HOME LANGKAN CARITO

  • Jumat, 27 September 2019
Si Kamba Padang Laweh Jo Rimbo Sasek

Si Kamba Padang Laweh Jo Rimbo Sasek

Oleh : Hamza Afra Joneidi (Mahasiswa Sastra Minangkabau FIB Unand)

 

            Pada maso dulu, tadapeklah surau tuo di nagari Padang Laweh, Kabupaten Sijunjung. Surau tu manjadi tampaik manuntuik ilmu agamo dek anak-anak sarato tampek baraja silek untuak paga diri diwakatunyo kagadang bisuak. Surau tu iolah punyo angku nan banamo Angku Satiah. Umua nan sampai 60 tahun, mambuek daguaknyo jadi ladang dek urek gigi atau jangguik. Putiah rambuik angku tu, acok tatutuik dek kupiah nan indak pernah lapeh  jak lakek di kapalo.

            Padang Laweh iolah nagari nan banyak carito ghoibnyo. Dakek surau Angku Satiah tu, tapeknyo di balakang surau. Tadapeklah rimbo gadang nan jarang diinjak dek urang kampuang. Konon caritonyo, rimbo tu acok disabuik  dek urang rami jo Rimbo sasek (rimbo maliang). Ikolah nan mambuek urang sakampuang indak talok mancari kayu ka dalam rimbo tu. Kabanyo, kalau sakali masuak ka rimbo tu, indak bisa pulang awak dibueknyo.

            Suatu maso, habih hari baganti bulan, habih bulan baganti tahun. Lahialah anak kamba jak di induak nan barumua 36 tahun. Anak Kamba nan lahia tu manjadi anak kaduo jo katigo dalam kaluarga tu. Induak nan banamo Sipina jo lakinyo nan banamo si Bujang Itam, maagiah namo anak kambanya tu jo Yoga Yogi. Di sikolah mulai tabukak carito Rimbo Sasek jo si Kamba panamu jalan untuak ka pulang.

            Suatu hari, Amak Yoga Yogi pai ka sawah untuak manyiang padi nan sadang tumbuah jo rumpuik lia. Sambia tu pulo Sipina “manyiang padi, ikan tabawok pulang”. Karano, di sawah Sipina tu, aia nyo tamasuak dalam. Jadi anak ikan (ikan inuak-inuak) banyak nan iduik di aia sawah tu, bisa ditangguak katiko sadang manyiang padi.

            Salain Sipina pai ka sawah, laki Sipina biasonyo pai manakiek gatah jak pagi hinggo patang. Ikolah laki nan tamasuak pakarajo, “pai pagi, pulangnyo patang”. Jadi anak kambanyo tu biaso ditingga karano umuanyo lah masuak 12 tahun. Jadi, salamo urang tuonyo karajo, si Kamba bisa pai main ka rumah kawan-kawannyo sasudah pulang sikolah.

            Suatu katiko, lah pulang sikolah taragaklah Si Kamba pai main ka surau tuo nan ado di nagari nyo tu. Salain taragak, anak-anak tu nio basobok pulo samo angku nan tingga di surau tu. Tujuannyo untuak mamintak diajaan mangaji surek sarato silek. Karano anak-anak nagari Padang Laweh tu, keteknyo lah harus tau jo ilmu surek tambah saketek ilmu silek.

            Katiko sumbahyang zuhur lah salasai. Sampai lah Si Kamba samo duo kawannyo di surau tu. Namo kawan Yoga Yogi tu iolah Isik jo Dito. Masuaklah ampek sakawan tu ka surau untuak basobok jo angku nan dicari. Kironyo, dek mulo langkah pakai Bismillah, basobok lah anak-anak tu jo Angku Satiah nan dicari.

            “Assalamu’alaikum” anak-anak mengecekan salam basamo-samo.

            “Waalaikumussalam” Jawek Angku Satiah

            “Pak Angku, kami nio mancari pak angku bana mah. Kami nio baraja samo Pak Angku” Kecek Yoga sambia mancaliak salayang ka kawan-kawannyo.

            “Iyo Pak Angku, kami nio baraja ngaji surek sarato silek” Kecek Isik sambia manyambuang kecek Yoga.

            Sabalun dijawek dek Angku Satiah, surau tu lah ado pulo di isi dek anak-anak nan baraja ngaji  sarato silek sarupo nan dimintak dek ampek sakawan tu. Rancaknyo, anak-anak nan mangaji  tu harus lalok di surau malam hari, siang buliah pulang kok taragak basobok samo urang tuonyo atau pulang minta bareh nan lah habih.

