HOME LANGKAN GARAH

  • Selasa, 16 April 2019
PASAN
Garah

Pasan

Oleh: Bahren*

Alah sapakan sajo sajak razia kaki limo di terminal Rawangaun. Sajak sapakan itu pulo Si Man Iriak mamulai iduik baru, iduik baru dalam manggaleh di Jakata. Dulu manggaleh pakai nyiru, kini si Man lah manggaleh balapak ketek dalam pasa. Raso cameh jo takuik lah mulai ilang di dado Si Man kini nangko. Indak takuik di kaja pamong jo SK 4, indak takuik lari tunggang langgang manyalamaikkan galeh jo jaga nyo. Indak pulo takuik bana pokok nan ado bakurang dek ulah galeh nyo lah baserak-serak karano lari manyalamaik kan diri. Si Man kini labiah tanang sarato nyaman manggaleh di kadai ALNIDEGADA nyo. Indak lupo pulo inyo bakaba ka kampaung, ka Supiak Onjai tantang perkembangannya dalam manggaleh. Di tulih lah dek Si Man surek ka Supiak di Padang, urang jawa biasonyo manyabuik urang awak Minang jo urang Padang. Walapun awak tingga nin jauah di Lunang Silaut, atau di Ujuang Gadiang jo Dhramasraya, bagi urang di Jawa tetap sajo di anggap urang Padang awak ko. Antah dari ma asa jo mulonyo nan Si Man pun indak tau pulo, mungkin sajak jaman ulando lah baitu. Karano nasi ramas pun di sabuik jo nasi Padang, Sate nan biaso wak makan namo nyo juo sate Padang.

Di malam samalam nantun, disemba dek Si Man Hp ndroitnyo, di tulih pasan ka Supiak. Dek Si Man lah maraso jadi rang Jakata, ditulih pulo lah pasan ko jo baso Indonesia bak nyo Si Man. Di bukak Whatapps langsuang diketik dek Si Man wakatu itu. Biko bunyi pasan Si Man Ka Supiak Onjai.

Dear adinda Fitri Hurjani di Kampuang Halaman.

Sekerat hati dan Jantung uda yang tertinggal untuak sementara wakatu. Dalam pasan kali ini, uda nak bakaba kepada dinda, uda lai senang dan sehat di nagari Subarang tanah Jawa. Uda harap Upik juga begitu lah andaknya. Perkara uda menggaleh di Jawa, Alhamdulillah galeh uda lai lancar dan aman sentosa. Walapun sekali dua, uda sempat juga di kaja-kaja dek SK 4 jo pamong praja. Tapi, upiak jangan khawatir, kalau sekedar bakaja-kaja, dek uda itu belum seberapa diak, itu lah jadi keahlian uda. Sadangkan jo kandik dan landak wakatu pai berburu lai menang uda bapacu lari, apolai hanya melawan lari mereka berdua. Sabelok duo belok saja uda lah ilang dari pandangan mereka.

O ya dinda upik yang uda cinta.

Kini uda tidak lagi manggaleh dengan cara berjojo, tapi sajak kejadian razia saminggu yang lalu uda sudah sepakat dengan Gindo Apuak dan Si Am untuak membuka lapak kecil di tangah pasa yang tidak jauh dari tempat ba jaga uda sebelumnya. Gindo Apuak jo Si Am ada mau maminjamkan uda modal untuak ka mambayar sewa lapak tu. Jadi uda iya kan saja saran sarato suruah Gindo Apuak jo Si Am tu.

Di Lapak tu uda, tetap menggelas kumango dik, segala sedikit ada, ingga urang nan masuk ndak mungkin kelua mancari yang diparalukannya. Uda kasih merek lapak uda tu ALNIDEGADA aratinya dalam bahasa wak nya Apa lu Nio Dek Gua Ada. Bercampur memang bahasanya tapi rancak pula terdengar di talingo uda.

O ya pik, uda mau bertanya ka upik, tantangan unggeh jo buruang uda nan upik larang uda membawanya ke Jawa. Apakah unggeh dan buruang itu ada upik agih makan? Jan sia-sia kan unggeh jo burung Uda tu pik, jikok mati keduo nya alangkah ter iba hati uda pik.

Uda rasa cukup segitu kaba dari uda dulu pik, dek hari lah larut malam. Uda nio istirahat dulu karano besok udah harus agak pagi berangkat ke pasa. Salam Sayang uda mu Herman Iryadi.

Pasan pun dikirim dek Si Man. Lah nampak tando batua duo barono ijau bilau di pasan tu tando nyo pasan lah dibaco dek supiak. Si Man pun pai ka biliak, dirantangkannyo badan di ansua nyo bagolek-golek jalang ka lalok.

 

*Dosen Jurusan Sastra Minangkabau FIB Unand

 

 


Wartawan : Bahren
Editor : Bahren

Tag :# Langkan # Garah # Minang