HOME LANGKAN CARITO

  • Kamis, 26 September 2019

"Mamak" Pisau Bamato Duo

Carito
Carito

“Mamak" Pisau Bamato Duo

 

Oleh: M. Nanda Arisandi *

 

Tadanga lambuik suaro mandeh Saridah mandendangan si Upiak yang sadang dibuai untuak ka lalok. Alah laruik malam si Upiak payah juo mamiciangan mato sampai akhia nyo lalok lah si Upiak ketek di pambuaian. Malam tu hanyo baduo mandeh Saridah jo si Upiak tingga di rumah nan apak nyo si Upiak malamko sadang pai ba main saluang ka Subarang aia namo nagarinyo cukuik jauh jalan ditampuah sampai payah untuak pulang. si Udin saluang galannyo apak si Upiak, urang tanamo dek pandai basaluang.

Pagi ari nyo tadanga salam dari laman rumah, bukak lah pintu dek mandeh saridah pintu rumah, nampak mamak bajalan ka rumah bagageh lah mandeh Saridah mangambangan lapiak pandan, dibukak pintu disuruah lah mamak duduak, sudah tu diambiakan lah sacangkia kopi diagiahan ka mamak, batanyo lah mamak ka bakeh mandeh saridah “oh yo saridah baa kaba kau kini, dima laki kau nyo baa kok dak ado nampak dek mak ?” ragu mulai lah mandeh saridah manjawek “ inyo a ado dipanggia urang mak, ba main saluang ka nagari subarang aia mak dari ari senayan patang, tujuah hari disinan di tigo tampek urang baralek”. Sasudah mandanga itu berang lah mamak “ apo nan kau kecekan alah duo hari jo kini, baduo jo kau jo si Upiak di rumahnyo. Baa kok dak mangecek bagai kau ka mamak kau ko, indak tapikia bana inyo ka maninggan kalian baduo disiko, dak tau kok malang nan tibo sia nan ka tau, aden salaku mamak bagai indak mangecek nyo do, baa kok harus itu bana karajonyo ko  sawah jo ladang bia den agiah karajoan lah, dari dulu den kecekan ka laki kau tu Saridah, jo apo bana anak kau tu makan jo pitih bamain saluang tu ?”. sakatiko ta tunduak lah Saridah dijawek saketek “ iyo mak, tapi ambo indak malarang apo karajonyo mak salagi halal juo, nan inyo lai ma agiah nafkah juo nyo, kok malang nan mamak sabuik jo tuhan nan kuaso malah kami balinduang.” Dak lamo tadanga tangi si Upiak dari buaian lalok, bagageh lah mandeh ma ambiak si Upiak, dicaliak lah dek mamaknyo si Upiak, mangecek lah mamak nyo ka Saridah,sudah pai lah mamak nyo pulang baliak karumahnyo.

Raso dalam hati mamaknyo tetap indak juo satuju kalau kamanakan nyo iduik bak cando itu juo, dulu pun juo mamak nyo indak katuju juo. Tapi kamanankan ciek ko padusi ibo mancaliaknyo basadiah hati, alun kaba dari urang mangatoan kaba kaba buruak ka mamak tukang saluang jo tukang dendang nagari sinan tu, sampai malu bagai dibueknyo, apo lai sampai tau kamanakan nyo Saridah kalau laki nyo bacandu itu di nagari urang. Mangko dibuek lah rancano dek mamak nyo. Bisuak nyo jumai’k sanjo dibuek lah kaba buruak dek mamak ko mangatoan baso laki Saridah ko maningga dibunuah urang bacakak dan mayaik nyo dibuang katapi ngarai, sarato dibaok lah saksi yang dibayia dek mamaknyo, untuak manguekan kato mamaknyo tadi ko. Langsuang pacah tangih mandeh Saridah mandanga barita tu, raso indak picayo jo kato mamak nyo itu, “ indak mungkin do mak, raso denai lai sehat juo inyo disinan nyo mak” jawek mandeh Saridah. Dibantah langsuang dek mamaknyo “ apo juo lai Saridah, iko lah ado urang yang manyapaian ka mamak, maso laki kau tu lah maningga”. Dipangku lah si Upiak titiak ayia mato mandeh Saridah ta isak- isak dek tangih urang disayangi alah tiado, bakato lah mamak ka bakeh mandeh Saridah “ kini kau kameh lah kain kau, bisuak bia den antaan kau ka padang panjang ka tampek uni kau, dak lo tacaliakan dek den beko kau jo anak kau do” bujuak mamak nyo, manyuruah mandeh Saridah pindah jo anak nyo. Di kumpuan sagalo kain yang ado jo alaik paragaik raso indak ka mungkin pulo induik baduo diri dirumah, di gendong lah si Upiak jo tangih barangkek pagi bisuaknyo, kaduo di caliak laman rumah banyak curitonyo. Barangkek lah mandeh Saridah ka padang panjang.

