Panik

Padang (Minang satu) - Lah samo panik kini. Rakyat nan paralu makan, manggaleh taruih di pasa. Di pasa itu bana nan banyak kanai Covid-19. 

Kok ka dilarang urang cari makan, pamarentah ndak talok karano caro mambagi bantuan berlawanan jo aturan PSBB (Pembatasan Sosial Berskala Besar). Urang disuruah manjago jarak. Pas mambagi bantuan urang bagadincik. Berserak pulo virus diantaro urang rami tu.

Jadi, langkah nan diambiak kamari bedo. Panik juo jadinyo.

Urang masuak provinsi Sumbar, dilarang. Baku ribuik pulo di perbatasan antaro petugas jo urang nan datang. Bukannyo banyak nan patuah tapi banyak nan malawan.

Ditegur ndak pakai masker malawan, ndak jago jarak mangarengkang, ndak pakai surek tugas maradang. Kasudahannyo, lah panuah juo nagari-nagari dek perantau tatap dapek masuak, antah baa lah caronyo. Nan jaleh sampai di kampuang.

Kini lah kalua aturan untuak shalat Ied, hari rayo Idul Fitri. Diimbau kareh. Ko imbauan tapi kareh., hehehe., ba apo caronyo tu. Biasonyo wak mandanga dilarang keras, tapi kini ndak bisa dilarang karano sumbayang hari rayo ko hak ummat Islam, mako judulnyo diimbau kareh, jan sumbayang di musajik atau di lapangan.

Kok ado nan malawan kareh, ndak manuruik jo imbauan kareh tadi, silahkan sumbayang Ied bajamaah di musajik atau di lapangan, dengan syarat. Soal syarat-syarat ko lah ado di dalam berita minangsatu.com.

Kok lai izin Allah wak sampai ka rirayo, lanjuik pulo hinggo lapeh rayo, ndak barubah sikap masyarakaik taradok ancaman virus corona ko, nan panik bukan pamarentah sajo lai, tapi kasado ummat. Ba ka indak, ancaman virus sabana mematikan. Lah bara penderita Covid-19 ko maningga dunia. Maleh wak manulih angkonyo, tiok hari batambah taruih. 

Mako ancak tahan diri dari kini, sabalun panik. 

Wassalam.