HOME LANGKAN TINGKOK

  • Sabtu, 4 Mei 2019

Nagari Buo

TINGKOK
TINGKOK

Nagari Buo

di Luhak Tanah Data

Oleh   Bahren*

 

            Tasabuik kisah daulunyo, sabuah nagari banamo Buo, nagari nan niniak jo moyangnyo barasa dari Ata jo Padang Gantiang. Indak langkok doh nagari kalau indak do basuku. Mako bacurito lah Mak Haji N Datuak Domo Anso, Bacurito lah liau wakatu itu kapado Zuriati nan datang dari Padang. Adopun suku di Buo ko, iyolah Suku Caniago, Suku Malayu jo Mandahiliang langkok jo suku Ustano Kampuang Gadang

            Ba’a bana mako disabuik Buo batanyo Zuriati tiko itu. Mako Nagari banamo Bou biko malah curitonyo. Adolah pado maso dulu, datang lah sarombongan niniak moyang kami, datang nan dari Ata jo Padang Gantiang, barantilah niniak di sabuah tampek untuak malapeh-lapeh rangah sarato ba istirahaik, indak doh lamo sasudah itu mako mupakaik lah niniak kami, tiko itu untuak bamukim jo manetap. Dima bana lah tampek tu kini, tampek nan di aliri dek batang aia.

Batang aia nan sangai alami, di tumbuahi babagai tumbuahan. Di puncak-puncak tubuahan tadi nampak lah banyak sarang buruang Buo, buruang tampuo kato rang kini. Dek karano batang aia banyak basarang  buruang Buo, mako supakaik lah niniak kami mambari namo batang aia tadi jo Batang Buo. Samantaro daerah nan banyak buruang Buo tu diagiah namo jo Nagari Buo.

Makin lamo, urang samakin banyak, mako indak doh mungkin manatap di ciek tampek, mako dibukak lah tampek-tampek bamukim nan baru. Tampek nan baru itu kini, ado pulo sabuah Ustano Rajo, Di namokanlah tampek tu kini Ustano Rajo. Limbak nan dari pado itu, kampuang nan lataknyo di tangah-tangah nagari di bari namo jo Kampuang Tangah.

Ado pulo ciek kampuang, nan manjadi kampuang nyo kaum paderi, mako dibarai namo lah kampuang tu jo namo piminan paderi nan tasabuik Imam Bonjo. Indak doh jauh dari kampuang Imam Bonjo dibuek pulo ciek lai, kampuang nan baru dibuek tu dibari namo Kampuang Baru. Baitu bana lah niniak moyang kini nan manjadikan alam sabagai guru, indak doh di pasusah bana dalam mambuek jo mambari namo sasuatu.

Cirito ko indak doh di karang-karang atau curito duto, bitu bana Mak Datuak Domo Anso, bakato ka Zuriati. Apo sabab jo karanonyo, dek curito ko lah di curitokan sacara turun tamurun dari niniak nan tuo-tuo daulu. Salain nan dari pado itu, tampek-tampek jo kampuang nan di sabuik kan tadi sampai kini masih ado jajak jo bakeh nyo. Sabagai contoh Ustano Rajo inggo kini masih ado bakeh nyo. Baitu pulo kampuang baru, dek namo nyo kampuang baru inggo kini masih bisa di caliak tampek tingga rang di situ iyo masih baru-baru kalau kio bandiang kan jo kampuang-kampuang nan lai.     

Salain curito nan di ateh Mak Datuak Domo Anso juo bakisah tantang salah surang Rajo nan tasabuik dalam Rajo Tigo Selo. Di  Nagari Buo ko kini surang di  antaronyo nan Banamo Rajo Ibadat di Buo ko lah bamukim nyo. Mak Datuak Domo Anso iyolah Katua KAN Nagari Buo. Limo puluah limo umua liau wakatu itu, kutiko liau bacurito di rumah Liau di Buo. Jikok di caliak jo dikana bana, bilo bana liau ko bacurito dalam catatan kami, Liau manyurah jo bacurito tanggal lapan baleh di Bulan Mei tahun Duo ribu tujuah.

Itulah curito nagari Buo, nan disampaikan kali nagko. Jikok nyo ado nan bana tantang curito nantun, kabanaran nan datang dari Allah. Allah ta’ala kayo sungguah, tampek ilimu bahimpunnyo. Jikok nyo ado kato nan salah, salah nan datang dari ambo. Maklum lah ambo manusia tampek basarang salah jo gawa. Kapado tuhan kito mamintak ampun. Ka pambaco ambo mamintak maaf, maaf di pintak banyak-banyak bia indak manjadi doso.

*Dosen Bahasa dan Sastra Minangkabu FIB Unand


Wartawan : Bahren
Editor : Bahren

Tag :# Langkan # Tingkok # Asa # Usua # Nagari

Baca Juga Informasi Terbaru MinangSatu di Google News

Ingin Mendapatkan Update Berita Terkini, Ayu Bergabung di Channel Minangsatu.com