MINANGKABAU

Minangkabau

di Luhak Tanah Data

Oleh: Bahren*

Minangkabau …, tanah nan den cinto
Pusako bundo dahulunyo
Rumah Gadang …, nan sambilan ruang
Rangkiang baririk di halamannyo

(Ciptaan (?) dipopulerkan oleh Lily Syarief)

Baitu bana, lah bunyi sabait lagu nan galik tadanga di talingo kito. Lagu nan di dendangkan dek Lily Syarief tu, saakan-akan mambaok kito ka Ranah Bundo nan alamnyo sangaiklah lancak sarato alami nangko. Tapi, samantang pun baitu untuak ka pa lanca-lanca kaji. Bia nak pasa jalan sirajah ko, Mako ado baiaknyo kito kaji juo baa ado nagari nangko banamo Minangkabau di Luhak Tanah Data.

Curito ko bamulo takalo Zuriati, datang nan dari Padang. Datang mahadok ka baliau Mak Datuak Tungga Kayo di Kantua Camaik Sungayang tiko itu. Tapek nyo di tanggal lapan baleh di bulan Mei duo ribu tujuah. Limo puluah umua liau Datuak Tungga, wakatu basuo jo Zuriati. Apo ko bana mukasuik Zuriati, datang makadok ka baliau. Ado pun mukasuik nan dibaok. Nak batanyo-tanyo parakaro manga nagari banamo Minangkabau.

Bagulambek liau bacurito, manyurahkan sado nan liau tau, mangisahkan sado nan takana. Mako nagari banamo Minangkabau, ado pado maso daulunyo takalo urang dari Jawa (Karajaan Majapahit), datang ka Pagaruyuang handak manyarang nagari nangko. Dek gawa sarato rasah, kok kalah beko dalam parang. Mako di kirim malah dek Rajo Pagaruyuang dikirim molah surang utusan datang mahadok ka panglimo parang Majapahit nantun. Ado pun kaba nan dibaok, dek pisuruah Rajo nantun iyolah kaba baso parang ka mambaok banyak korban. Manusia sato di dalam.  Bia tak jatuah korban dari manusia, baa kok diganti sajo parang nantun jo adu kabau misal nyo sajo. Baitu rundiangan nan dibaok pisuruah Rajo Pagaruyuang.

Sasudah diinok-manuangkan dek palimo parang Majapahit. Pintak lai kabuliah kandak ko lai kabalaku, mako sapakaik lah inyo maso itu. Mako ditukuak malah hari, dicari wakatu nan tapek bilo ko adu kabau ka dibuek. Dek baliau urang Majapahit dicari malah kabau sa ikua, kabau nan sangai gadangnyo. Gadang nan indak alang kapalang mungkin gajah sajo katandingannyo. Limbak nan dari pado itu, dek baliau Rajo Pagaruyuang dicari sikua anak kabau, nan alah indak manyusu tigo hari lamo nyo. Di muncuang anak kabau nantun, dibari ba minang (taji) yang alang kapalang tajamnyo. Tibo malah wakatunyo, sasuai jo wakatu nan batakuak sarato hari nan babuek. Mako bakumpua malah sagalo rakyat, manyasikan adu kabau nantun. Bia basuluah matoari, nak nyo bagalanggang mato rang banyak. Dek mancaliak kabau rang Pagaruyuang ketek pidia sajo badannyo, galak lah urang Majapahit wakatu itu, raso bagarah sajao rang Pagaruyuang nak malawan kabau e nan gadang nantun.

Tapi apo nan tajadi, dek anak kabau nan alah indak manyusu tigo hari nantun. Mancaliak kabau nan gadang tadi, disangko dek anak kabau nanyun, induak inyo malah kironyo. Indak bapikia panjang lai, lari lah anak kabau tadi manyonsong kabau nan gadang tadi. Dek karano muncuang ba Minang (taji) luko malah paruik kabau nan gadang tadi. Dek badan lah bakalukuran, cabiak-cabiak dek taji kabau na kaciak tadi, lari molah kabau nan gadang tadi. Lari maninggakan galanggang nan rami. Akia dari ado kabau tadi mako dinyatokanlah kabau rang Pagaruyuang nan manang mako tampek kabau nan babari Minang (taji sarato manag diadu tadi dibarilah namo tampek nantun jo sabutan Minangkabau. Bitulah curito nan ambo tarimo sajak daulunyo, curito nan alah dikabakan dek niniak moyang kami sacaro tutun tamurun.

Jikok ado kisah nan salah, kasalahan nan datang dari kito manusia, tampek gawa jo salah bahimpunnyo. Jikok nyo ado kaba nan bana, kabanaran tantu datang dari tuhan Allah ta’ala kayo sungguah. Tampek sagalo ilimu basarangnyo. Kapado dunsanak nan mambaco, maaf dipintak, kapado tuhan ampun dipinto.

* (Dosen Sastra Minangkabau FIB Unand)