HOME OPINI OPINI

  • Jumat, 12 Maret 2021
MAINGEK BALIAK KA CARITO ANAK MINANGKABAU (Bagian 1)
Opini Satya

MAINGEK BALIAK KA CARITO ANAK MINANGKABAU

(Bagian 1)

Oleh: Dr. Dra. Satya Gayatri, M.Hum

Carito anak Minangkabau kok awak caliak kini iko alah ditinggakan bana tarutamo dek anak-anak. Pado umumnyo, anak-anak di maso kini ndak tau jo carito anak-anak lai. Keprihatinan iko samakin batambah dek baitu pulo kondisinyo jiko ditelusuri kapado urang tuo. Urang tuo nan umuanyo alah di ateh 60 tahun banyak pula nan indak takana jo carito nan alah disampaikan dek urang gaeknyo waktu inyo masih ketek. Banyak dari amak, bapak, jo urang gaek di kampuang awak itu ndak namuah diwawancarai dek ndak takana jo carito itu. Fenomena iko panulih sampaikan dari pengalaman waktu mancari data dalam rangka penulisan disertasi. Mancaliak kondisi iko, iyo sangat sadiah awak mamikiakannyo.

Dek kelangkaan carito anak di masyarakat itu makonyo timbul pangana dari diri panulih untuak munculkan baliak jo caro mambagi carito-carito anak nan alah ditranskripkan nan pado umumnyo carito itu alun didokumentasikan secaro elok. Panulih bausaho mambaginyo secara baturuik-turiuk di media iko.

Kito prihatin jo perkembangan media massa kini jo dampak negatifnyo salah satu mambuek anak-anak samakin jauah jo carito anak saratoan samakin jauahnyo interaksi sosial jo urang di sakaliliangnyo. Samantaro carito anak banyak managihkan edukasi nan sangaik rancak untuak mereka. Di bawah iko diuraikan saketek tentang dampak positifnyo metode bacarito atau mandongeng untuk anak-anak. Penelitian yang dilakukan dek Musfiroh (2008) tentang kaunggulan metode bacarito nampak manfaatnyo kapado anak-anak, diantaranyo untuak: 1) mambantu kepribadian dan moral anak, 2) manyalurkan kebutuhan mereka untuak baimajinasi jo bafantasi, 3) mendorong anak bisa mengecek secara langsuang, 4) merangsang minat inyo untuak manulis, 5) merangsang minatnyo untuak mambaco, sarato 6) mambuka wawasan anak itu pulo. Jo metode bacarito iko anak-anak awak, diarokan bisa berimajinasi nan positif, kreatif sarato bisa jo gagah berani manyampaikan pandapeknyo. Caro iko alah dilakukan pulo dek Puryanto (2008) pado anak-anak di sakolah. Malah ado hasil penelitian yang menyabuikan jiko anak-anak ketek masuak ka lingkuangan baru serupa masuak PAUD atau TK mako anak-anak ado nan takuik sahinggo indak namuah ditinggakan dek ibu atau yang mangasuahnyo (Khoiriyah, 2015). Tapi jiko dibujuak jo mancampaikan carito atau mandongeng ketegangan mereka iko jauh bakurang. Baitu pulo untuak bidang akademik atau anak-anak nan sadang sakolah sarupo palajaran Ilmu Pengetahuan Sosial, mako guru di Amerika merekomendasikan supayo mamasuakkan materi pelajarannyo malalui sastra untuak mancapai nilai akademik nan labiah rancak (Almerico, 2004). Untuak itu, nan ka muko ko artikel nan penulih sampaikan berkaitan jo carito anak nan didapek-an dari hasil wawancara jo urang gaek-gaek nan ado di kampuang-kampuang. Mudah-mudahan carito iko bisa menjadi bahan untuak urang tuo, ibu jo bapak, guru-guru, atau siapo sajo yang berminat di bidang iko.

Salah satu motif carito yang acok ditamui di lapangan mirip jo carito Malin Kundang. Motif caritonyo samo-samo manyampaikan pasan supayo anak patuah, baetika, santun, jo hormat kapado ibunyo. Kok ndak basikap sarupo itu digambarkan di dalam carito anaknyo manjadi “karam”. Indak manjadi urang lai. Ado yang tabanam dalam bancah, ado manjadi batu, ado juo yang hilang sajo. Jadi bermacam-macam digambarkan kok anak itu basikap tidak elok ka ibunyo.

Waktu kini iko penulih suguahkan carito nan samo di ateh. Carito iko disampaikan sasuai jo dialek yang didapekkan dari informan itu. Carito iko beredar di sekitar Ngalau sabalun masuak ka kota Payokumbuah dari Bukitinggi.

 

CARITO SI BUNCIK

 

Iko carito urang gaek awak pulo dulu eah. Kok awak ndak dapek do. Caritonyo si Peto iko inyo urang kayo godang. Anaknyo namonyo si Buncik. Si Peto jo si Buncik iko inyo kayo.  Sangkek dulu baitu carito nan dijawek.

