Malawan Ka Mamak Ilang Pusako, Malawan Ka Guru Ilang Kaji

Malawan Ka Mamak Ilang Pusako, Malawan Ka Guru Ilang Kaji

Oleh TE Radjo Boedjang

Lai talok malawan ka mamak? Jan cubo-cubo lai, ilang pusako!

Baitu pulo malawan ka guru. Ilang kaji. Ilang ilemu. Labieh lo dari malawan ka mamak lai. Kok pusako ilang dak saparah ilang ilemu doh!

Pepatah, mamang, atau kato-kato bijak tu idak layie di ruang ampo. Tapi dari pamikiran, inok manuang jo pangalaman tatkalo daolunyo. Itu nan turun tamurun kito tarimo. Dari mamak turun ka kamanakan.

Mako, kutiko banyak nan manyabuik paliang sarik mangaji di muko guru, iko pun kato-kato nan makin mampajaleh marwah guru. Jan ka malawan, mangaji di muko guru se antah ka sarik e.

Namonyo pepatah, mamang atau kato-kato bijak, itu layie jauah sabalun kini. Mungkin sapuluah katurunan ka ateh lah mandanga kato-kato tu. Aratie, pangakuan tunduak dan sagan pado guru memang lah sajak daolu. Sampai kini!

Sampai kini? Baa yo? Kini baa nampak dek kito paratian para murik ka guru? Lai sarupo dulu juo?

Tantu sajo banyak beda antaro guru daolu jo guru kini. Sarupo itu pulo beda mamak daolu jo mamak kini. 

Mamak daolu, sungguahpun didaoluan salangkah, ditenggian sarantiang sajo, tapi dalam prakteknyo banyak nan sarupo si bisu barasian kok basobok jo mamak. Takana lai, takecek an idak!

Bisa jadi, karano dalam urusan sang mamak sagalo nan manyangkuik sumber daya. Apo lai manyangkuik pusako, sang mamak nan maagak agiehi. In Sya Allah jo prinsip "bakato bana, maukum adie".

Posisi mamak barado di puncak sumberdaya kaum. Bulieh disabuik, pusek jalo pumpunan ikan bagi rumah gadang surang-surang.

Mako dak salah kato-kato "malawan ka mamak ilang pusako". Iyo sarupo itu jak saisuek. 

Baa nan sakarang kini nangko? Kutiko sumberdaya lah kian bakurang. Tajua, tagadai, dll. Lai kok sarupo saisuak juo tuah mamak? 

Jan jawek kini. Inok-inok an se daolu!

Nan jaleh, bagalanggang mato rang banyak, basuluah matoari, dak saketek kamanakan nan malawan ka mamak. Sampai bunuah mambunuah bagai! Dek karano harato pusako, kamanakan bacakak jo mamak. Banyak pulo dek sabek-sabek lain. 

Kini, lai kok tapakaian juo "kamanakan barajo ka mamak, mamak barajo ka pangulu, pangulu barajo ka nan bana"? Lai kok masih ado juo "kamanakan di pintu utang, mamak di pintu bayie"? Walau "kamanakan bapisau tajam", adokah "mamak badagiang taba"?

Pun, satantangan marwah guru. Baraa banyaknyo kito danga kaba murik malawan ka guru. Tapi banyak pulo guru malampang murik. 

Apo nan tajadi?

Lah babeda kok guru kini jo guru daolu? Cubo kito tiliek ciek-ciek.

Partamo, guru daolu adolah sumber ilemu. Satu-satunyo sumber ilemu. Walau buku mulai banyak dicetak, tapi tatek sajo guru manjadi panguaso ilemu. Guru nan punyo pangatahuan. Sahinggo, tasabuiklah kato-kato "malawan ka guru, ilang kaji"!

Kini, banyak sumber ilemu. Dunie internet lah mangalahan dominasi guru sabagai satu-satunya nan punyo ilemu. 

Bahkan, di zaman pandemi sarupo kini, murik-murik disuruah baraja sorang. Cari sorang di internet. Guru pun lah digantiaan dek mahaguru nan banamo Google! Google lah kini panguaso ilemu!

Baraa banyaknyo dicaliek, guru kalah ilemu dek murik? Guru nan lambek ma ekses internet, kalah jauah dari murik nan duopuluah ampek jam mamacik dunia di tangannyo! Anak-anak kini, 24 jam mamacik hp!

Kaduo, guru kini sibuk dek maurus target kurikulum. Dan sibuk pulo maurus portofolio untuak kalangkapan sertifikasi. 

Guru daolu, walau gaji sangaik ketek--itu tak pulo dipikie-pikie amek doh--nan maaja jo mandidik dan malatieh tu lah panggilan iduik. Daolu guru saketek, yakni urang nan memang nyio jadi guru. Panggilan hati.

Mako, kutiko ilang sagan murik ka guru, mustinyo harus dicaliek dari banyak sisi. Samo hal nyo jo kamanakan mulai dak maacuahan mamak, murik pun tak sagan ka guru adolah fenomena nan dak tabantahkan. Memang lah tajadi.

Di baliek pambalakangan itu, kok ditiliek labieh dalam; salahkah kok kamanakan dak (lai) barajo ka mamak? Salahkah murik dak (lai) sagan ka guru?

Antah kok "tali budi" nan dak manyangkuik lai? Habih pusako, habih ilemu, nan budi dibaok mati!

Salamek Hari Guru Nasional ke 75, jo budi kito mangaji (lai).