Mangapik Daun Kunik

Mangapik Daun Kunik

Oleh: Bahren*

Kapik lah daun kunik

Oi ajan tuah tu

Tuah talampua ajan

Nan lain pulo mancuru

            Sayuik-sayuik tadanga lagu tu dari dari radio usang di lapau Piak Enek. Samantaro,  di suduik nan lain Tan Patuih lah maangguak-angguak balam pulo dek talampau di inok-inok e bana lagu nantun. Mak Datuak Lauik lah bitu pulo, asyik bacurito jo Si Muih pakaro maangok kalua badan untuak pamilihan Gubernur nan alah mulai tampak dalam sapakan bahkan sabulan nangko. Nan jaleh dari rundiang Datuak Lauik jo Si Muih lah ado pulo samacam kato putuih baso kok lai ado nan diawak manga baangok ka lua badan. Bak cando pantun rang tuo-tuo kito daulu kato Mak Datuak Lauik

Indak baudang di kuali

Manga katelo nan di gulai

Indak baurang koh di nagari

Manga nan jauah nan bajujai

Lah masak padi rang Singkarak

Lah rabah di lendo angin

Kok lai ado nan di Awak

Manga di angan urang lain

Baitu bana, pituah Mak Datuak Lauik ka Si Muih. Tapi nan si Muih indak juo pueh jo surah Datuak Lauik tadi, talabiah sudah mandangan lagu nan dari radio Piak Enek tadi. Mako Batanyo pulo lah Si Muih ko baliak ka Mak Datuak. Kok sarupo nan Mamak katoan tadi di dalam pantun tu Mak ambo raso ado pulo bana sarato batua e Mak. Nan inti e bana kok ado nan di awak manga mintak angok kalua badan, kan bitu mukasuik Mamak?. Iyo… bana Muih. Aaaa justru itu nan manjadi tanyodi ambo Mak. Indak kolah beko manjadi arupo mamangan di lagu tu Mak. Mangapik daun kunik pulo awak urang Minang ko kato urang?. Oooo itu mukasuik Ang Muih. Iyo Mak, bana itu mukasuik ambo semba Si Muih basicapek.

Jadi biko mah Muih. Untuak nan takaha sarupo itu. Memang harus mangapik daun kunik wak Muih. Indak sombong pulo awak dikatoan urang awak nantik tu Mak?. Indak Muih… indak. Urang nan mangatokan sombong itu justru awak anggap sajo inyo indak paham jo makna sarato arati dari mamangan tadi. Memang acok awak mandanga kalau mamangan itu diaratikan ka nan buruak sajo, sombong tapeknyo diaratikan dek urang banyak. Tapi jikok lah nyo tau Muih. Justri mangapik daun kunik ko ingin manyampaikan ka awak, baso awak tu bisa dan punyo kamampuan untuak mangarajoan apo nan kadikakok. Mako nyo indak masalah awak mangapik daun kunik dalam parakaro nan talah sarupo iko.

Tapi… baa kok daun kunik nan di pakai dalam mamangan tu Mak? Kan masih banyak daun lain nan labiah laweh sarato gadang dari dau kunik Mak?. Iyo…Batua kato Ang tu Muih. Banyak daun nann lain. Ado daun jati, daun kaladi pokok e sambuah Muih. Limbak nan dari pado itu Muih baa kok daun kunik, kan itu nan jadi tanyo dek Ang. Danga dek Ang dih. Partamo daun kunik ko laweh, jikok di kapik pasti lah tampak sajo a na di kapik tu. Nan kaduo daun kunik ko harum mako nyo kalau pun di kapik sarato dilipek bana e kaciak-kaciak Muih. Bisa sajo urang tau baso nan dikapik tadi tu daun kunik, dari baun nan ka lua dari daun tadi tu.

Di siko lah latak e mangko kok awak punyo kapasitas samo kamampuan untuak mangakok sasuatu karajo mako awak buliah mangapik daun kunik nan di ibaraikkan laweh sarato harum tadi. Di siko pulo lah wakatu nyo awak mancaliak an sia awak ko nan sabana e. tapi jikok awak indak ado punyo kapasitas samo kamampuan doh Muih, tetap juo mancaliak an ka urang baso awak bisa jo caro mamanggakkan urang lain nan kebetulan sajo bakatauan samo awak. Namo e indak mangapik daun kunik namo e doh Muih. Kok indak mangapik daun kunik a namo e nan takah sarupo itu Mak. Itu namo e mangapik kapalo harimau namo e Muih. A pulo tu mak. Itu indak bisa kito urai kini ko doh Muih. Bibilo e lah dih. Di surah lo nan ciek ko. Nan mangapik kapalo harimau ko.

*Dosen Sastra Minangkabau FIB Unand