Urang sangkek dulu poi ka Mokah jo kudo. Olun ado oto jo kereta api lai.  Jadi ka Mokah iko bataun-taun, babulan-bulan baru katibo. Iko namonyo ka Mokahlah jo kudoh.

Jadi lah baliak  nyo ka Mokah. Amaknyo iko lah bansaik didapati, rumah godang lah dipaluik aka, kok lamannyo lah rimbo, kok inyo rang tuo lah bansaik. Jadi dek lah tadonga urang pulang dari Mokah.

     Awak dek lah bansaik. Dulu urang di siko bakicia manumbuak padi.

Jadi poilah ka kincia manompi dodak. Tompilah dodak, tompilah boreh urang. Jadi dulu boreh iko badodak dipisahan jo nyiru. Jadi dibuekanlah kalimpiang dodang dek andehnyo  untuak manjonguak anaknyo. Itu sajarah rang tuo.

Jadi poilah manyosoang anak.

Tibolah di Ngalau sompik iko. Jadi lah basobok anak cako.

   “Waang itu Buncik?,” keceknyo.

“Iyo”, nan inyo.

“Iko maa nak iko nan den bueknyo. Awak lah bansaik kini. Kok rumah godang awak lah dipaluk aka. Kok halaman awak olah somak. Jadi iko nan Amak bueknyo ah”.

Dicoliaknyo andehnyo cako lah buruak.

      Lah lamo di Mokah. Dulu andeh ditinggaan masih mudo, masih rancak, kini lah buruak. Konon hiduik lah bansaik. Kain lah buruak.

“Ndak iko mandeh den deah”. 

“Iyo iko andeh ang, Nak.” Iko nan andeh Peto, ang.”

“Indak”, keceknyo juo.

“Andeh den rancak, Andeh den kayo den tinggaan. Baa kok lah bansaik Andeh den kini?”.

“Iyo lah bansaik Andeh ang kini, sajak ang ka Mokah”.

      Tapi ndak juo didongaannyo deah. Ndak yakin inyo deah. Manyumpah andehnyo.

“Iyo kok ndak iko andeh ang, nan kadilantak potuah lah awang”. 

      Diambuanglah ka ateh bukik si Buncik situ. Tasampanglah kudonyo di ateh bukik itu. Nan anaknyo iko lah manjadi batu.

     Jadi si Peto iko dek ndak sonang hati bajalanlah inyo ka sawah situ.

      Awak ado sawah di situ. Batu putiah namo sawahnyo di situ.

      Diontaknyo dirinyo di situ. Diontaknyo pulo badannyo jadi batu. Dituduangannyo nyiru ka ateh kapalonyo. Madoknyo ka ateh bukik nan disorunyo cako.

“Ondeh jadi batu pulo lah den”.

Madok juo ka situ. Baitu bungkuak batunyo di situ. Putiah batunyo.  Dilokak dek urang batu itu dek urang nan ndak tau. Dilokaknyo dek urang jatuah ka dalam bonda.

Bisuak pagi mandaki batu itu baliak ka ateh dokek inyo duduak baliak. Di dokek batu putiah. Banamo sawah itu kini batu putiah. Nan si Buncik di Ngalau inyo manjadi batu.

      Jadi kaki kudo itu dulu dilontiangnyo dek urang, patah kakinyo ciek. Jadi ciek kakinyo tingga lai.

      Itu caritonyo nan dijawek dari urang tuo. Itu nan dicaritoan dek andeh awak.

“Baa dek ateh batu iko, mak?,” nan awak ka amak awak.

“Iyo nak iko namonyo si Peto jo si Buncik.

 

 

Rujukan

 

Almerico, Gina M. 2004. “Building character through literacy with children’s literature”. Dalam Research in Higher Education Journal Volume 26 October, 2014, pp. 1?13. http://www.aabri.com/copyright.html.

Gayatri, Satya, 2020. “Carito Anak Minangkabau Variasi Teks dan Sistem Pewarisannya: Analisis Perubahan. Disertasi Pascasarjana Universitas Gajah Mada. Yogyakarta.

Khoiriyah, Rif’atul. 2015. “Pemberian Relaksasi Melalui Dongeng Untuk Menurunkan Stress dan Gangguan Tidur Pada Anak Panti Asuhan”. Tesis Program Magister Psikologi Profesi Fakultas Psikologi Universitas Gajah Mada.

Musfiroh, Tadkiroatun. 2008. Memilih, Menyusun, dan Menyajikan Cerita untuk Anak Usia Dini. Yogyakarta. Tiara Wacana.

Puryanto, Edi. 2008. “Konsumsi Anak Dalam Teks Sastra Di Sekolah”. Makalah Komprensi Internasional Kesusastraan XIX Himpunan Sarjana Kesusastraan Indonesia (HISKI).

Sugihastuti. (2013). Tentang Cerita Anak (3rd ed.). Yogyakarta: Pustaka Pelajar.

 

 

 

 


Tag :#Opini