Elok-Elok Nan Di Ateh, Nan Di Bawah Kok Manimpo

Elok-Elok Man di Ateh, Nan di Bawah Kok Manimpo

Oleh TE Radjo Boedjang

Sapinteh, pituah iko bisa dikecek an mustahie pado aka! Lai ka mungkin nan di bawah ka manimpo?

Sungguahpun ado kato "kok" nan bulieh diaratien "ka" atau "mungkin tibo", tapi dak masuak aka kok nan di bawah manimpo. Sabab, timpo tu aratinyo kanai dek sesuatu dari ateh! Kok dari bawah, atau dari sampiang, namonyo bae. 

Tapi sacaro makna tasirek, kato-kato "kok manimpo" bulieh diaratien duo hal. Partamo, kato "kok" baarati "mungkin", atau "akan". Dan manimpo, aratinyo sangajo "manimpo, dari ateh". 

Baa nan manimpo dari bawah? Sacaro tasirek iko mukasuiknyo adolah "urang nan di bawah"--bisa diaratian urang-urang nan dikuasai, urang-urang di bawah superior, atau urang-urang nan dalam pangaruah--malawan ka "urang nan di ateh".

Malawan? Iyo. Bisa malawan sacaro fisik, atau sacaro pikiran. 

Sabek tajadi palawanan tu, tantu adolah karano sasuatu nan luar biaso. Ado sabek-sabek nan prinsipil. Contohe manyangkuik harago diri perorangan atau kalompok. Bisa pulo manyangkuik "kampuang tangah" alias paruik. Bia lah bacakak jo urang, daripado bacakak jo galang-galang!

Tapi, sacaro makna tasuruak, pituah "Elok-elok nan di ateh, nan di bawah kok manimpo", iko labieh banyak maarah ka nasihat atau paringatan ka "urang nan di ateh" alias pemimpin. Pamimpin--pamimpin informal (mamak, niniek mamak, jo pangulu) atau pamimpin formal (wali jorong, wali nagari, bupati/walikota, gubernur, jo presiden), atau pamimpin dalam arati organisasi, dll--nan lah malangga hal-hal yang prinsipil itu, bisa dilawan dek "urang nan di bawah".

Karano itu, seorang pamimpin musti mamparatian kaparaluan-kaparaluan "urang di bawah", bukan kaparaluan-kaparaluan inyo jo kalompoknyo sajo. Dalam sagalo hal. Tarutamo nan manyangkuik urang banyak.

Walinagari, dan sataruihnyo, sampai ka presiden, kutiko lah dilantik, liau adolah milik urang banyak dan maurus urang banyak. Idak sajo manyangkuik kabutuhan fisik, tamasuak pakaro sosial, budaya dan pikiran jo kamauan.

Nan suliknyo, kutiko kaparaluan urang banyak tu baragam-ragam, bahkan batantangan satu samo lain, di sikolah kapiawaian pamimpin diuji. Lai kok tagak di nan bana? Atau sakadar tagak di nan banyak? Atau justru tagak di kalompok minoritas.

Makonyo, di Minangkabau, pamimpin itu ditenggiaan sarantiang nyoh. Di doluan salangkah! Supayo liau bisa dakek jo "urang nan di bawah", sahinggo tau apo aspirasi nan tumbuah.

Apolai pakaro mamilieh tampek tagak tu. Acok basuo, pamimpin takuruang dek pilihan yang dilematis--simalakamo. Baa caro mamiliahnyo? Apo dasar mamiliehnyo?

Nan acok tasuo, apo lai di zaman pamiliahan lansuang kini, pamimpin labieh bapihak ka kelompok-kelompoknyo sajo. Nan lain nomor sakian. Kalompok liau nan paralu dulu.

Untuak politik praktis, itu iyo biaso nah. Apo lai untuak jadi pamimpin--sayangnyo--paralu bapokok, bamodal. Dak bisa jadi bupati/walikota jo modal tulang lapan karek jo kapalo ciek se doh! Paralu pitih. Maha pokok untuak jadi pamimpin, bahkan untuak jadi walinagari sajo paralu pitih untuak mambuek baliho jo spanduk, sarato pamflet jo sticker bagai!

Lah sudah dilantik, baru tapikie; baa pokok tadi? Kadisumbangan se jadi sadakah? Mungkin ado nan sarupo itu. Tapi, kok pokok ko dari sponsor? Tantu utang ka dibayie, paranduak ditarimo.

Dak adie? Sajauah iko, itulah sistem pamiliahan pamimpin nan kito pakai. Di lua mamiliah pamimpin informal, apolai mamiliah pangulu nan lah ado barih jo balabehnyo, mamilieh pamimpin formal tampak idak adie nyo. 

Padohal, nan paralu pamimpin tu masyarakat. Rakyat. Karajonyo maurus rakyat. Baa kok untuak mamiliah walinagari, bupati/walikota, gubernur jo presiden, idak rakyat-rakyat tu nan bagotoroyong mamikue pokok? 

Ado juo rakyat manyumbang, tapi jauah labieh saketek dari pokok nan harus ditangguang calon pamimpin tu. Kan dak adie namoe tu doh!

Baa kok dak adie? Iyo lah, karano nan paralu pamimpin adolah rakyat, "urang nan di bawah", mako mereka lah yang harusnyo mamokok-i calon-calon tu. Sarimih sajo, jan sampai ka lua pitih sang calon. 

Tapi, nan tajadi kini, justru lah jo "dama di ateh pagu" sang calon tu lucuik tandeh mamokok-i supayo nak jadi pamimpin. 

Beko, kok manang, duopuluah limo jam sahari samalam bakarajo. Tekor sajam. Dak ado wakatu mauruih anak bini. 

Baa nan "urang di bawah" tadi? Sudahlah "urang nan di bawah" tu dak bapokok, pamimpin nan dilantik tu nyo paso mangarajoan nan inyo nio. Kok tak diacuahan, nyo garagak jo pituah; "Elok-elok nan di ateh, nan di bawah kok manimpo".

Untuang lah "nan di bawah" tu kini lai sapantun jo "lapan kali sawah tagadai, nan koncek di ateh pamatang juo". 

Jadi, yooo baitulah... aman-aman sajo sampai kini. Tapi, "nan di ateh" jan sanang dulu. Lah banyak juo nan kanai timpo dari bawah. Karano balaku pulo nan bengkok makanan saruang!