            “Rancaklah kok lai sarupo itu. Tapi kalian barampek harus lalok di surau salamo mangaji samo ambo. Lai talok dek kalian tu?” jawek sarato tanyo baliak Angku Satiah.

            “Lai Pak Angku. Tambah pulo, kami lah di suruah lo dek urang gaek kami untuak mulai ka surau. Bia kok lah gadang bisuak, indak jadi urang binguang”. Yogi jo Dito nan manjawek.

“Sarupo carito Buyuang Lelan” Sambuang Isik.

“Jadilah kok sarupo itu. Tapi ciek nan indak ambo buliahan. Jan sakali-kali kalian masuak ka rimbo nan dibalakang surau ko. Karano rimbo di balakang ko iolah rimbo sasek, rimbo maliang. Sakali kalian masuak ka rimbo tu, dak ka pulang kalian di buweknyo do” Kecek Angku Satiah sambiah manunjuak ka balakang suraunyo tu.

Tangango lah ampek sakawan tu. Karano, salamo anak-anak tu bamain di dakek rumahnyo, indak pernahtadanga dek anak-anak tu manganai carito rimbo sasek tu do . Akhinyo, anak-anak tu samo-samo manggeleng manuruikan kecek Angku Satiah.

Katiko ilmu nan dituntuik, tantulah elok nan ka jadi buahnyo. Sampailah saminggu sasudah anak-anak tu datang ka surau, akhirnyo tibolah maso panyarahan murid dek urang tuo ka Angku Satiah. Makan basamo sarato pitih sapiah lah salasai di tarimo jo dikarajoan dek Angku Satiah jo urang tuo anak-anak nan baru masuak. Kini jadilah ampek sakawan tu, anak-anak surau nan lah siap lalok jauah jak di urang tuonyo.

baraja ngaji Iqra’, Al Qur’an, Kitab Kuniang, Kitab PQ, Kitab kailani sarato jo mutasyar iolah ilmu nan diajaan ka anak-anak surau dek Angku Satiah. Indak lupo bacoan sambahyang sarato rukun-rukunnyo. Anak-anak baru di aja dek anak nan lah satahun di surau tu, anak nan satahun di aja dek anak-anak nan lah duo tahun mangaji, anak-anak nan duo tahun diaja dek anak-anak nan lah tigo tahun lamonyo mangaji. Anak-anak nan tigo tahun ko lah nan di aja langsuang dek Angku Satiah.

Lah hampia satangah tahun lamo mangaji, taingek lah baliak carito rimbo sasek tu dek si Kamba katiko lah kan lalok. Tibolah pangana di aka anak-anak cadiak tu, dek apo bisa disabuik jo rimbo sasek rimbo balakang surau ko? Apo nan ado dalam rimbo tu. Sampai-sampai lah jam 2 malam, baru lalok anak-anak tu.

Hari akok (ahad) iolah hari libur dek anak-anak surau jak di siang hinggo malamnyo. Karano Angku satiah satiok minggu pulang pulo ka rumahnyo. Jadi surau tinggalah anak-anak nan indak pulang karumah urang tuonyo. Hari ko lah carito masuak rimbo sasek dimulai dek si kamba. Parangai anak-anak lah nan tajadi, kadang takuik bana kadang barani bana, kadang picayo bana kadang indak bana.

“Ga, kalau wak cubo masuak ka rimbo tu ba a nyo? masalah nyo, kalau di caliak rimbo tu biaso se nampaknyo lah. Kalau takuik tasasek, wak masuak tapi-tapi rimbo se lah mah”. Kecek Yogi mambawok.

“Tapi, den tu agak takuik-takuik juo mah, Gi. Sobok nyo wak baduo se nyo. Kawan-kawan lain lah pulang ka rumah nyo pagi tadi. Kito kan lah pulang lo Akok patang ko. Jadi kok dinanti kawan-kawan lainnyo ba a? beko jam tigo tu, anak-anak tu lah tibo di surau liak mah”. Jawek Yoga sambia maangkek bahunyo sarupo urang takuik.

“Rancak lah kini se lai, Ga. kini lai pagi lo. Kalau jam tigo, rimbo tu beko galok dek bayang-bayang surau ko. Tambah takuik lah wak dibuweknyo beko mah. Lagian Kok dipikia-pikia, ba a dek kan tasasek lo wak tu. Beko wk rambah samak tu pakai ladiang ko. Tu kalau lah nio pulang, turuik se jalan nan lah pasa dek rambahan ladian tadi tu”.Jawek Yogi sambia mambiak ladiang surau untuak mangapiang kayu tu.

