HOME OPINI CELOTEH

  • Sabtu, 25 April 2020

Puaso, Corona Dan PSBB

Taufik Effendi Radjo Boedjang
Taufik Effendi Radjo Boedjang

Puaso, Corona dan PSBB

"Oi kabuik tinggalah tabiang
Nak pueh bukik dek kapanehan"

Lagu Kasiah di Ambun Pagi nan dipopulerkan dek Waty Yusuf ko, jaleh bacarito tantang kasieh jo cinto. Tapi, duo barih bait partamo, bulieh jadi umpamo kandak kito basamo.

Ibaraik kabuik, Covid-19 lah malindok an tabiang, malimpok matoari. Galok sabalik. Kalam basamo. Pintu-pintu, jandela-jandela batutuik. Kito pun di rumah sajo.

Tapi, kok lamo kabuik malindok, bilo bukik ka dapek paneh? Jaan ka pueh dek kapanehan, nan ado lindok sabalik. Kito pun maetong kasau. Ndehhh...

Sungguahpun sarupo itu, lah sudah garih dek Nan Satu. Tiok-tiok kito dapek ujian. Nan luluih, naiek kelas. Nan kalah, tingga. Nan bengkok makanan saruang, nan luruih makanan banang. 

Covid-19 hanyo ujian. Juo caro Tuhan maubek alam; nak tarang kabuik, nak tanang ombak, nak cewang langik. Tiok maso ado bala. Tiok ari ado mujue. Mujue sapanjang ari.

Antah pabilo ka salasainyo? Bilo ka bakisa kain buruak dari tungkahan? Antah kok lenggang di katiak bana nan buruak pinto? 

Hoppp...taaa... Mbek cah. Tiok sakik ado ubek. Sudah mandaki, tantu manurun. Kini lah tibo pulo suruahan PSBB. Hari ka tigo PSBB, batapatan jo puaso tuo.

Pasa langang. Kadai langang. Musajik jo surau pun langang. Anak sikola baraja di rumah. Kito pun tarawih di rumah surang-surang. Tadaruih di rumah surang-surang. Musajik jo surau pindah ka rumah. 

Subhanallah. Sungguah Tuhan Maha Tahu!

Kok salaruik salamo nangko. Jaan ka maurus kaum karik karabek, basobok jo anak bini pun sabanta-sabanta. 

Kini, alam maaja, Tuhan maatur, banyak wakatu jo anak bini. Panjang wakatu mamareso diri. Ado wakatu bamunajat. 

Laki-laki jadi imam, malalui Corona Tuhan manyuruah; tagak an tarawih jo witir basamo anak bini. Sumarak an malam Ramadhan di rumah surang-surang. Santano lai di rumah sajo, limo wakatu bajamaah. Baraa ka sero baibadat, tanang hati anak jo bini. Gadang ati mintuo. Dek Corona kito jadi acok basamo-samo. Alhamdulillah wa syukurillah.

Iko umpamo wakatu pose main bola. Untuak mamareso, maniliek dan manyusun siasek; baa iduik ka muko, baa rumah tanggo jan binaso, baa kaum jo kampuang dipatenggangkan. 

Satantangan PSBB, ambiek tuah ka nan manang, ambiek contoh ka nan sudah. Intinyo bana, nan Covid-19 ko pindah malalui muncuang, iduang jo mato; makonyo jago jarak labieh sameter, jaan bakumpue-kumpue labieh limo urang, pakai masker tiok ka lua rumah. Acok-acok basuah tangan, jaan lupo pakai sabun. 

Nan karajo, bisa taruih karajo, sapanjang jago jago jarak dan pakai masker. Nan ka sawah jo ka ladang, itu pariuak bareh. Kok manggaleh bisa bajojo "di ateh langik". Pakai media daring kecek rang kini. 

Jan sampai dapue tak barasok. Jan sampai manggoreang ayie mande paja. Sungguahpun pamarentah ado mambantu, tapi jaan dipadoi sampai di situ. Duduak marawik ranjau, tagak maninjau jarak. Dak Corona nan ka mambunuah. Tapi upek jo maleh, aka singkek pangana panjang, itu nan marusuah. 

Apo lai puaso! Wajib hukumnyo. Iko lah puaso paliang santiang. Kito manahan awih jo lapa, kito pun waspada jan kanai Corona! Corona dak corona, puaso jaan sampai tingga. Salamek bapuaso, salah jo gawa tolong maafkan. Maaf lahie jo batin.

Catt: Tulisan ini juga dimuat di surat kabar Khazanah, Jumat 24/4

(Taufik Effendi Radjo Boedjang, Pemimpin Redaksi Minangsatu, Wartawan Utama)


Tag :#puasocoronapsbb #opini

Baca Juga Informasi Terbaru MinangSatu di Google News

Ingin Mendapatkan Update Berita Terkini, Ayu Bergabung di Channel Minangsatu.com