CINTO LAI KA DATANG JUO

CINTO LAI KA DATANG JUO

Penulis: Peppy Reskilianti*

Sakian tahun Si Anun iduik surang diri. Manjadi bungo kampuang indak manjamin dirinyo mudah mandapekan kumbang hati. Laki-laki di kampuang ko ndak ado nan ka tuju parangainyo Si Anun.  Lah banyak pinangan datang tapi ditulak sadonyo dek Si Anun.  Kini umua Si Anun lah ampiang kapalo tigo. Nan amaknyo lah taragak pulo nak ka bacucu.

" Nun, amak ingin carito stek a." kato amak Si Anunserius

"Apo tu Mak?,  serius bana kayak e mah"  jawek Si Anun ka amak nyo

" Iko Nun a, patang tek mar lewat di muko rumah wak" kato amak si Anun

"Tuuu?" jawek Si Anunminta panjalehan

" Nyo mancaliakan cucu nyo patang,  tu Mak gendong cucu nyo ko.  Ondeh yo sero rasonyo manggendong Anak bayi ko Nun.

" Tu ba a lai mak? " jawek Si Anun, tau Nun maksud kecek amaknyo

"Amak nio lo punyo cucu lai, capeklah kau balaki lai" kato amak Si Anun marayu

"Ondeh mak mancari laki ndak samudah mancari pisang goreng do Mak" jawek Si Anun ka amaknyo

" Mak tau lo tu ma, Nun,  lai banyak urang nan nio ka kau ma. Tapi kau tolak se taruih" kato Amak Si Anun

" Mak, laki-laki yang suko ka Anun tu mak, ndak ado yang tulus dari hati do Mak.  Nyo hanyo maliek dari fisik se nyo mak" jaleh Si Anun ka amaknyo

" Yo kok ndak nio kau jo urang tu,  kau carilah. Ko indak, di rumah se ma ka dapek" kato Amak si Anun

"Andeh mak,  kama ka Nun cari mak."

"Anak Si Eti ado tu,  anak Si Lis.  Banyak nak bujang di siko lai ma,  manga paniang-paniang bana! " kato amak si Anun

"Amak ko yo sambarang se yo,  ndak mungkin lah Nun jo brondong Mak.  Mak ko ado-ado se" jawek si Nun kesal

"Apolo salah e jo brondong, kau kan rancak ma. Kau tu se nyo yang pamiliah bana jadi urang.  Beko jadi gadih lapuak kau beko kayak anak Sinyak, baru tau raso" kato Amak si Anun

"Ndeh ndak dapek jawek dek Nun do Mak, paniang Nun dek e ma mak" jawek Si Anun muak

" Ehh terserah kau lah lai Nun, amak nio ngecek itu senyo.  Umua amak lah gaek juo,  biko ndak sempat amak maliek kau manikah beko" kato amak Si Anun sambia kalua dari kamar si Anun.

Mandanga kecek amaknyo saroman tu, bakato lah si Nun dalam hatinyo.  " mak Bukannyo Anun ndak nio manikah,  tapi Nun ndak nio manikah samo laki-laki yang hanyo mamandang fisik.  Yang Nun nio urang yang sabana cinto samo Nun dari hati karano Allah. Bukan karano fisik, jikok mancintio fisik, kecantikan ko ndak ado yang abadi.  Hilang rancak hilang pulo cintonyo.  Itu yang Nun takuikan sabananyo.  Jikok iyo ka manikah ancak cari urang nan sabana-bana nyo. Jan sampai parnikahan ko nantiknyo hanyo saumua jaguang sarupo artis-artis iBukota kini ko. Kini Anun hanyo baikhtiar ka nan satu supayo nun capek di patamukan samo jodoh Nun.

