek manjadikan sagalo sasuatu nan salah itu manjadi biaso dan dianggap indak manjadi masalah. Tapi kalau awak mamakai mamangan Titian binaso patah mako, titian atau jambatan tampek maniti nan biaso digunokan dek urang lalu, akan binaso atau indak lai bisa dipagunokan kalau nyo alah patah. Bukan barati titian atau jambatan tu biaso sajo kalau lah patah.

            Baitu pulo samo janji, kalau lah awak suko mungkia jo janji, mako awak mangecek janji biaso mungkia. Makonyo mamangan nyo manjadi janji binaso mungkia. Aratinyo bana jikok awak alah bajanji mako janji tadi harus awak tapati. Ijan sampai mungkia jo janji. Banyak nan tajadi kini ko, awak caliak jo awak danga kalau urang lah bajanji salalu sajo mangatoan Insha Allah. Padoan kato-kato Insha Allah tu kuek ka iyo bukan kuk ka indak.             Jikok janji tadi indak ditapek-I, atau mungkia jo janji tu, mako binaso lah janji tadi. Binaso di siko di aratikan sabagai tindakan ingka jo janji nan alah dibuek. Jadi dari surah nan tadi tu, bana lah agaknyo kalau titian tu binaso sahinggo indak bisa dijadikan titian lai kalau nyo lah patah. Batiu pulo jo janji inyo akan binaso kalau janji tu lah mungkia.

Kalau lah ado surah nan bana sarato batua dari mamangan tadi, sungguah kabanaran datang dari Allah, Allah ta’ala kayo sungguah. Tampek ilimu bahimpunnyo. Jikok ado surah nan salah di mamangan tadi, salah nan datang dari ambo, ambo nan hanyo manusia tampek salah jo silap bakumpuanyo. Kapado tuhan Ambo minta ampun, kapado dunsanak nan mambaco maaf dipintak.

*Dosen Sastra Minangkabau FIB Unand