HOME LANGKAN KATO

  • Sabtu, 26 Juni 2021
Pancasila, Pati Ambalau Kebhinnekaan (4)
Pancasila (ilustrasi grid.id)

Pancasila, Pati Ambalau Kebhinnekaan (4)

Oleh TE Radjo Boedjang

Salain malalui jalan agamo. Mampatantangkan tauhid. Jalan masuak urang maugah-ugah pancasila adolah jo isu hak azasi manusia, demokrasi dan kemiskinan, ketimpangan ekonomi jo keadilan sosial.

Isu hak azasi dan ekonomi (kemiskinan, ketimpangan jo keadilan sosial), apolai demokrasi, iyo sangaik mangkuih mancabiek-cabiek persatuan bangsa. Banyak negara di dunia nan pacah-pacah gegara isu demokrasi ko. 

Contohnyo Libya nan kusuik masai negaranyo karano disuok-an demokrasi. Daolu, kutiko Kolonel Khadafi bakuaso sacaro otoriter, urang Libya tamasuak nan makmur di dunia. Maklum, negara tu adolah salah satu petro-dolar--penghasil minyak. 

Karano ado mukasuik, ado udang dibaliek batu, negara lain pun mangipeh-ngipeh urang Libya; otoritarian tu manyalahi hak azasi manusia, harus ditulak. Presiden harus diparantian. Kito paralu demokrasi!

Dikipeh jo pangipeh. Ado ciek duo urang usali tapi salamo ko di rantau--nan lah dikondisian manjadi pejuang demokrasi--disuruah pulang. Urang-urang tu lah nan jadi kaki tangan urang lua (proxy) untuak marimau-rimau an demokrasi. Hanyo demokrasi nan batue. Sasuai jo hak azasi. Nan lain salah!

Galombang kasadaran demokrasi pun muncul. Politik dalam nagari mulai paneh. Khadafi pun marabo. 

Parang saudara tajadi. Dunia internasional nan pro demokrasi basamo-samo manakan Sang Kolonel. Hinggo akhienyo Khadafi takapuang, dan ditembak di dakek tampek manyuruaknyo, di kampuang halamannyo, Sirte. 

Kajadian iko tajadi di hari Kamih, 20 Oktober 2011. Pemimpin Libya nan lah bakuaso selamo 42 tahun (1969-2011) tewas di tangan pasukan oposisi, NTC (Transisi Nasional Libya). Sang Kolonel nan banamo langkok Muammar Abu Minyar al-Khadafi itu mati ditembak rakyatnyo surang.

Lalu baa Libya dek ubek nan basuok an, nan banamo demokrasi tu? Tambah maju? Tambah makmur?

Nan jaleh, kalau parang tajadi, apolai parang saudara, ujuang-ujuangnyo lah pasti nah; urang-urang nan baparang tu jatuah bansek. Seso. Sadangkan tukang kipeh jo sutradara maambiek untuang. Inyo kini nan bakuaso di balakang kulambu. Baitu hadiah demokrasi di Libya.

Lupo-lupo maingek an, lai takana jo kajadian taun limopuluahlimo? Peri-peri carito rang gaek-gaek. 

Ado Tantara Pusek--sabutan untuak TNI yang dikirim pamarentah pusek untuak mamarangi pasukan Ahmad Hosen. Ado anak nagari Minangkabau, nan tagak di tangah-tangah--antaro Tantara Pusek dan Tantara Rimbo.

Pasukan Ahmad Hosen--Tantara Rimbo--nan manguasai suduik-suduik nagari, acok mangajuik an Tantara Pusek nan buto situasi jo informasi. Kok lah malam, Tantara Rimbo bakuaso.

Tak amuah kalah, Tantara Pusek pun mararah. Baitu matoari mancogok, nyo usai sabalik nagari, mancari Tantara Rimbo nan lah manyuruak di rimbo-rimbo, atau manyamar jadi urang kampuang.

Parang sakandang lah kanamoe, nan marasai tantu kito jo dunsanak kito juo. Urang kampuang pun taniayo. Hanyo karano miskomunikasi dan garagak-garagak untuak manyaru supayo pusat ado paratian. 

Mungkin karano kipeh-kipeh urang lua juo, tajadilah peri-peri; apak malangkang anak nan tangka. Tapi kasamnyo, antahlah kok lah ilang di pangana rang gaek-gaek?

Nan jaleh kini, nan tingga hanyo carito. NKRI masih tagak. PRRI dan Permesta untuak kajadi palajaran. Palajaran dalam maadok-i kabaragaman.

Dan Pancasila, sila Persatuan Indonesia--nan pas pulo lataknyo di tangah, nomor tigo dari limo sila--lah nan marakek kebhinnekaan itu sampai kini. Alhamdulillah...


Wartawan : TE Radjo Boedjang
Editor : sc.astra

Tag :#Minangkabau #BahasaMinangkabau #EsayMinangkabau #Pancasila