Katiko siang harinyo manjalang sholat zhuhur,  Si Anun siap-siap bagageh bajalan ka rumah sajik. Nyo akan sholat zhuhur di sanan sambia manghadiri acara pengajian rutinnyo satiok hari Sabtu.  Pangajian ko di isi samo ustad Zaki,  laki-laki rupawan nan sholeh,  manjadi impian sado padusi yang hadir di pangjian tu untuak mandapekan nyo. Sosok laki-laki sampurna nan cocok jadi imam dalam barumah tanggo. Salasai sholat zhuhur dimulailah pangajian tu. Salamo pangajian tu ndak ado habiah nyo Si Anun mamuji ustad Zaki. Dalam hati Si Anun manyimpan raso samo ustad Zaki. Namun Si Nun ndak pacayo diri,  ndak mungkin nyo ka bisa mandapek ustad Zaki ko do, mustahil.  Karano ndak mungkin ustad tu nio samo padusi pamalu kayak Anun ko. sadang lamak-lamak nyo si mamandang ustad Zaki, sacaro ndak sangajo ustad Zaki mancaliak lo ka Si Anun.  Malulah Si Anun gara-gara ketahuan mamandang ustad Zaki diam-diam.

Salasai pangajian dan sholat asar pulang lah Si Anun ka rumah bajalan kaki.  Sadang bajalan tu lewat lah ustad Zaki jo ondanyo.  Nyo sapolah Si Anun ko.

" Assalamualikum Nun" kato ustad Zaki

" Eeh ustad,  waalaikumussalam ustad" jawek Si Anun malu-malu

"ba a pengajian tadi, lai paham Nun samo yang ustad sampaikan tadi?  Tanyo ustad Zaki

"Alhamdulillah,  lai ustad" jawek Si Anun semangat

"Syukurlah kalau gitu,  minggu bisuak pai pangajian kan? "tanyo ustad Zaki baso-basi

"insyaAllah ustad" jawek si Anun

" Okelah Nun,  ustad duluan yoo.  Assalmualikum" kato ustad Zaki

"Waalaikumussalam ustad" jawek Si Nun kasanangan.

Lah pai ustad Zaki tadi, basorak kagirangan lah Si Nun ko.  Babungo-bungo lah dalam hatinyo ko kini.  Nyo ndak manyangko saorang ustad Zaki manyaponyo.  Bagai mandapek durian runtuah Si Anun kini ko rasonyo.  Sasampainyo di rumah Si Anun ko masih sajo senyum-senyum surang,  ndak nampak lai janjang rumah dek nyo.  Dan ikolah nan tajadi takongkang lah nyo kini. Mandanga ado suaro jatuah kalaua lah amak Si Anun mancaliak.

" Ondeh nun ba a kok bisa tajatuah kau nun" kato amak Si Anun mangaja ka lua

"aduh mak sakit" kato Si Nun

"Ndeh kok bisa jatuah kau nun, sajaleh ko ado janjang di sikoa.  Maso ndak nampak dek kau, kama se pangana kau ko? " garutua amak Si Anun sambia managakkan si Anun

"Ndeh mak, namo nyo musibah sia nan tau mak" jawek Si Anun sambia bajalan ka kamarnyo.

"Ado-ado se lah Si Anun ko, bisa lo tajatuah di siko bagai" kato amak Si Anun masih maggaruru surang di bawah janjang.

Di dalam kamar Si Anun langsuang malompek ka ateh kasua,  nyo masih tabayang-tabayang wajah ustad Zaki.  Yang mambuek nyo senyum-senyum surang.  Sampai ndak taraso sakik yang tadi do.  Sadang senyum-senyum mangahyalan wajah ustad Zaki masuaklah amak Si Anun ka kamar.

" Nun manga kau nun senyum-senyum surang se tasapo kau dek jatuah di janjang tadi? " tanyo amak si Anun

"Amak ko ado-ado se mah.  Sia yang senyum-senyum surang dek Amak? " jawek Si Anun baduto

" Yo lah tu,  amak nio nyampaian iko ka Anun a.  Ado anak Pak Ridwan tu ma, kalau ndak salah namo anaknyo Zaki" alun sampai amaknyo ngecek lah nyo potong lo di Si Anun ko

"Ustad Zaki kecek amak? " tanyo Si Anun ndak saba

"Iyo ustad Zaki tu" jawek amak si Anun

"Manga ayah nyo kamari mak? Tanyo Si Anun panasaran.

