SALIMPAUANG

HOME LANGKAN TINGKOK


  • Rabu, 8 April 2020
SALIMPAUANG
TINGKOK

SALIMPUANG

DI TANAH DATA

Oleh: Bahren*

 

Koto tuo jo kampuang Limau

Kampuang Dalam sarato Buntak

Di Salimpauang kasadonyo

Bia curito nak jan kacau

Bia jalan nak nyo tampak

Diulang juo carito lamo

 

Nak duo pantun sairing

 

Dibukak buku dibukak

Dibukak lalu dibaco

Disurah sado nan tampak

Nan bathin punyo nan kuaso

 

Apokoh kisah nan kadisurah, ka dunsanak kasadonyo, iyolah kisah tantang asa sarato usa manga nagari banamo Salimpauang. Mako dicarilah Mak S. Datuak Rajo Tanbasa ka rumah baliau di Salimpauang. Limo Puluah lapan umua baliua maso itu kutiko basuo jo Zuriati tanggal sambilan baleh dibulan Mei tapek nyo tahun duo ribu tujuah. Takalo Tanbasa ditamui liau nan alah pansiun dari karajonyo yang pagawai salamo ko. Apokoh curito liau tantang Salimpauang, simakkan molah elok-elok, dangakan bana baiak-baik baiko kisah dari dari Baliau.

Adolah pado suatu maso, takalo niniak moyang kami rang Salimpauang nan mampalaweh daerahnyo asanyo, barangkeklah sarombongan niniak kami dari Pariangan. Inggo pado satu katiko sampai lah niniak moyang kami di sabuah tamepk dan manetap. Habih ari baganti minggu, minggu lalu bulan pun tibo urang nan batambah rami juo. Ado surang banamo Salim, nan kadi sunat rasu atau bakhitan. Si Salim di sunat di bawah batang kayu gadang. Antah dek karano sakik basunat atau dek sakik nan lain manangih lah Si Salim marauang-rauang. Inggo tampek salim marauang-raung tadi di sabuiklah Batang Salimpauang.

Kutiko niniak kami sampai di daerah Salimpauang ko, mako bakatolah nan paliang tuo dari rombongan niniak kami tu, maso kito manetap di siko sajo. Mako dibuek lah rumah tampek tingga dek niniak moyang kami. Dikalak kamudian hari daerah nan paratamo didiami dek niniak kami dibari banamo Koto Tuo. Ado pulo daerah pamukiman nan lataknyo mamanjang di namoi Kampuang Panjang. Kampuang nan banyak batang asam kapeh atau jeruk nipis baso indonesia nyo dibari banamolah kampuang tadi jo namo Kampuang Limau.

Kampuang nan tampak pendek sarato bulek, buntak kato rang Salimpauang disabuik jo Kampuang Buntak. Ado sabuah kampuang lai nan talatak agak kadalam  di namokan jo Kampuang Dalam. Curtio nan bak kian alah didanga jo didapek dek Mak Datuak Tanbasa dari carito jo kisah-kisah dari niniak moyang sarato urang tuo-tuo di Salimpauang ko. Namun samantang pun baitu, Mak Datuak Tan Basa maraso bana lai picayo tidak taradok carito nan bak kian, karano manuruik baliau alun masuak aka sarato pangana baliau kok kampuang tu banamo dari carito nan baliau sampaikan. Tapi, dek karano inggo iko kini alun ado curito lain nan bisa diambiak kabanarannyo mako itulah nan bakambang di nagari kami.

Adopun niniak kami disiko ado nan basuku Dalimo Panjang. Ado pulo nan basuku Koto Dalimo Kutianyia, Basuku Tabek Gadang, Suku Jorong Nan Sambilan, Suku Bendang jo Kutianyia, Payobada sarato Sitabek, Parik cancang jo Koto Piliang. Itulah suku-suku niniak kami nan ado di Salimpauang ko.     

 

 

*Dosen Sastra Minangkabau


Wartawan : Bahren
Editor : bahren

Tag :#Langkan #Tingkok #Asa #Usua #Nagari #Minangkabau  

RAMBATAN
RAO-RAO
PITALAH
PASIE LAWEH
TUO UMUA
PARIANGAN
PARAMBAHAN
PANYALAIAN
PANINJAUAN