HOME LANGKAN TINGKOK


  • Kamis, 4 Juli 2019
Koto Baru
TINGKOK

Koto baru

di Luhak Tanah Data

Oleh   Bahren*

 

Adolah pado maso dulunyo tasabuik malah Pariangan, tampek nyo asa niniak kito. Tasabuik dalam mamangan adat dimano asa titiak palito, dibaliak telong nan batali. Dari manyo asa niniak kito, dari puncak gunuang marapi. Itu molah nan manjadi dasar tasabuik di dalam tambo tasiar dalam kaba jo barito.

Sairing bajalannyo maso habih hari baganti minggu, habih minggu baganti bulan. Bulan habih tahun baganti pulo. Urang nan samakin rami juo di nagari asa pariangan nangko, hinggo tak cukuik lai tampek untuak ka tingga.

Mako limbak nan dari pado itu, adolah maso suatu hari barangkeklah sarombongan niniak kami, mancari tampek hunian baru nan kadijadikan tampek tingga jo paladangan. Dek lamo lambek bajalan. Lamo bajalan banyak dicaliak lamo iduik banyak diraso. Singgah di sabuah tampek urang nan alah rami pulo, diansua pulo ka tampek lain mako nan agak langang, bamukim dan manetaplah niniak kami di situ. Tampek bamukim jo baladang nantun dibarilah namo Koto Baru nan aratinyo bana tampek bamukim nan baru.

Baitu bana kisah disampaikan dek baliau Datuak Rangkayo Bunsu Walinagari Koto Baru di Bujang Juaro wakatu itu. Ado pun wakatu liau bacurito umua liau nan iyo alah agak lanjuik baumua tujuah puluah ampek, ka Ivan Adilla liau bakisah tiko itu.

Dialiah kaba saketek kaba tantang tampek nan banamo Bujang Juaro. Tasabuik kisah Bujang Juaro nan suku ma-adu jo manyabuang ayam. Adolah pado suatu maso bujang bakato ka urang rami jikok manang ayam den beko mako den antak lah batu ko. Baitu ayamnyo manang diantak lah batu tadi dek Bujang Juaro. Mako inggo kini banamo lah tampek natun jo namo Bujang Juaro.

Dicubo pulo dikana-kana asa mulo namo tampek nan lain dek baliau Datuak Rangkayo Bungsu. Mako bakisah lah baliau tantang tampek banamo Aia Manambuih Batu. Manga banamo Aia manambuih batu, biko malah curitonyo. Adolah sabuah batang aia nan ado sabuah batu gadang, dari batu itu kalua lah aia. Mako Banamolah Aia Manambuih Batu.

Ado pulo sabuah lai daerah nan ado aia tajunnyo, dbari namo jo Sarasah nan aratinyo aia tajun manuruiik bahaso kami di siko. Ciek lai nan takana ado kampuang banamo Guguak Salo, baa banamo guguak salo karano kampuang tu talatak di katinggian dan banyak tumbuah batang Salo (Pholidacarpus Sumatrana) jinih tanaman serdang.

Di guguak nan lain banyak tumbuah batang Sikabu dibari namolah guguak nantun jo Guguak Sikabu. Baitu Pulo Guguak nan lain, ado pulo Guguak nan banyak tumbuah batanng limau kapeh dibarilah namu guguak to Jo Guguak Limau Kapeh. Ado pulo sabuah guguak nan lain nan tampak jaleh dibandiang guguak nan ado, jaleh dalam bahaso kami disiko disabuik jo bendang, mako banamolah guguak tadi jo Guguak Bendang.

Baitulah curito nan ambo tarimo dari liau nan tuo-tuo di nagari ko sajak dari daulunyo. Manuruik niniak jo moyang kami, nagari kami ko ado nan basuku Piliang, ado pulo nan basuku Caniago, sarato suku Kutianyia. Limbak nan dari pado itu, namo namo nan ado dibalakang kato guguak tadi juo marupokan namo suku nan ado diam jo tampek tingga di nagari nangko.

Itulah kaba nan dikabakan liau Datuan Rangkayo Bungsu ka Ivan Adilla tanggal 26 Mei 2007, jiko nyo ado nan bana tantang itu, kabanaran iyolah datang dari Tuhan. Allah taala kayo sungguah tampek sagali ilimu bahimpunnyo. Jiko ado salah jo gawa. Salah nan datang dari ambo. Ambo nan hanyo manusia, tampek salah jo gawa bakumpua. Kapado tuhan Ambo minta ampun, ka pambaco maaf di pintak.    

 

*Dosen Sastra Minang FIB Unand

 

   


Wartawan : Bahren
Editor : Bahren

Tag :# Langkan # Tingkok # Asa # Usua # Nagari # Minangkabau