"Pak Ridwan tadi manyampaikan ka amak bahwasanyo si Zaki ko baniek ingin manikahi Anun" jawek amak Si Anun serius.

"Lai sabana e tu mak,  lai ndak salah danga amak? Tanyo si Anun

" Ma lo amak ka salah danga nun, bisuak Pak Ridwan dan keluarganyo akan pai ka rumah awak untuak maminang kau Nun. Lai basadio kau Nun? " tanyo amak Si Anun

" Lai mak" jawek Si Anun kasanangan

" Ondeh girangnyo kau lai Nun,  suko kau ka ustad tu kiroe patuiklah ndak ado urang nan cocok samo kau salamo ko.  Patuik lo lah kau rajin lai pangajian" kato amak Si Anun menembak isi hati anaknyo

"Iyo mak, Nun iyo suko samo ustad Zaki ko mak.  Nyo beda dari laki-laki lain mak,  ditambah lo ustad Zaki ko sholeh lo dek amak.  Sia padusi nan ndak nio samo inyo mak" jawek si Anun

"Kalau yo baitu kecek Anun, mudahlah pakaro nyo bisuak tu" Jawek amak Si Anun tanang

Bisuakan hari nyo datanglah kaluarga ustad Zaki ka rumah si Anun

"Assalamualikum" kato Pak Ridwan

"Waalaikumusalam,  masuaklah Buk,  pak,  nak, Zaki" jawek amak Si Nun sambia mampasilahkan tamu masuak. Mulailah pinangan, ustad Zaki nampak malu-malu maliek Si Anun, baitu pulo si Anun.  Anun ndak mamyangko ustad Zaki ado raso yang samo lo ka inyo kironyo.

" Ba a Nun lai batarimo pinangannyo nun?  Tanyo Pak Ridwan

"Insyaallah pak, Anun siap manarimo ustad Zaki

"Alhamdulillah" kato urang di dalam rumah tu sadonyo

"Jadi tingga manantuan hari se lai nak Buk" tanyo Pak Ridwan ka amak Si Anun

"Iyo pak,  awak manuruik se bilonyo nyo pak" jawek amak si Anun

" Kok dapek yo sacapeknyo lah nak Buk,  bia ndak manjadi fitnah"

"Bilo kiro-kiro tu pak? " tanyo amak si Anun

" Kalau hari jumat ba a Buk?  Tanyo pak ridwan

"Ndak ba a do pak,  tapi lai ndak talalu capek tu pak.

" Raso ambo iyo sih Buk,  tapi iBuk ndak usah mamikian persiapan parnikahannyo, bia kami se yang maurusnyo Buk" kato Pak Ridwan.

"Kalau kayak itu kecek Pak Ridwan ambo setuju-setuju se nyo" kato amak Si Anun maiyoan saran Pak Ridwan.

Akhirnyo dapeklah kasepakatan parnikahan Si Anun jo ustad Zaki diadokan Jumat bisuak.  Lah dapek kasepakatan babaliak lah pulang keluarga ustad Zaki

" Baiklah kesepakatan lah dapek,  kami pamit lo pulang ka rumah lai Buk untuak maurus sagalo kaparluan" kato Pak Ridwan

" Baiklah pak" jawek amak si Anun

Lah ampek hari balalu hari nan ditungu-tunggu pun tibo. Panikahan bajalan khidmat, dan akhirnyo Si Anun jo Ustad Zaki lah sah manjadi pasangan suami istri.  Dalam hati Anun sangaik basyukur kapado Allah karano lah mangabuan doa-doanyo salamo ko.  Manikah tanpa pacaran untuak manghindari dari doso. Cinto ndak paralu dicari karano cinto lai ka datang juo.

*Mahasiswa Sastra Minangkabau Unand