BABANA KA AMPU KAKI-BAUTAK KA PANGKA LANGAN

BABANA KA AMPU KAKI-BAUTAK KA PANGKA LANGAN

Oleh : Haditsa Vania (Mahasiswa Sastra Minangkabau Fib Unand)

Pulang sikola tapeknyo sasudah zuhur, satibonyo di rumah Si Keysha langsuang ambiak hp untuak manalepon Ama nyo, lamo Ma pulang lai katonyo di telpon. Tu nyo jaweklah dek Mama nyo, iyo Nak, Mama masih di kantua masih banyak karajo mungkin pulangnyo sore atau maghrib, baa tu nak? Keysha ado PR tadi di sikola, kato Ibuk guru cubo cari apo arati Babana ka ampu kaki, ba utak ka pangka langan. Oh cubo lah tanyo ka Nenek atau ndak ka Abang di rumah yo nak!, yo ma kato Si Keysha ka Mama nyo. Siap tu nyo cari lah dek Si Keysha abang nyo, ruponyo Abangyo alun pulang sikola lai, tu nyo cari lah Nenek nyo dek Si Keysha, lah sobok jo Nenek nyo yang baru pulang dari Surau, langsuang lah ditanyo dek Si Keysha ko ka Nenek nyo. Nek, Keysha ado PR tadi disuruah Ibuk di sikola tu bisuak dikumpuan, Keysha ndak tau arati nyo do Nek, tadi lah Keysha talepon lo Mama tapi kato Mama nyo lamo pulang lai cubo tanyo ka Nenek atau ndak ka Abang, Abang alun pulang lo sikola lai. Tu nyo jaweklah dek Nenek nyo ka Si Keysha apo PR nyo tu? Nyo jaweklah dek Keysha kato ibuk guru cubo cari apo arati babana ka ampu kaki, ba utak ka pangka langan. Oh itu PR nyo, bia Nenek jalehkan ka Keysha yo danga elok-elok dih.

Babana ka ampu kaki, ba utak ka pangka langan tu aratinyo Seseorang yang mudah tasingguang dan mudah bacakak karano hal ketek. Di dalam katantuan-katantuan ukua jangko kato cako diiriangi pulo jo kato-kato nan lain, baik sasudah atau sabalunnyo ado mamangan nan babunyi

Nak haluih baso jo basi

Jan barundiang basikasek

jan bakato basikasa

jan bataratak bakato siang

mahariak mahantam tanah

jan babana ka pangka langan

usah bautak ka ampu kaki

Pandai maagak maagiahkan

budi baik baso katuju

muluik manih kucindan murah

Makasuiknyo, sadapek mungkin kito iduik di dunia nangko hindari kato kasa jo manyakikan, bakatolah jo sopan santun panuah karamahtamahan. Batanyo lah Si Keysha ka Nenek nyo baliak, kalau Ukua Jangko tu apo Nek? Nyo jaweklah dek Nenek nyo ka Si Keysha, yang dimakasuik Ukua Jangko dalam Adaik Minangkabau adolah katantuan-katantuan yang manjadi ukuran (ukua) dan hinggaan (jangko) yang patuik diamalkan dek satiok individu di Minangkabau.

Ukua Jangko tu ado salapan macam, yaitu :

1. Nak luruih rantangkan tali

2. Nak tinggi naiakkan budi

3. Nak haluih baso jo basi

4. Nak elok lapangkan hati

5. Nak taguah paham dikunci

6. Nak mulia tapati janji

7.Nak labo bueklah rugi

8.Nak kayo kuek mancari

Kalau sakironyo Ukua Jangko yang salapan macam tasabuik dapek dilakukan dek seseorang dalam hiduik ko sacaro paurangan maupun sacaro bamasyarakaik, mako batamulah manuruik kaedah adaik :

Kok mamahek lah dalam barih

Kok batanam di dalam paga

Tapi kalau sakironyo indak dilaksanakan juo, adaik  mangatoan :

Bakato bak balalai gajah

Bicaro bak katiak ula

Babicaro kapalang aka

Bapikia saba tak ado

Bailimu kapalang paham

Rumah tampak jalan tak tantu

Angan lalu paham tatumbuak

Aka panjang itikad salah

Ukua sampai jangko alah sudah

Hari tibo hukuman jatuah

Di akhirat sajo mangkonyo tahu

Tuhan sandiri manantukan

Jalan dialiah dek rang lalu

Cupak dirubah rang manggaleh.

Lah sudah Nenek nyo manjalehan kasadonyo ka Si Keysha, nyo tanyo lah dek Nenek ka Si Keysha, baa lai paham Keysha dari yang Nenek jalehan sabanta ko? Tu nyo jawek dek Si Keysha Insyaallah lai Nek. Pasan Nenek ka Keysha, baraja lah sungguah-sungguah di sikola palajari tantang adaik jo budaya minangkabau, kok ado PR disuruah guru jiko indak mangarati Keysha tanyo sajo ka Nenek. Yo Nek kato Si Keysha ka Neneknyo.