Wakatu capek balalu, si Upiak yang dulu ketek kini lah manjadi anak gadih gadang banomo Zainab pambarian mandeh Saridah. Sia nan indak tau urang kampuangnyo jo si Zainab anak gadih rancak, lambuik bahasonyo, sopan santun jo adaiknyo. Kini Zainab tingga jo eteknyo uni Silai namonyo inyo iduik surang pulo ditinggan dek lakinyo dek karano alah bacarai, mandeh nyo alah maningga samaso Zainab ketek, sakik ba kapanjangan dek mandanga kaba apak nyo maningga, alun juo hilang bakeh dalam hati mandehnyo. Kini Zainab alah gadang alah ngarati jo apo yang tajadi. Walaupun mode tu Zainab tetap majalanan iduik digadangan dek eteknyo, ba karajo batanun di rumah. Dek rancak jo lambuik hasia kain tanunnyo, banyak lah urang suko jo hasia kain tanun Zainab. Kadang sampai ado urang yang datang manaruah harago maha untuak kainnyo. Jo itu lah Zainab jo etek nyo bakarajo mancari pitih.

 Sampai di suatu hari ado lah alek nagari pesta adaik di nagari tu. Acara anak nagari manguekan adaik basamo anak-anak mudo, mangka kaba pun sampai ka sagalo nagari dan ka nagari sabalah nyo kaba pun sampai. Di undang lah sagalo anak muda bisuak nyo datang. Sanjo nyo ari Zainab yang jarang kalua rumah dibaok lah dek eteknyo pai mancaliak alek nagari, yang kabanyo akan ado panapilan saluang yang alah lamo indak ado dimainan urang. Mangko malam tu pai lah kaduo nya ka balai nagari, urang alah rami bakumpua manyaksiaan mulai dari randai, silek dan sabagainyo. Mangko sudah tu lah tibo lah diacara dendang saluang dimainan, duduak lah tukang saluang jo tukang dendang baduo dinyanyian dendang paimbu, lamak di danga tanang urang dibueknyo.

 Sasudah tu ditengok bana dari jauh mungko tukan saluang tambah takjuik etek Zainab di bueknyo titiak ayia mato, ma ingekan inyo ka adiaknyo yang alah maningga. Nampak lah di Zainab sarato batanyo “ baa kok mangih etek ? apo nan ta jadi ?” madok sambia taheran dibueknyo. Dibisiakan lah dek eteknyo ka Zainab “ Zainab etek raso tukang saluang tu mirip bana jo abak Zainab,tapi indak mungkin rasonyo doh mungkin dek takana etek mandeh Zainab” lah abih acara urang lah mulai usai, Jantuang etek Zainab masih badatak juo, mangko dibaok lah Zainab mancaliak tukang saluang tadi saabih acara tu. Katiko basobok, madok lah tukang saluang tadi “ assalamualaikun uni lai yo, ondeh alah lamo kito indak basuo ni, lah gadih gadang pulo anak uni kironyo” takajuik lah etek Zainab ko kironyo emang batua itu laki adiak nyo,  yang dikatoan alah mati dek mamaknyo wakatu dulu. mangko di ajak lah si Udin karumah dek etek Zainab untuak bacarito labiah.

Sampai di rumah dicaritoan lah kasadonyo baa nan tajadi sabananyo. Bakato si Udin “  Uni apo ko tau uni baa kaba Saridah kini uni, lah batanyo ambo ka bakeh mamak dahulu katonyo, Saridah pai katano jawo ka tampek dunsanak nyo dek ulah ambo, ado kecek ambo bamain cinto jo urang subarang, kok lai uni ba kaba sampaianlah kaba wak uni, masih taragak ambo jo inyo, alun anak ambo lai ni mungkin alah gadih rancak nyo kini uni” manunduak sadiah si Udin takana jo bini sarato anaknyo dulu. mangko di caritoan lah dek etek Zainab carito yang sabananyo ruponyo carito kaduo dari mamak balain kato bak pisau bamato duo, dan dicaritoan pulo yang paling marasai bana Saridah dibuek nyo sampai maningga dibueknyo, walau padiah mandanga nyo alun sampaik manjalehannyo, tapi alangkah sanang nyo juo hati si Udin padusi nan gadih rancak itu tanyato anaknyo Zainab.yang akhianyo bisa ba kumpua baliak inyo jo anaknyo anak.

 

 

*Mahasiswa Sastra Minangkabau FIB Unand


Wartawan : M. Nanda Arisandi
Editor : bahren

Tag :# Langkan # curito #minang

Baca Juga Informasi Terbaru MinangSatu di Google News

Ingin Mendapatkan Update Berita Terkini, Ayu Bergabung di Channel Minangsatu.com