NAGARI BUNGO TANJUANG

Nagari Bungo Tanjuang

di Luhak Tanah Data

Oleh   Bahren*

            Tasabuik nagari Bungo Tanjuang

            Di dalam luhak Tanah Data

            Kok lai samo panjang nyo untuang

            Samo kito danga bunyi kaba

Bungo Tanjuang (Mimusops Elengi) bitu namo latinnyo. Mako nagari ko banamo Bungo Tanjuang dek basabab jo bakarano. Apokoh sabab jo karanyo dangakanlah curitnyo. Curito nan datang dari Z Datuak Sampono. Datuak Sampono bacurito ka Zuriati nan datang mahadok liau di tanggal 25 bulan Mei duo ribu tujuah. Kutiko patamuan tu mak Datuak Sampono manjadi Sekretaris Wali Nagari Bungo Tanjuang. Tigo puluah limo umua baliau wakatu itu, wakatu bakisah jo bacurito mako nagari banamo Bungo Tanjuang. Simak kan malah elok-elok dangakan malah baiak-baiak.

Mako nagarai Bungo Tanjuang, karano maso dahulunyo niniak moyang kami rang Bungo Tanjuang, manatap jo bamukim di sabuah tampek dan tumbuah sabatang bungo nan baunnyo sangaiklah harum. Harum nan bukan alang kapalang, baitu bana lah kironyo. Niniak kami manyabuik batang nan babungo harum tadi jo Bungo Tanjuang.

Limbak nan dari pado itu, dek samakin rami nyo urang, mako dibuek lah pasa tampek bajua bali sarato batuka barang. Pasa di bukak tiok hari akad. Mako Banamo lah Pakan Akan. Mako tampek pakan tadi barado dibari namo lah jo Pakan Akad.

Indak doh jauah dari Pakan Akad, bia nak dakek urang ka pakan, mako dibukak pulo lah dek niniak moyang kami pamukiman baru. Di pamukiman nan baru itu, tumbuah lah sabatang, batang jambak, jambu bol kato rang kini. Tampek pamukiman nan ado batang jambak tadi dibari namo Kampuang Jambak.

Tapi ado suatu maso, datang lah ampuah rayo wakatu itu, banjir kato rang kini. Hari baganti bulan, bulan baganti tahun, daerah nan kanai ampuah rayo tadi manjadi kariang dan dibuek lah manjadi tampek bamukim, dibari namo lah tampek tadi Ampia Rayo dari kato ampuah rayo. Ado pulo sabuah lai, kampuang nan tajadi bapadoman kapado alam takambang manjadi guru. Dek karano di kampuang tu dulu banyak batang kunyik nan tumbuah, mako banamo lah kampuang tu jo Kampuang Kunyik. Ado pulo sabagian nan bapandapek, dek karano urang kampuang tu suko manguniangan kunyik, atau mambangga-banggakan urang kampuanyo nan hebat-hebat, mako dibari namo Kampuang Kunyik.

Salain Kampuang nan banyak ditumbuahi jo batang kunyik, ado kampuang nan banyak ditumbuahi batang (H)aru, mako banamo lah Haru daerah nantun, ado juo nan mangatokan baso kampuangko samparonyo haru ko arati nyo kacau bana, mako banamo Haru. Antah ko iyo antah tido bialah tuhan sajo nan manjadi sasinyo. Di Haru ko lah niniak moyang rang Bungo Tanjuang paratamo turunnyo, dakek tampek nan agak tinggi jo babunyi nyariang niniak kami manyabuiknyo jo sabutan Guguak Nyariang. Dakek jo Guguak Nyariang tadi ado sabuah daerah lain nan banamo Kapuah, karano di kampuang ko banyak sakali tumbuah batang Kapuah (Sterculia Foetida).

Mamak Z Datuak Sampono mangatoan baso niniak muyang urang Bungo Tanjuang ko asa nyo dari Pariangan, Koto Baru sarato Tambangan. Curito ko lah liau dapek sacaro turun tamurun dari tuo-tuo di Kampuang ko. Kampuang nan basuku Tanjuang, Jambak, Koto, Patapang jo Malayu ko masuak dalam Luhak Tanah Data. Baitulah kisah nan di kabakan dek baliau Z Datuak Sampono. Jikok nyo ado nan bana, Bana nan datang dari Tuhan, Allah ta’ala kayo sungguah, tampek ilimu bahimpunnyo. Jikoknyo ado nan salah, salah lah jadi sipaik manusia kapado tuhan kito mamintak ampun, ka pambaco kami mohonkan maaf jo rila. 

* Dosen Sastra Minangkabau FIB Unand