Takuik Suntik, Atau Takuik Mati?

Takuik Suntik, Atau Takuik Mati

Oleh TE Radjo Boedjang

Alhamdulillah, Presiden Jokowi pun disuntik vaksin Sinovac. Wakil Dokter Kepresidenan dr Abdul Muthalib nan tukang suntik. Acara penyuntikan vaksin Covid-19 perdana tu diadoan di Istana Merdeka, Jakarta, Rabu (13/1/2021).

Program Vaksinasi Covid-19 Nasional (PVC19N) pun mulai. Dan, Kamis (14/1/2021) para pejabat Forkopimda Sumbar pun disuntik. Dan Gubernur Irwan Prayitno dak jadi disuntik karano ado masalah kesehatan.

Alum juo pueh? Masih ragu-ragu? Padohal vaksin Sinovac ko lah kalua izin halal dari MUI. Juo vaksin Sinovac lah resmi dapek izin penggunaan darurat atau Emergency Use Authorization (EUA).

Tak hanyo itu, efikasi Sinovac ko 65,3 persen, labieh tenggi dari standar WHO 50 persen. Kepala Badan Pengawas Obat dan Makanan ( BPOM), Dr Ir Penny K Lukito, Senin (11/1/2021), sarupo dilansir Kompas.com,mengatoan efikasi vaksin Sinovac 65,3 persen.

Keceknyo, kaluanyo izin vaksin Covid-19 Sinovac iko sasuai jo data hasil pamantauan dan analisis dari uji klinik yang dilakuan di Indonesia. Juo manimbang data hasil uji klinik yang dilakukan di negara Brasil dan Turki.

Kecek Penny, dari data hasil uji yang berhasil dianalisis tanyato manunjuak-an vaksin Covid-19 Sinovac memiliki kamampuan mambuek antibodi dalam tubuah.

Adopun efikasi vaksin Covid-19 Sinovac, sasuai laporan dari pengujian di Turki adolah 91,25 persen, samantaro di Brasil 78 persen. Labieh tinggi dari efikasi di Indonesia.

Walau baitu, takaik beda dari duo negara tu, Penny menjalehan, hasil uji klinik vaksin Sinovac Biotech Ltd ko lah mamanuahi bateh supadan dari Organisasi Kesehatan Dunia (WHO), yakni efikasi paliang randah harus mancapai 50 persen.

Lanjuik Penny, efikasi nan 65,3 persen dari hasil uji klinik di Bandung tu manunjuak-an harapan bahwa vaksin iko bisa manurunan kajadian Covid-19 hingga 65,3 persen.

Untuak labieh jaleh, efikasi vaksin, manuruik WHO adolah kamanjuran vaksin nan dietong dalam presentase. Angko efikasi vaksin iko manunjuak-an kamungkinan panurunan insiden panyakik dalam kalompok yang divaksinasi dibandiangkan jo kalompok nan idak divaksinasi.

Nah, aratinyo, jikok kito divaksinasi jo vaksin Sinovac, mako kamungkinan dak talok dek virus covid-19 adolah 65,3 persen. Lumayan lah, daripado dak ado paambek virus nan lah baumue sataun labieh tu!

Aratinyo bana, jan sampai ado anggapan bahwa kok lah divaksin kito dak ka talok dek covid-19! Iko nan paralu bajaleh-jaleh dan batageh-tageh disampaian ka masyarakaik. 

Apolai lah sataun kito iduik dalam was-was jo takuik. Kamano-mano pakai masker. Ka musajik pun bailak-an, dek takuik barado dalam karumunan. 

Sungguahpun lah sataun kito jago jarak, tigo M, vaksinasi tu dak mutlak bisa maambek korona. Etong-etong nyo kan lah jaleh tu. Maa nan ancak 65,3 persen mungkin tainda dari korona, daripado nol persen?

Baa to di nan kini? Presiden lah disuntik. Para gubernur alah pulo. Bupati jo walikota baitu pulo. Lalu para tenaga kesehatan (nakes) jo tantara dan polisi sarato urang-urang nan batugeh di karamaian jadi prioritas partamo untuak divaksinasi. 

Sudah tu sacaro batahap divaksin pulo masyarakaik lainnyo. Lah ado pentahapannyo dek pemerintah. Tahun muko, in Sya Allah 80 persen penduduk Indonesia lah ikuik PVC19N ko.

Tapi, sungguahpun satantangan info-info ko, lah tarang bana dijalehan, masih banyak urang nan basipakak mada. Tak amuah disuntik, sambie mancari-cari ilah. Cari-cari alasan. Kambiang dalam parak panjang jangguiknyo, urang kalau anggak banyak sabuiknyo!

Baa lah caro mambanaan ka urang-urang nan basipakak tu? Antah kok urang-urang tu takuik mati, ataukah takuik disuntik?