HOME LANGKAN CARITO

  • Senin, 9 Desember 2019
Anyuik Labu Dek Manyauak  Hilang Kabau Dek Kubalo
Carito

Anyuik Labu Dek Manyauak

 Hilang Kabau Dek Kubalo

Oleh: Hensi Putri*

Pagi marupokan awal dari kahidupan sagalo makhluk di bumi ko. Di mano pagi marupokan awal baru untuak mangarajokan kagiataan. Dan  pagi juo, marupokan  awal dari razaki nan dibarikan tuhan kapado hambo nyo. Jiko pagi lah wak tolak razaki tu, baa caro nyo awak ka manjapuik lai baitulah kato urang-urang tuo dulu, sahinggo urang tu dulu kalau lah bakukuak ayam pagi barati patando razaki lah turun dari Tuhan nan maha kuaso. Jadi kalau lah tibo azan subuh jo ayam bakukuak jan lalok lai, beko razaki tu indak datang ka awak do. Tapi makasuik subana nyo adolah bia awak indak lalai dalam malaksanakan kawajiban sabagi hamba dan indak lo lalok siap subuh tu supayo panyakik indak datang awak, dan awak bisa mancalik apo nan bisa di karajoan untuk mancari nafkah.

Urang lah mulai kalua dari rumah nyo untuak bakarajo aaupun untuak sakolah karano hari ko hari Senin, jadi urang pai dari rumah pagi-pagi supayo jalan indak macet dan indak talambek. Anak-anak sakolah lah siap-siap jo baju saragam nyo untuak malaksanaan upacar bendera di sakolah. Namun, babeda  samo Rusdi, surang anak bujang tangguang yang masih duduak di bangku kelas duo SMP nan lataknyo indak jauah dari rumahnyo. Sainggo inyo bisa bajalan dari sakolah ka rumah nyo. Namun, hari ko inyo indak smo pai jo kawannyo nan lah duluan rapi pakai baju sakolah. Inyo masih juo lalok bagaluang jo kain, lalok  di biliaknyo.

Ayam kumbali bakukuak mangingek an kalau pagi lah mulai manjalang, lah tibo wakatu nyo untuak mangarajokan kagitaan. Namun dek Si Rusdi, ayam bakukuak tu manjadi  nyanyian untuak nyo tambah lalok lamak. Sinar matoari lah mulai masuak malewati lubang di ateh jendela bilik Rusdi. Namun tatok sajo Rusdi indak namuah jago, samantaro di balik pintu suaro amak Rusdi maimbau indak di dangaan nyo.

“ Rusdi .. indak jago ang ?!! lah jam bara ko .. indak ka sakolah ang” kato amak Rusdi dari balik pintu biliak nyo sambia manjagoan anak bujang bungsu nyo ko..

“ iyoo.. tunggu lu mak” jawek Rusdi dari dalam biliak nyo, namun tatok sajo inyo indak jago do.. malah tambah nyo salimuik nyo no badan jo kain lalok.

“ capek lah.. amak ka pai karajo lai.. beko sabalum pai sakolah ang makan dulu yo!.. nasi lah mak latak an di dalam tuduang” kato amak nyo sambia lah rapi pakai baju dinas nyo.

“ iyo mak ..” jawek Rusdi dari dalam. Dek picayo kato Rusdi amak nyo pai ka rajo ka kantua. Amak Rusdi bakarajo sabagai staf di kantua kacamatan. Jadi harus pai pagi karano ado upacara lo nan di ikuikan dek amak nyo.

