Pagaruyang

Pagaruyuang

Di Luhak Tanah Data

Oleh: Bahren*

Pagaruyuang di Tanah Data

Di situ istano talataknyo

Di ansua-ansua juo ba kaba

Tantang asa usua nagari kito

Mandahiliang jo Padang Data

Kampuang Tangah jo Balai Janggo

Di ansua-ansua juo Bakaba

Untuang baguno Lah andaknyo

Ba kaba lah Irwandi Dt. Rajo Malano kapado Zuriati jo kawan-kawan nyo nan datang dari Padang, datang mahadok ka baliau nak batanyo tantang asa jo usua nagari nangko, mako banamo Pagaruyuang. Tanggal sambilan baleh maso itu di bulan Mei duo ribu tujuah, di kantua wali nagari Minangkabau. Bakato lah liau Dt. Rajo Malano walinagari maso itu. Jikok itu nan ditanyokan, bia nak ambo jawek sado nan dapek labiahnyo bia untuak urang nan pandai.

            Bagulambek liau bakisah tantang curito asa jo usua manga nagari banamo Pagaruyuang. Adolah takalo sabuah karajaan bar pindah ka sabuah tampek, alam sakitar karajaan nantun masih banyak binatang bueh nyo. Sampai lah pado suatu maso anak gadih rajo nak pai mandi di sakitaran batang aia nan ado dakek karajaan. Namun samantang pun baitu, batang aia nantun ado saikua buayo lia. Mako bapikia lah urang di karajaan nangko, baa supayo buayo tu indak manggaduah. Dibuek lah paga sakuliliang, paga di buek dari ruyuang batang anau. Mako lamo bakalamoan, habih ari babilang minggu, minggu batuka bulan pun tibo. Disabuik lah dek urang daerah nan bapaga jo ruyuang tadi Pagaruyuang.

            Limbak nan dari pado itu, sasuai jo maso sarato pakambangan daerah, daerah-daerah nan ado di sakaliliang pagaruyuang pun di bari namo ateh dasar suku masyarakaik nan badiam di daerah tu. Kalompok masyarakaik nan badiam di daerah nan bapadang data mako banamo lah daerah tu jo Padang Data nan tamasuak manjadi suku Padang Data. Bitu pulo daerah nan didiami dek urang nan basuku mandahiliang, mako banamo lah daerah tu kini jo Mandahiliang.

            Ado pulo daerah nan di diami dek niniak moyang kami nan basuku nan sambilan sarato basuku nan ampek. Mako dibarilah namo daerah nantun sasuai jo namo suku nan maunyi nyo. Nan Sambilan jo Nan Ampek. Ado tigo daerah nan lain, di Pagaruyuang nangko nan didiami dek suku Gudang sarato Kampuang Tangah, langkok jo suku Balai janggo. Mako masiang-masiang dari daerah nantun dibari namo jo suku nyo. Ado daerah banamo Gudang. Ado kampuang nan banao Kampuang Tangah.  Ado pulo daerah nan banamo Balai Janggo.

            Namun, samantang pun baitu, niniak moyang kami di siko iyo datang nyo dari nagari tuo Pariangan. Dari sinan malah niniak kami turunnyo. Bitu bana kisah Irwandi Dt. Rajo Malno, kapado Zuriati jo kawan-kawannyo. Jikok nyo ado curito ko nan bana, nan ambo danga dari niniak sarato mamak nan daulu. Mudah-mudahan manjadi ama jo ibadah lah handaknyo dek baliau-baliua nantun, bitu bana Mak dt. Rajo malano bakato. Jikok nyo ado curito nan salah, tantu sajo kasalahan datang dari kito, kito nan hanyo manusia tampek salah jo gawa bahimpunnyo. Kapado nan mambaco maaf dimintak kapado tuhan ampun di pinto kan.

*Dosen Sastra Minangkabau Unand