Nak Pandai Rajin Baguru

Nak Pandai Rajin Baguru

Oleh: Bahren*

     Tuhan manurunkan wahyu partamo ka Nabi MUhammad, SAW di gua hiraq iyoalh suret Al’Alaq ayaik 1 inggo 5. Suret Qra;an ko mambari isyaraik ka kito umaiknyo untuak sanantiasio pandai sarato cadiak candokio. Umaik nabi Muhammad disuruah jo diparintah untuak pandai mambaco walaupun dalam kaadaan manarimo wahyu ko nabi kito buto huruf dan ndak pandai tulih baco. Tapi dek kahandak sarato qudarat dari Allah tuhan nan satu. Apo nan diwahyukan ka baliau malalui malaikaik Jibril bisa diikuti sarato diamalkan dek baliau nabi kito.

     Ajaran untuak mambaco ko pun sungguh bukan hanyo mambaco apo nan tasurek sajo, tapi labiah dari itu. Mambaco iko saharusnyo sampai mambaco yang tasirek hinggo mambaco nan tasuruak. Jikok alah nan bak kian mako baru kito bisa dikatokan sabagai urang nan cadiak sarato pandai. Hal ini juga di dukung oleh banyak pendapat bahwa ada baliau nabi kito Muhammad pernah manyampaikan hadist nan aratinyo Tuntuiklah Ilimi walau sampai ka nagari Cino. Hadist nan diyakini sabagai salah satu hadis sahih dek banyak urang ko satidaknyo manjadi motipasi dek kito untuak salalu baguru. Walapun ado jua kalangan ulama nan bakato hadist ko tamasuak hadist nan lamah bahkan hadist palsu.

     Tapi samantang pun baitu, dari arati hadis nan itu paliang indak kito diajak untuak indak bosan-bosan sarato maleh dalam manuntuik ilimu. Dalam budaya kito di Minangkabau pun sasungguahnyo ado patatah atau adagium nan babunyi nak pandai rajin baguru. Aratinyo bana indak ado urang ko nan pandai dek indak baguru. Baguru atau manuntuik ilimu ka urang nan labiah tau tu hukumnyo wajib. Jikok ado urang nan pandai dek indak baguru patuik lah kironyo urang tu kito curigai dari ma inyo dapek kapandaian itu.

     PApatah jo adagium di ateh juo mambari samacam patunjuak ka kito untuak indak bamaleh-maleh. Baa dek baitu, karano untuak manjadi pandai itu, ado kato rajin di dalamnyo. Urang nan rajin akan labiah capek pandainyo jikok dibandiangkan jo urang nan indak raji kutiko inyo samo-samao dalam manuntuik ilimu. Urang nan rajin dalam baguru akan capek manangkok apo sajo palajaran nan dibari dek guru ka inyo jiko dibandiangkan jo urang nan bameleh-maleh sajo dalam baguru.

     Baguru dalam kontek iko pun harus dipahami sabagai bantuak atau caro dalam manuntuik ilimu. Guru nan baik sarato elok tu pasti akan mambari pangajaran sarato manunjuak ajarai murik nyo ka arah nan bana. Mako surang guru pun dalam budaya kito di Minangkabau, biasonyo kutiko baliau maraso alah cukuik dalam mambari jo mambagi ilimu nan liau punyo mako liau manyarankan ka murik nyo untuak baguru ka nan lain agar muriknyo mandapek ilimu nan lain pulo. Mako indak heran kito, jikok mancaliak tokoh-tokoh Minangkabau nan jaya maso saisuk sarupo Hamka, Haji Rasul, Haji Piobang, Haji Miskin, Hatta, mampunyoi banyao guru dalam bagagai macam jinih jo disiplin bidang ilimu. Dek baliau-baliau ko rajin makonyo manjadi tokoh-tokoh bangsa lah baliau-baliau ko.

     Tapi, baa nyo dek kito nan ado saat sakarang kini nangko. Anak-anak nan alah gadang dek gadjed jo anak-anak generasi Z. Anak-anak nan bagurunyo indak sajo ka para guru di sikolah tapi gurunyo alah tasadio sacaro maya bukan nyato. Apokoh masih bisa kito baharok banyak jo mereka ko untuak bisa manjadi tokoh bangsa. Semoga..

*Dosen Sastra Minangkabau FIB Unand