Nagari Cubadak

Nagari Cubadak

di Luhak Tanah Data

Oleh   Bahren*

            Tasabuiklah kisah niniak moyang kami Nagari Cubadak turun nan dari Puncak Marapi. Turun nyo bukan sumbarang turun, turun dek karano urang lah samakin rami. Indak doh cukuik lai tanah ka tampek tingga. Itulah sakarek curito nan disampaikan dek Mak Datuak Majo Lelo kapado Zuriati di rumah baliau di Cubadak. Curito ko kisahkan baliau tanggal duo puluah anam bulan Mei tahun duo ribu tujuah. Baa bana curito asa jo usua nagari Cubadak. Simakkan malah curitonyo.

            Niniak moyang kami rang Cubadak nan turun dari puncak Marapi ko batujuan untuak mambukak paladangan dan panarukoan nan baru. Sabagian dijadikan ladang untuak ka bacocok tanam nan sabagian lai di jadikan ka parumahan tampek tingga. Kutiko mulai mambukak daerah nan baru tu. Basuo lah niniak moyang kami sabuah batang nan sadang babuah sangaik banyak dan lah masak-masak pulo buahnyo tu. Salah surang dari niniak kami tu batanyo, Buah a ko?, nan lain manjawek cubolah kalau dak manih. Sasudah dicubo dek niniak nan surang, ditawarkan pulo ka nan lain. Cubo dak?. Sahinggo diulang taruih manaruih. Cubo dak?...Cubo dak?. Mako dek karano buah tu acok disuruah coba dak?. Mako dibari namo lah nagari nan ditumbuahi dek batang dan dicubo dek niniak kami tu dibari namo cubodak, lamo kalamoan manjadi cubadak.

            Sasudah mambuek kampuang di cubadak tadi, Niniak moyang kami mulai turun ka arah bawah. Niniak kami basuo pulo baliak jo buah nan sarupo cubadak tadi. Tapi cubadak nan basuo ko labiah panjang dari cubadak nan partamo basuo dek niniak kami. Lalu niniak kami ko mancubo pulo buah nan tadi nantun. Buah tu manih pulo rasonyo. Pajalanan ditaruih kan ka arah bawah, surang di antaro niniak kito ko batanyo pulo. Dima wak kiniko?, nan lain manjawek. Di buah nan panjang tu a? manjawek niniak tadi oooo. Di sipanjang dulu? Iyo kato niniak nan lain. Dari hasia jawek bajawek tadi, mako dibarilah namo nagari tampek basuo jo cubadak nan panjang tadi jo namo Sipanjang nan barasa dari kato Si (buah) Panjang.

            Sasudah mambuek kampuang Sipanjang, mako niniak kami pun bapisah, sabiah pai ka arah suok, sabagian lain pai ka arah kida. Mereka nan pai ko saliang batanyo. Kama ka pai? Niniak nan lain manjawek kaniak a, di kamudian hari kampuang tadi banamo kaniak, atau Kampuang Kaniak. Mak datuak Majo Lelo nan kutiko itu baumua tujuah puluah sambilan tahun manjadi Ketua KAN nagari Cubadak. Manuruik pangakuan baliau, curito ko lah di dapek liau dari curito tambo minangkabau yang didapeknyo dari urang tuo-tuo dahulu. Dari curito itulah liau mandapek kaba baso niniak moyang rang Cubadak barasa dari Pariangan. Ado pun suku-suku nan ado di nagari Cubadak tu basuku Supanjang Ateh, Supanjang Baruah, dan Bandahiliang.

            Itulah kisah nan di surahkan, dek baliau Datuak Majo Lelo. Kokado curito nan bana, bana  nan datang dari Allah. Allah ta’alah kayo sungguah tampek ilimu bakumpua nyo. Jikok nyo ado kaba nan salah, salah nan datang dari ambo, kapado Allah ambo mamintak ampun, kapado pambaco ambo mamintak maaf. Maaf di pinto banyak-banyak.  

*Dosen Jurusan Sastra Minangkabau FIB Unand