HOME LANGKAN CARITO

  • Kamis, 19 Desember 2019
BASAMOLAH
Carito

BASAMOLAH

Oleh: Muhammad Nur Islamadina

BARAMULO kisah ka bamulai, iko carito tantang pihak katigo nan ka mausai kaluarga ketek nan jolong manjadi. Talak Tigo! Amak Raka babicaro. Apo mukasuik ado pihak nan mulai ‘mausai’ kaluarga ketek ko? Baa kok Amak Raka manyuruah bacarai Raka jo Rinai? Apokah Rinai kuaik dalam manjalani atau inyo nan mamintak ‘basudahi’ janji nan suci tu?

Ado sabuah antaronyo yo duo insan nan banamo Rinai padusi tu, kok nan bujang banamo Raka. Inyo nan dari jorong nan badakekan dalam nagari nantun. Nan ciek jorong Bungo, nan ciek lai jorong Munggu. Kok nan Bujang anak nan dari Zuhri ayahnyo, amak e banamo Eti. Nan Gadih anak dari Maosen, amak’e banamo Sanai.

Alah batimbang-timbang tando antaro kaduo pihak nantun. Amak nan dari si Gadih tu, bakandakan Raka untuak manjadi imam si Rinai. Dek kato harok nan lah manjadi mupakaik antaro duo kaluarga nantun, dibueklah alek nan bukan sumbarang alek, alek banamo si alek gadang, duo hari duo malam alek bajadi, tibolah nan patah datang alah batungkek, nan buto datang alah bairik, di lurah urang alah mandaki, di bukik urang alah manurun.

Kutiko janji suci lah bakabek arek samaso itu antaro Raka jo Rinai, basumpah untuak manampuah dalam bahtera rumah tanggo. Janji baganggam taguah dangan iman jo taqwa untuak mandapek barakaik nan katibo.

Adaik di Minangkabau laki-laki nan tingga di kaum padusi, manjago jo mamaliharo harato bando pusako. Raka jo Rinai nan barasa dari urang nan indak barado mako ditampuahlah marantau dek kaduonyo. Rinai manuruik jo bicaro. “Diak kanduang Den sayang, lai namuah adiak manuruik Uda pai ka tanah subarang, sabab manggaleh di sanan?” Raka bakato. “Lai Da, ambo manuruik sajo, nan dek amak baitu pulo Da” jawek Rinai dangan hati sanang. Dek karano lah tantu ujuang pangkanyo, inyo barangkek saminggu sasudah alek tapeknyo hari sanayan pukua sambilan, Rinai nan lansuang dibao ka tanah Jao dek Raka, sabab inyo nan lah manggaleh baju di pasa.

Subang, Jawa Barat adolah rantau nan ka ditampuah dek inyo baduo tu. Duo hari samalam ateh oto lamonyo di jalan ndak mambuek Rinai sadiah takah sabalunnyo. Kok dahulu samaso Rinai ketek lah acok pulang – pai ka Jao, tapeknyo di Bekasi surang diri nan batitipan jo urang nan samo pai ka Pauhkamba. Kini Rinai nan lah ado mangawani salamo di pajalanan nantun. Sambia bacurito tantang maso nan lamo baduo, tibolah oto nan ka mambao inyo. “Lah, lah masuak-an barang nan ka dibaok ka bagasi oto” kecek si Tokar tu, kapado panompang lain. “Padek bana ko oto, panuah di atok oto, urang bakirim tu nak?” kecek Amak nan di sabalah Rinai batanyo ka Tokar tu. “Iyo, Mak, iko banyak urang bakirim di Piaman Tiku jo Sungai Limau” jawek e. “Oh.. Kok baitu, lai ndak panuah di dalam tu?”. “Indak Mak, basugirolah manaiak-an barang Amak tu, Oto kabarangkek lai”. Sasudah manaiakan barang ka bagasi, Rinai jo Raka duduak nan kaduo dari muko.

Oto nan dinaiakan inyo baduo banamo Po. Transport Express tambang ka Medan, Bukittinggi, Pariaman, Lubuk Basung, Jambi, Sarolangun, Bukit Kemuning, Baturaja, Lampung, Merak, Tangerang, Rawamangun, Pulogebang (terminal nan baru kini), Bulak Kapal, Bekasi, Bogor jo Bandung. Ikolah oto primadona rang Piaman samaso itu, bahkan sampai kini oto tu tatok eksis.

Tibolah malam nan tangah malam di ateh oto, Rinai nan tajago, tasentak, mimpi buruak malah mangko katibo. Sanan bakato Rinai mangko baitu. “Pasti mimpi buruak tu kan?”. “Iyo Da, Rinai bamimpi dicakiak urang, apo mukasuik e tu Da?”. “Uda nan indak paham untuak itu Diak kanduang denai, mako baitu bacolah do’a daulu kok ka lalok tu”. “Alah ma tadi Da” jawek Rinai. Rinai bagumam surang diri, apolah tando mimpi ko mambuek ndak bisa lalok? Mimpi bak cando dicakiak dek urang ko. Balun sampai ka tanah Jao, lah ado pulo tando-tando ko. Mudah-mudahan jauah-jauahlah buruak nan ka datang.

