Covid-19, Alam Takambang Jadi Guru

Covid-19, Alam Takambang Jadi Guru

Alam takambang jadi guru, pituah iko sarangkuah dayuang jo bala nan mahoyak dunia sarupo kini. Jikok gabak di ulu tando ka ujan, mangaa kok jalo nan dirantang? Santano tampuo basarang randah, elok diinok manuang i kurenah alang.

Sadunia langkok, Covid-19 maruyak, maogah sumangek marumeh kudarek. Antah kok iyo Yajud-Majud? Nan jaleh labieh dari tubo. Masuak ka mato, iduang jo muncuang, manggiriek rabu, maampang angok! 

Antah kok siasek, atau kito nan salah samek? Nan jaleh panangka dak kunjuang dapek. Ubeknyo jago jarak, pa kuek badan, jaan baragak. 

Baa toh kini. Kok dak ado sabab karano, dak barapi tantu dak barasok. Di situlah alam kadibaco. Alam takambang jadi guru. 

Batali bataraju, alang-alang saumpamo. Darimano tiliek palito, dari pelong nak batali. Jikok ayie basentak naiek, galundi nan baselo, bukan Adam nan mandayo, kuaso alam kayo sungguah. Baasa bamulo.

Sajak alun barabalun, lawik sadidih urang namokan, pulo paco ka ganti umpamo, pulang ka diri nan sadiri. Langik sajo tapiannyo, di batin lapang saleba alam, di kuku sampik saleba aka. Ba aka ba raso.

Kok ditiliek ciek-ciek, tatkalo maso daulunyo, alun bapariangan badusun tuo, upeh jo tubo di istano, Indo Jalito pintu sarugo, lah takadie Nan Kuaso. Di situlah adaik jadi pusako, manose baraja manulih tambo, mulai dari alif tiliek palito, jadilah pituah ka diri ambo. Hukum akal, wajib mustahie.

Sayo nan usah digadaikan, deyen nan usah dibagikan, kito nan usah dipasamokan, Minangkabau jadi ambo. Ambo an lah Minangkabau, deyen, kito jo sayo di dalamnyo. Basamo mangko manjadi.

Mako tiok suku bapangulu--ranah bapangulu rantau barajo--di rumah gadang baniniek mamak, supayo sarantak galah sarangkuah dayuang. Malam danga-dangakan, siang caliek-caliek i. Basamo, sa iyo sa kato.

Adaik ayie mambasahi, adaik api mambaka, alam takambang jadi guru, itulah ilemu Minangkabau. Raso kok alum tapadoi, sako kok alum tapadani, pusako kok alum taurehi, soko lah badiri surang-surang, alam leba jan diagah. Ba sabek, ba akibek.

Makonyo ladang babintalak, sawah bapamatang, rumah gadang baruang-ruang, puti duduak di anjuangan. Tuah nan usah dimintak, aie ilie jan diampang. Ba barih ba balabeh.

Tagak di kaum paga kaum, tiok lasuang baayam gadang, usahlah mamintak sisiek ka limbek, tiok panyakik ado ubek. 

Baitu pulo jo Covid-19, ba ambo ka badan diri, saciok bak ayam ba Minangkabau, taambo kurenah jo parangai, patuah ka barih jo balabeh. Tagak Minangkabau, paga Minangkabau, basibana nan kadipakai. Jauah basiarak jo basipakak. 

Kalaluannyo bana, taambo jo patuah ka pemerintah, ikuik i alue jo balabeh. Kuruang diri jo anak bini. Sapo dunsanak nan marentak. Jago kaum jo tuladan. Pelok parangai jo kurenah. 

Sakik laie, ubek sacaro laie. Sakik batin, ubek sacaro batin. Ingek-ingek nan di ateh, nan di bawah kok maimpok. Nanang saribu aka, pikie palito ati. Kana diri. 

Sagalo limau jo urek kayu. Ubek paik panuntuang manih. Alam basadio salangkoknyo. Japuik ramuan kaji lamo, tiok daun ado gatahnyo. Sitawa sidingin, cikumpai cikarau, langkok jo bungo rayo putieh sapaminuman. Paga badan lah namonyo. 

Baitulah, Covid-19 manyuruah kito ba baliek ka kaji lamo. Baco alam, baco diri. Usang-usang pa barui, ilemu batali sajak mulo. Alam takambang jadi guru.

(Taufik Effendi, Pemimpin Redaksi Minangsatu, Wartawan Utama)

Ctt: Tulisan ini juga bisa dilihat di Surat Kabar Khazanah-Padang, Jumat (17/4)