HOME LANGKAN TINGKOK

  • Selasa, 7 April 2020
RAMBATAN
TINGKOK

RAMBATAN

DI TANAH DATA

OLEH: BAHREN*

 

Jo bismillah kato dibukak, di bukak untuak bakaba. Apokoh kaba nan nak disampaikan kapado sagalo dunsanak pambaco. Urang baso pai ka pakan, ka pakan mambali banta. Kaba tantang nagari Rambatan dalam luhak Tanah Data.

Mangko nagari banamo Rambatan, simak lah dek sanak caritonyo. Carito di urai dek Mak Datuak Pangulu Hitam, surang pagawai nagari di Ramtbatan. Ampek puluah tujuah umua liua maso itu, kutiko bakaba jo bacurito kapado Zuriati. Adopun tarikh maso itu tapek ditanggal duo puluah anam di bulan Mei tahu duo ribu tujuah.

Bagulambek liau kabaka, manyurah asa sarato usua, mangko nagari banamo Rambatan. Adolah pado suatu maso barangkeklah sarombongan niniak muyang kami dari Pariangan Padang Panjang. Gadang mukasuik nan kadijalang nyo maso itu, iyolah nak mancari lahan nan baru kadijadikan tampek tingga, sarato basawah jo paladangan.

Dek lamo lambek bajalan, banyak lah samak jo baluka nan ditampuahi. Untuak dapek lslu di jalan nantunmako dirambahlah samak jo baluka nantun. Salah surang dari niniak kami tu, basorak sambia basarayo rambahlah etan, rambahlah etan. Rambah arah ka sinan bitu baso minang umumnyo. Dari kato-kato rambahlah etan tadi lah agaknyo mako nagari kami ko banamo rambatan nan aratinyo samo rambahlah arah ka etan.

Kaba sarato curito iko alah didanga dek Mak Datuak PanguluHitam dar urang nan tuo-tuo daulunyo. Limbak nan dari pado itu, urang gaek kami daulu bacurito pulo maso niniak moyang kami ko asanyo dar Pariangan Padang Panjang. Suku-suku nan paratamo ado di Rambatan ko iyolah basuku Sungai Napa, Ado basuku Koroang Gadang, Suku Sumagek jo Suku Tanjuang. Suku Lubuak Batang sarato Suku Bawang jo Suku rabu.

Itulah kaba jo curito nan kami danga, dari baliau angku Datuak Pangulu Hitam. Jikok nyo ado kaba nan bana, tantu kabanaran datang nyo dari uhan, Allah ta’ala kayo sungguah tampek sagalo ilimu bahimpunnyo. Nyampang kok ado kaba nan salah, tantunyo salah datang dari ambo, ambo nan hanyo manusia tampek salah sarato gawa bakumpuanyo. Kapado Tuhan ampun dimintak, kapadao dunsanak nan mambaco maaf dipinto.

 

*DOSEN SASTRA MINANGKABAU UNIVERSITAS ANDALAS


Wartawan : Bahren
Editor : bahren

Tag :#Langkan #Tingkok #Asa #Usua #Nagari #Minangkabau