“lai dak berang beko Angku atau tuo-tuo kito tu, Gi?” Tanyo Yoga ciek lai.

“Indak lah nyo. Kini kan sadang pagi baru mah. Alun ado urang-urang tu kan datang ka surau lai do. Tanang se lah. Panek rasonyo, indak ado yang dikarajoan”. Jawek Yogi.

Akhirnyo, dek tanyo Yoga tajawek taruih. Sapakaik lah anak-anak tu masuak ka rimbo balakang surau tu. Karano Yoga lah tabwok-bawok lo dek pikiran kambarannyo nan sadang basamangaik tu. Tantunyo takuik sarato binguang, bacampu jadi ciek di hati si kamba tu. Tapi masuak juo lah anak kamba tu sambia marambah samak nan ado di mukonyo. Gunonyo jaleh, untuak jalan pulang beko katiko lah nio kalua jak di rimbo.

Alun 15 minik masuak ka rimbo tu, lah samakin dalam samak-samaknyo. Dek lah peneh marambah samak jak ka masuak tadi, si kamba lah nio kalua. Tantunyo ikuik jalan na lah di rambah tadi. Dek pakak jo kareh angok, tantulah buruak nan katajadi. lah dituruik jalan nan alah di rambah tadi, kironyo tibo pulo baliak di tampek kudian anak tu baranti. Kironyo rimbo, lah mamuta-mutaan jalan si kamba. Di ulang sakali, duo kali, tigo kali, sampai babole-bole kali. Indak juo basobok jalan kalua do. Tantunyo manyasa di dalam hati, ikolah akibaik indak mandangan kecek guru surang.

Anak ketek ditangah rimbo tantulah banyak malang nan katajadi. Ikolah nan tapikie dek si kamba. Sampailah isak tangih kalua jak di mulai anak-anak tu. Indak tantu kan manga di dalam rimbo tu. Hari lah baranjak siang, tapi azan zuhur indak bakumandang juo. Tapikie lah dek si Yogi untuak mamanjek batang kayu nan tinggi dakeknyo tu.

“Ga, kito panjek batang kayu ko lah. Beko bisa kito caliak, dima latak surau kito sabananyo”. Kecek Yogi Mambawok manjek.

“Jadi lah, Gi.” jawek yoga sambia menyeka aia matonyo.

Mamanjeklah anak kamba tu. indak lamo sudah tu, tibolah kaduo anak-anak tu hampia dipucuak kayu gadang nan nyo panjek. Dicaliaklah sakaliliang rimbo tu, sambia mamuta kapalo kakida jo kakanan. Harok mancaliak atok surau nan tabuek jak di ijuak anau, kironyo hanyo rimbo gadang sajauh mato mancaliak. Tabikklah takuik anak-anak tu. “Lah putuih tampek bagantuang, lah habih tampek balinduang”. Indak cukuik isak jo tangih, hariak-mahariak sajadi-jadinyo, indak mambawok elok ka anak tu.

Ikolah pasan nan paralu di ingek dek anak nan kareh kapalo. Jan sakali-kali malawan kecek guru, apolai dalam agamo indak dibuliahan bana. Karano barujuang pado Narako. Tasintak lah anak kamba tu jak di diamnyo salamo di batang kayu. Turun lah anak tu, makasuik nio maulang jalan nan di rambahnyo tadi. Ikolah pasan nan kaduo, kalau kito basungguah-sungguah pasti ado jalan.

Di ulang jalan nan samo, tibo pulo di tampek nan samo. Dek Yoga ko lah takuik samo nan tajadi, indak singajo tapatahan lah rantiang  mati dek tangannyo nan acok malesek dek rusuahnyo hati. Ikolah kunci pambuka jalan rimbo sasek kecek urang Padang Laweh. Tabukak lah jalan nan manuju kabalakang surau Angku Satiah tadi. Pulanglah si kamba manuruik jalan pasa nan tadi, nampaklah atok ijuak anau surau Angku Satiah.

Tapi ado nan aneh katiko anak kamba pulang ka surau. Si kamba Yoga Yogi nan maraso hanyo babarapo jam dalam rimbo sambia bajalan baputa-puta. Kironyo, lah hilang salamo tigo hari jak di suraunyo. Tapi si kamba dek takuik samo guru jo tuonyo, dikecekaannyolah inyo baduo ko pai karumah inyiaknyo nan ado di Nagari Tanjuang Ampalu.

 


Wartawan : HAMZA AFRA JONEIDI
Editor : bahren

Tag :# Langkan # curito #minang