Alah duo hari samalam Rinai jo Raka manampuah lintas Sumatra dangan salamaik. Tibolah inyo di terminal bis Rawamangun pado hari rabaa pukua ampek pagi, manurunan barang dari bagasi. Dicarilah dima tampek manyimpan barang tu dangan sugiro, beko tatuka, kok nan malang diambiak dek ughang lain. Sasudah maambiak barang, Rinai jo Raka lansuang pindah naiak oto angkot tambang Pulogadung, di sanan tadapek oto tambang ka Cirebon banamo Po. Luragung Jaya, oto ko malinteh di tampek Raka manggaleh daerah Subang.

Kutiko lah sampai di Pulogadung, Raka jo Rinai manunggu oto tu salamo sapuluah minik, tapi sabalun pai ka Subang. Inyo baduo, sumbayang subuah daulu, sabab alah masuak wakatu. Sasudah sumbayang jo maisi paruik, inyo baduo manaiki oto Luragung tu, lah bajalan oto nantun diminta pulo ongkoih e. Sudah tu, oto bajalan dangan sangaik capek, kecek urang di sanan oto ko raja ne dalanan Pantura (Rajanya jalanan Pantura) samaso itu. Duo jam lamonyo di ateh oto salamo ka Subang naiak oto tu.

Tibolah inyo baduo di Kab. Subang bagian pantura (pantai utara). Raka jo Rinai tingga di kampuang baru, manggaleh baju di pasa lamo dakek rumah, banyak urang nan manggaleh di sanan. Banyak urang nan dari kampuang ulakan nan marantau di siko, lah dapek juo dek Rinai kawan nan sarangkek. Sabab dek Raka lah lamo juo dahulunyo di rantau ko.

****

 Alah satahun inyo baduo hilia jo mudiak mancari paruntuangan. Manggaleh baju tu nampak akhia nan rancak. “Alhamdulillah.. yo Da, kito lah ado untuak panyimpan di maso nan katibo.” “Iyo.. Diak, kito pabanyak baa badoa ka nan kuaso untuang kok isuak batambah razaki kito.” “Aamiin.. Da.” Toko baju’e lah pindah ka nan ancak jo strategis kecek urang kini, baranjak dari pasa lamo ka pasa inprees atau pasa kulon (barat) kecek urang siko.

Lah salamo itu pulo manantian maso kanduangan Rinai, akhianyo nan dinanti alah tibo. Raka jo Rinai mandapek razaki lain dari nan Satu buah cinto lah lahia parmato sayang nan manih kamba. Nan surang banamo Rina, surang lai banamo Rini, namo ko alah basiapan dek Raka samaso bujang dulu.  

****

Carito baraliah hanyo lai, kutiko Raka nan acok pulang jo pai ka rumah kakak e nan di Sukasari. Inyo nan suko mandanga kato kakak, nan kakak dapek pasan dari amak di kampuang, untuak manyuruah Raka bacarai. Rupo’e Amak Raka ko nan indak suko bakeh Rinai, inyo nan mamintak ubek ka dukun samaso itu. Nan Raka barek manimbang tantang itu, inyo nan haruih mamutuihan kato nan sapatah untuak maso nan ka tibo.

Raka lansuang manuruik apo pintak dari Amak’e. Salapeh dari itu, Raka nan lansuang bataruih tarang ka bakeh Rinai, apo nan didapek Raka dari sanan.

Baa, kok Uda ka mamintak carai ka bakeh denai Da? Maaf bakato Da, apo Uda disuruah dek rang gaek Uda mangko sampai mangecek mode tu? Iyo padiah hati denai Da, apo kato urang nan banyak Da, anak  lah lahia, nan kok Uda lamak mangecek mode tu, indak ko ibo Uda kabakeh badan denai jo si buah hati ko? Jawek tanyo denai ciek-ciek da.”

“Pikia dek Uda, nyampang kok Uda tagamang di tangah jalan, hilang ka mano ka denai turuik, mungkin manguruih ka bakeh badan. Basamolah Da, apo nan diraso bia kito samo manangguangkan usah rang gaek sampai tau apo nan kito raso. Kito samo-samo manjalani kahidupan nan ko dangan sagalo kaadaan apo pun Da.”

            “...” Raka nan indak manjawek.

            Rinai nan mamintak tolong, bakaluah kasah ka ajo’e nan ado disinan. “Yo.. jalan tangah’e mari kito bamufakaik daulu untuak sagalo ko, bia nak tarang hitam putiah ko.” Datanglah dari pihak Raka. Antaro kaduo balah pihak, mamastian jo maagiah jalan kalua nan elok, sabab iko manyangkuik duo kaluarga jo duo kaum nan babeda. Akhianyo nan alah nampak dari musyawarah nan lah balakuan, hampia bana ko, janji suci nan lah dibuhua mati sabalunnyo ka putuih, alah bauleh baliak. Sahinggo, hal nan buruak tu lah jauah dari kahidupan Raka jo Rinai. Sabab, Raka nan mamutuihan sadoalah’e, imam dalam rumah tanggo inyo baduo.

****

            Amak Raka kian kamari lah mulai mamikian, apo bana nan lah dipabuek tu kabakeh rang rumah Raka. Alah sadar jo nan apo balakuan sabalun’e. Nan lah sudah bialah sudah, kito jalani maso kini jo maso nan katibo.

 

*Mahasiswa Sastra Minangkabau Universitas Andalas


Wartawan : MUHAMMAD NUR ISLAMADINA
Editor : bahren

Tag :# Langkan # curito #minang