Carito Sagalo Tigo (2)

Carito Sagalo Tigo (2)

Oleh TE Radjo Boedjang

Lah tadanga bunyi rabab takaik jo nan sagalo tigo tu? Ado kok tungku jo tali saliang barabuik lahan? Saliang baradu sandiang? Saliang hujjah?

Atau sabalieknyo? Lai kok kuek tagak tungku? Jaan-jaan tungku lah mulai teleang. Mungkin dek batu idak samo gadang? Duduak idak samo randah. Tagak idak samo tenggih.

Apokah padek pilin tali? Bukan dak mungkin pilin tu lah mulai bakisa. Dek ulah ado tali nan maraso labieh gadang, bisa sajo pilinan tagaduah. 

Nan jaleh, tungku jo tali mamacik hukum surang-surang. Niniek mamak mamacik tali adat (hukum adat), alim ulama mamacik tali syarak (hukum agamo Islam), dan pemerintah mamacik tali undang (hukum negara).

Masiang-masiang bajalan di tali surang-surang. Idak badolu bakudian. Idak baikik bakaralahan. Tingga dek kito nan basamo manukiek an palakaro, di hukum mano sangketo barado?

Jan sampai cadiek pandai (pemerintah) mamasoan palakaro sako pusako jo hukum negara. Gawa kito dek e.

Sangketo tanah ulayat, contohe, taruih se dianggap jadi batu panaruang investasi. Maleh urang mananam pitih di nagari kito karano maleh kalebuik urusan tanah! Iyo kok baitu?

Tanah ulayat, apolai tanah pusako tenggi, adolah milik kaum yang komunal. Jaan ka manjua, manggadai pun hanyo dibulieh an apobilo ado tigo pakaro. Mayik tabujue di tangah rumah, Rumah Gadang katirisan, atau Gadih Gadang alun balaki. 

Mayik tabujue di tangah rumah maknanyo adolah apobilo ado "malu" nan mancoriang kaniang suatu suku. Mako balaku di siko pitih palampok malu. Bulieh manggadai.

Rumah gadang katirisan, maknanyo adolah apobilo ado kebutuhan primer nan dak bisa ditutuik jo pitih dalam puro atau dama di ateh pagu. Bulieh manggadai.

Kok Gadih Gadang alun balaki, kan lah tarang nah. Jikok ado kamanakan padusi nan alun juo dapek junjuangan, bulieh manggadai untuak mampalakian kamanakan tu.

Baitu pulo, jan sampai pulo alim ulama maukue pemerintah jo hukum agamo, dak ka basuo rueh jo buku. Nan ado, palakaro baru nan katajadi.

Urusan pemerintah, nan mamacik tali undang (hukum negara) tantu maurus sagalo urang, idak hanyo nan baugamo Islam. Kok pemerintah salah, jan diukue jo ayat dan hadist, tapi ukue jo tali undang. Bilo ado nan salah, ado PTUN untuak palakaro administrasi. Ado pulo MK kok ka mampakaroan undang itu bana. 

Nan banyak tajadi balakangan ko, pemerintah dihujjah jo tali syarak (hukum agama Islam). Atau diampai jo tali adat (hukum adat). 

Antah kok baudang di baliek batu? Atau, kok idak ado barado tak kan tampuo basarang randah. Nan jaleh, urusan mamakaikan hukum tu acok bana mambuek gampo. Mambuek masyarakat bagajolak.

Lah bagalanggang mato rang rami, kutiko satitiek lah dilawikkan, sakapa lah digunuangkan. Antah kok salah sangko jikok disabuik an patalian tigo tali tu dibuhue jo politik? 

Urusan pemerintah malakuan hukum negara. Urusan niniek mamak malakuan hukum adat. Dan urusan alim ulama malakuan hukum agamo Islam.

Jaleh tipak-tipak surang-surang. Sawah bapamatang, ladang babintalak. Jan mamangkue sawah urang. Usah manokak ladang kawan.

Tapi dek sumangek--bisa karano politik dan mangaja kuaso, bisa pulo disababkan motif ekonomi, dll--tungku tagaduah. Tali bakisa. Di situlah cilako tumbuah. 

Kok di Sumbar, di situlah pituah "Tuah sakato, cilako basilang" dapek ujian. Sungguahpun basilang kayu mako iduik api, tapi cilako nan tajadi jikok pasilangan kayu mambaka dapue. Mambaka rumah gadang!