HOME LANGKAN TINGKOK


  • Kamis, 23 Januari 2020
PITALAH
TINGKOK

PITALAH

di Luhak Tanah Data

Oleh: Bahren*

 

                Oi Pitalah di Tanah Data

         Tasabuik katupek gulainyo

         Oi dunsanak danga lah kaba

         Oi Curito nagari kito

                  Tasabuiklah karupuak pitalah

                  Karupuak ubi sabananyo

                  Oi dunsanak dangakan lah kisah

                  Kaba curito di bawah ko

                 

         Bakisah lah Datuak Rangkayo Bungsu kapado Ivan Adilla, tanggal duo puluah limo di bulan Mei tahun duo ribu tujuah. Apokoh kaba nan dikisahkan maso itu dek baliau Datuak Rangkayo Bungsu, iyolah kisah tantang asa sarato usua manga nagari banamo Pitalah. Apo bana curitonyo simakkan malah elok-elok biko kaba dari baliau.

         Daulu niniak moyang kami rang Pitalah asanyo dari Batipuah. Niniak kami nan dari Batipuah ikolah agaknyo nan maakai sarato mangambangkan adaik nagari Batipuah di tampek kini nangko. Di kampuang kami iko pulo lah undang-undang adaik diputa aratinyo dipakai sarato disebarkan ka daerah nan lainnyo. Dalam kato lain, undang-undang adaik di putalah atau disiarkan ka daerah nan lainnyo, kamudian lamo lambek tampek mamutah atau manyiakan undang-undang adaik tadi dibari banamo Pitalah.

         Di pitalah ko ado ampek kampuang nyo, bitu bana Datuak Rangkayo Bungsu bacurito. Kamuang-kampuang nan ado tu dibari namo ateh dasar suku nan manampati kampuang nantun. Sabuah Kampuang nan diuni dek urang nan basuku Jambak misalnyo dibarilah namo kampuang nantun jo namo Kampuang Jambak. Ado pulo sabuah kampuang nan diuni dek niniak moyang kami nan basuku Panyalai, mako banamo lah kampuang tu jo Kampuang Panyalai.

         Sabuah lai kampuang nan ado di Pitalah ko banamo kampuang Nyiua, mako dek banamo kampuang Nyiua karano niniak moyang kami di kampuang ko basukuk Nyiua. Ado pulo kampuang pisang namonyo di Pitalah ko, mako banamo kampuang pisang karano niniak moyang urang kampuang ko barasa dari moyang nan basuku Pisang.

         Curito ko lah di dapek dek baliau Datuak rangkayo baungsu dari curito-curito niniak moyang nan lah tuo-tuo daulunyo. Urag tuo-tuo rang pitalah asanyo nan dari Batipuah ko ado nan basuku Panyalai, Pisang, Katapang, Nyiua, sarato Jambak jo Sikumbang. Jikoknyo ado kisah nan bana tantulah kabanaran datang dari tuhan, Allah taa tuhan kito. Jikok nyo ado kaba nan salah, salah nan datang dari kito manusia, tampek salah jo gawa bahimpunnyo. Kapado tuhan kito mamintak ampun, kapado pambaco maaf dipinto.

        

*Dosen Sastra Minangkabau Unand

 


Wartawan : Bahren
Editor : bahren

Tag :#Langkan #Tingkok #Asa #Usua #Nagari #Minangkabau