Kundi Jo Sago

Kundi Jo Sago

Oleh   Bahren*

Nan kuriak iyolah kundi

Nan Sirah iyolah sago

Nan baiak iyolah budi

Nan indah iyolah baso

Indak taraso alah sapakan agak nyo Mak Anan jo Si Alan indak basuo. Tarakir kali inyo basuo kutiko duduak sore di Muaro Lasak sambia makan goreng pisang langkok jo kopi sakarek sambia santai-santai soren nantun. Pagi ko, si Alan datang baliak ka rumah Maka Anan, nak manambah-nambah pangana jo pangatahuan parakaro adaik jo budaya awak urang Minang.

Assalamu’alaikum… Maka Anan…. Oooo…. Mak Anan… lai ko lah mamak di rumah, sambia mambaco salam Si Alan manokok-nokok  pintu gadang rumah Mak Anan. Indak bara lamo sudah pintu di tokok, dari baliak pintu mancogok mintuo Ani. Eh… mintuo… ado Mak Anan, Mintuo…? Tanyo Si Alan ka mintuo nyo. Lai…lai…masuak lah Lan. Duduak lah dulu, mintuo imbau mamak ang cah dulu. Jadih Mintuo. Mako masuak lah si Alan ka rumah sambia manunggu Mak Anan.

Indak lamo… kalua lah Mak Anan dari balakang, eh…waang Lan! Duduak lah. Sambia maimbau Mintuo Ani, Mak Anan pun mamintak mintuo Ani malatak an Kopi jo makanan ketek-ketek untuak ka dimakan sambia maota-ota.

Lah Lamo Ang sampai Lan?, tanyo Mak Anan. Alun lai Mak, baru bana Mak. Li baa amai jo abak ang nyo kini Lan? Alhamdulillah lai sihaik Mak, Mamak jo Mintuo Baa li kolah sihaik. Alhamdulillah co iko sihaik nyo mamak jo mintuo ang nyo Lan.

Biko mah mak… Kato Si Alan. A… tu Lan?. Pantiang bana nampak e, ang kamari. Sabana nyo dikecek an pantiang indak bana, dikecek an indak paralu ambo Batanyo Mak. Pasal jo parakaro apo nan ka Ang tanyoan Lan. Sampaikanlah!!!

Ambo nak batanyo pasal jo parakaro kundi jo sago samo mamak, Acok bana ambo mandanga duo jinih tinaman itu, kalau lah basangkuik jo budi dan bahaso. Takah pantun nan kodok wak danga tu Mak, Nan Kuriak iyolah Kundi, Nan Sirah Iyolah Sago, Nan Baiak Iyolah budi, nan indah Iyolah baso. Baa bana kundi jo sago ko dek urang Minang ko Mak? Tolong jo jawek tanyo ambo Mak, kato Si Alan.

Oooooo itu nan jadi buah pikia dek ang Lan. Iyo Mak. Nyo biko mah Lan. Dari dulu niniak jo moyang kito ko, kan memang lah terkenal jo filosopi iduik “Alam Takambang Jadi Guru”. Jadi, karano alam nan manjadi guru dek inyiak jo moyang kito, mako indak sio-sio agak nyo, inyiak moyang kito ko dalam mamiliah sagalo sesuatu untuk ka dijadikan contoh. Bitu pulo tantang Kundi jo Sago

Ado palajaran nan pantiang jo paralu anak-anak mudo Minang tahu. Tantang Kundi jo Sago ko Lan, Manuruik angku Datuak Kayo, duo jo Mak Katik Mangkuto parnah manyurahkannyo ka pado mamak. Ado pun surah dari Kundi jo sago ko adolah duo tinaman nan taguah sarato kuek pandirian. Kuriak nyo kundi indak kan parnah luntur walaupun di simpan di lunau kubangan kabau bahari-hari, bitu pulo jo sago, baa bana lah sago ko, ka dirandam jo aia atau pun minyak, nan sirah nyo indak akan parnah luntur. Makonyo sipaik tahan uji kundi jo sago ko manjadi samacam sipaik nan harus di punyoi dek anak Minang. Baa juo lah halangan jo masalah nan mahadang indak ka marubah pandirian urang Minang bitu bana inyiak kito daulunyo. Labiha-labiah kok di tiliak kini ko, tahun politik kato urang, sabagai urang Minang, jan barubah pilihan dek garah-garah mie sa kardus jo bareh sarato minyak sakilo. Kalau memang lah mantap pilihan tu, jadikan itu pilihan nan sabananyo.

Labiah lanjuik, juo diurai dan disurah dek Mak Datuak Kayo jo Mak Katik. Sambuangan dari Nan Kuriak iyolah kundi, Nan merah iyolah sago tu, di sambuang jo Nan baiak iyolah budi,  Nan indah iyolah baso. Jadi, manuruik Mak datuak Kayo jo Mak Katik, sabagai urang Minang, kok indak punyo budi nan baiak sarato jo baso nan elok, alamaik ka sansaro manjadi urang. Jo budi baiak, awak ko mudah sarato murah mandapek kawan, jo elok baso, awak manjadi panutan dek urang banyak. Cubo lah Ang caliak Lan, para pendiri bangsa ko nan barasa dari Minang, jo budi nyo, inyo manjadi pendiri bangsa, jo bahaso nyo mereka manjadi juru rundiang di ba bagai-bagai parundiangan demi Indonesia merdeka. Itu bana lah agaknyo baa ketahanan dan kataguahan pendirian harus di bungkuih jo budi sarato jo bahaso nan rancak mangko manjadilah urang Minang ko manjadi urang nan sabanyo. Istiqamah dan santun kato rang kini. Mudah-mudahan lah Lan….

O yo lan… dek wakatu duha lah masuak, molah kito sumbayang duha dulu. Sabalun datang pulo luhua. Iyo lah mak, sabana sanang hati ambo lah dapek pulo ilimu baru pagi ko. Mako nyo kalau bacurito jo mamak ko mandapek ilimu taruih lah handak nyo ambo. Aaamiiin.         

*Dosen Sastra Minangkabau FIB Unand