Namun jam balalu juo, matohari lah naik sapanggalan manunjuk an kalau  hari lah batambah siang. Urang lah mulai baistirahat untuak makan siang. Nan Rusdi tatok sajo bagaluang di dalam bilik nyo. Lah babunyi HP nan talatak di ateh kapalo nyo barulah Rusdi bangkik dari kasua nyo. Sambia manjawek talepon tu dangan mato mangantuak. Namun sasudah inyo mandanga kato dari subarang talepon, barulah mangantuak nan manggantuang di palupuak mato nyo hilang sakatiko. Langsuang jo kalua paluah dingin nyo cameh dek karano  taingek kato kawan nyo, nan manalepon mangatoan kalau ibu wali kelas nyo ka pai ka rumah nyo dek gara-gara Rusdi alah saminggu indak pai ka sakolah.  Takuik kalau HP nyo di ambik. Baru sabulan inyo dapek HP ko dari ayah nyo nan mambalian dek gara-gara inyo dapek juara tigo di sakolah.

Dek gara-gara itu langsuang jo inyo kalua mancalik kalau wali kelas nyo kalau lah sampai di rumah nyo. Rupo nyo wali kelas no alah sampai dan mangecek samo mamak di  bangku lua rumah. Rusdi  hanyo bisa mancigok sajo dari balik  pintu yang di bukak an nyo saketek untuak mancalik apo nan tajadi di lua. Sasudah wali kelas nyo, mangecek jo mamaknyo Rusdi pun indak tau apo yang disampaikan dek wali kelas nyo ka mamak nyo do. Satalah itu, wali kelas nyo pun pai. Dan kini tibolah Rusdi nan kanai panggia dek mamak nyo. Tapi untuang lah bagi Rusdi yang mangecek samo wali kelas nyo adolah mamak nyo.

“ Rusdi kamari dulu” kato mamak nyo maimbau Rusdi nan sadang mancigok dari pintu. Rusdi pun manuruik mamak nyo dan duduak di sampiang mamak nyo di ateh kursi kayu.

“ baa ko indak sakolah ang? Tanyo mamak nyo dek mancalik Rusdi tapakua se ka bawah sambia mamaciak HP di tangan nyo. Rusdi hanyo diam sajo, indak tau ka manjawek apo. Karano  lah saminggu inyo indak sakolah dek a karano batanggang mamainan game mobile legend  nan sadang takenal dek a anak-anak sakolah sahinggo lah tadanga urang azan bakumandang di masajik barulah Rusdi  malatak an HP no dan mulai lalok.  Jikok jago nyo tangah hari HP ko langsuang nyo iduik an  dan mulai balik sampai amak nyo pulang jo abang nyo jam limo sore barulah baranti subanta,  siap tu nyo lanjuik an lo balik main game nyo.

“main HP buliah tapi ingek wakatu jan sampai dek HP ang tu ang lupo ko wakatulah saminggu ang indak sakolah manga se ang salamo saminggu tu? Main HP? Tanyo mamak nyo. Namun Rusdi diam sajo karano indak ado kato nan manjadi jawek untuk tanyo mamak nyo tu

“ ingek ang baru sakolah baru-baru jan sampai tapangaruah sakolah ang dek nyo. Patang ko ang baru juaro tigo baru jan lalai  lo mentang-mentang ang juara tigo. Ang kana lo amak ang nan payah mancari pitih untuak sakolah ang jo abang ang tu..jadi jaan main-main juo lai, lai takana dek ang tu “ kato mamak nyo manesehati kaponakannyo nan bau gadang tu

anyuik labu dek manyauak, hilang kabau dek gubalo lai tau ang makasuiknyo tu” tanyo mamak nyo ka Rusdi

“ indak mak” jawek Rusdi sambia tetap manakuaan kapalonyo

anyuik labu dek manyauak , hilang kabau dek gubalo tu makasuiknyo dek mandahuluan urusan yang kurang pantiang sahinggo sasuatu yang pantiang tatingga deknyo.. takah sakolah ang ko dek gara-gara main tatingga sakolah deknyo. Utamoan dulu yang pantiang jan beko manyasa kamudian.

“ iyomak “ jawek Rusdi

“ bisuk lai kapai sako lahang? Tanyo mamaknyo

“ iyo mak bisuk wak sakolah “ jawek Rusdi

 

*Mahasiswa Sastra Minangkabau Universitas Andalas


Wartawan : Hensi Putri
Editor : bahren

Tag :# Langkan # curito #minang