MAINGEK BALIAK KA CARITO ANAK MINANGKABAU (Bagian 3)

  MAINGEK BALIAK KA CARITO ANAK MINANGKABAU

(Bagian 3)

Oleh: Dr. Dra. Satya Gayatri, M.Hum*.

            Artikel nan kadibantangkan iko barupo carito dengan tokoh binatang. Carito tokoh binatang iko cukuik manjadi bagian nan manarik kalau disampaikan ka anak-anak. Melalui tokoh binatang ikolah tukang carito manyampaikan pesan, sarupo maangiahan nasihat, mangkritik, mangarahkan anak supayo indak babuek nan indak disukoi dek urang tuo. Jadi disampaian lah carito jo tokoh binatang. Carito nan ditokohkan dek binatang iko disabuik jo carito fabel (Mursini, 2011). Manuruik pakar iko, fabel bafungsi juo untuak manyampaikan kritikan secaro indak langsuang kapado pandanganyo.

Carito tokoh binatang cocok didongengkan ka anak-anak nan baumur 5 sampai 7 tahun. Malalui carito iko awak bisa maajak anak-anak mangenal lingkungan terutama binatang nan ado dalam carito tersebut (Bunanta, 1998). Awak bisa mangenalkan namo binantang, sifatnyo, atau mungkin juo kabaikan nan bisa diambiak dari binatang itu. Kok dicaliak dari hasil penelusuran (Sarumpaet, 2010) carito binatang dianggap carito nan paling tuo. Salain itu, carito fabel adolah kisah didaktik dari carito tradisional nan partamo pulo ditulih.

Di bawah iko salah satu carito bantuak fabel nan ado beredar di masyarakat awak yang baru ambo tulih. Carito iko maagiahkan nasehat ka anak-anak awak supayo bisa saliang toloang manoloang tarutamo di saat sahabat sadang sakik. Taruih bausaho manolong kawan samaksimal jo potensi nan ado di dalam diri awak masiang-masiang. Salain itu, carito iko maajakan pulo supaya anak-anak indak mambedakan kawan. Walaupun kawan datang dari lingkungan nan babeda tapi tetap bisa manolong, sarupo tupai nan hiduik di ateh pohon tapi bisa basahabat jo limbek atau ikan nan hiduik di aia.

TUPAI JO LIMBEK

Tupai jo limbek dua binatang nan basahabat. Ciek di ateh kayu, ciek lai di dalam lubuak. Inyo basahabaik lah sajak lamo, taruih badakek-an. Nan tupai lamak laloknyo di ateh, ciek lai limbek lamak pulo laloknyo di aia. Baitu tiok hari.

Suatu hari sakiklah tupai, matonyo sabua. Sakik jo sialah ka diubek, kamaa pulo lah ubek ka dicari. Manuang-manuanglah limbek. Ba mimpilah limbek. Apo mimpinyo, ubek sakik mato si tupai ado lah talua ayam.  

Pailah si limbek ka raia diilianlah aia tadi. Disitu nampaklan dek si limbek urang maabiak aia jo parian. Masuaklah limbek ka dalam parian. Tibo di rumah, urang itu masuak ka dapua untuak malatak-an parian.

Parian di latak-an, di sandak-an di dapuan di dakek songkok ayam. Malam aia di dalam parian alah kariang. Mamanjeklah limbek tadi tampak dek inyo songkok ayam. Diambiaklah talua ayam.

Bisuak pagi urang punyo rumah maambiak aia pulo baliak. Lah disandang pulo parian untuak maambiak aia. Kalualah limbek. Bapikialah limbek mambaok talua iko kalua. Baa kolah caronyo, ka digunguang baa pulo tangan ndak ado. Kok tupai lai lah bisa diguguangnyo. Makonyo talua tadi digolek-goleng-an sajo. Tibo di tampek nan dakek masuak inyo ka aia. Baitulah sataruihnyo.

Akhirnyo, tibo pulolah di dakek tupai. Diambuannyo ka tupai. Pacahlah talua, Mandilah tupai jo talua sampai ka kapalonyo bagai. Cegaklah tupai dek ditolong limbek.

Rujukan

Bunanta, Murti. 1998. Problematika Penulisan Cerita Rakyat Untuk Anak di Indonesia. Jakarta: Balai Pustaka.

Gayatri, Satya, 2020. “Carito Anak Minangkabau Variasi Teks dan Sistem Pewarisannya: Analisis Perubahan”. Disertasi Pascasarjana Universitas Gajah Mada. Yogyakarta.

Sarumpaet, Riris K. Toha. 2010. Pedoman Penelitian Sastra Anak. Jakarta: Yayasan Pustaka Obor Indonesia.

*Penulis adalah Dosen Sastra Minangkabau Unand