MADA

HOME LANGKAN CARITO


  • Kamis, 30 April 2020
MADA
Carito

MADA

Oleh: Bahren*

Mada…mada…mada, kato-kato tu acok bana diulang-ulang dek Tan Barain satiok sasudah mambaco pasan-pasan nan masuak di WA grup nan Tan Barain ado masuak di dalamnyo. Sambia manggeleang-geleang ngenek iyo manenok elok-elok angko-angko angko nan ado di Wa gurup nantun. Sabua pasan masuak nan mangatokan samakin hari di kampuang kito ranah nan tacinto ko urang nan tajangkik dek pinyakik korona ko samakin batambah. Dalam tigo hari ko sajo manuruik impo dari gurup WA tu ado 12 kasus positip, sasudah tu batambah 19 baleh lai kasus pasitip, hari nan katigo batambah pulo 23 tigo kasus lai. Apokoh iko indak cukuik manjadi bukti kalau kito mada.

Pamarintah jo sagalo dayo sarato upayo alah mambuek aturan. Indak buliah kalua rumah kacuali untuak mamlabi nan kadimakan jo nan ka disamba. Jikok ditenok ka aturan nan paratamo ko iyo cando makan buah simalakama juo kitodibuek e. jua kadibali samba jo nan kadimakan tu kok awak di aru untuak dumah je. Amuah samba jo nan kadimakan tu datang surang je wee ka umah awak, indak kan? pikia Tan Barain. Kok lai bana, bunyi e ado bantuan dari pamarintah, aturansamo saraik  e. sagarobak tundo pulo nan harus dipanuahi. Ado pulo bantuan dari nan lain, saraik e indak buliah pulo manarimo bantuan sarupo. Samantarao kito sangaik lamah jo data tantang sia nan lah manarimo sia nan alun. Sia nan patuik manarimo sia nan patuik mambari. Inggo sakarang kiniko agak e awak iyo alun punyo data nan sahiah tantang itu. Sainggo baa indak ka, ka lua umah juo urang banyak ko.

Limbak nan dari pado itu, ado pulo imbawan untuak samantarao kok nak ka sholat dumah je dulu. Indak usah ka musajik. Kok nan ciek ko banyak juo nan mada. Babagai-bagai alasan kalua walapun kok ditanyo bana apo dalil sarato alasan e ka we’e , nan we’e indak pulo tau agak e doh, Cuma mandanga-danga sajo. Ado nan baalasan sholat di musajik ko di rumah Allah, indak mungkin awak sholat di rumah Allah indak kadijago dek Allah sabagai nan punyo rumah. E… pam pam yo kato tan baro dalam ati, kok itu nan kadijadikan alasan,  ma nan labiah gadang musajik tuan-tuan jikok dibandiangkan jo musajik nan ado di Makkah jo di Madinah, Ma nan labiah mulai musajik tuan-tuan tu dari musajik nan duo tu. Cubo lah tuan-tuan pikia, pakai utak ketek tu. Di Makkah jo di Madinah sajo untuak samantarao di antikan sholat ba kaum-kaum atau bajamaah. Nan tuan-tuan masih juo mada.

Ado pulo nan baciloteh, musajik kami ko basemprot tiok sabanta jo desinpektan, makin taburansang lah Tan Barain dibuek e. indak kolah tuan-tuan mancaliak baa tukang barasiahan musajik di Makkah jo Madinah tu baa mambarasiahan musajik e? indak di pel pakai tangan je lai doh tuan, lah pakai oto we’e mampel musajik tu. Tatek sajo urang di situ indak sholat bakaum nyo tuan. Ijan Mada juo Tuan. Danga sarato turuik je lah ibauan pamarintah jo tuan-tuan guru kito tu. Jo ilimu e we’e mambuek kaputusan untuak maimbau kito indak sholat di musajik dulu tu, tu Tuang, indak jo ilimu takok-takok je tu doh. Gadang pulo doso nan kaditangguang e tu kok nyampang salah we’e tu mambuek kaputusan.

Batanyo ambo ka Tua, kok indak turuik ka parintah pamarintah sarato ulama, parintah sia kini lai nan ka kito turuik. Ambo kiro dalam ati tuag-tuan pasti manjawek, yp parintah Tuhan lah. Kok baitu jawek Tuan, dari ma Tuan-Tuan tau itu parintah Tuhan?. Tantu sajo dari ilimu nan dibari dek tuan guru-guru kito nan baraja tantang itu. Kini Tuan-Tuan mada juo. Indak mandanga kok manjadi kuburan masal kamuang kito ko isuak Tuan. Jadi untuak nan sakali ko, mamintak ambo. Turuik je lah parintah pamarintah jo tuan-tuan guru kito. Kok untuang lai capek wabah ko bakirok bakikh dari nagari kito ko. Bukan kah dalam baguru kito diaja untuak ikuik parintah Allah, Parintah Nabi, jo Parintah Guru.  

*Dosen Jurusan Sastra Minangkabau Universitas Andalas


Wartawan : Bahren
Editor : bahren

Tag :# Langkan # curito #minang